༢༠༡༡ ཟླ་ ༡༡ ཚེས་ ༨ རེས་གཟའ་མིག་དམར།
༄༅།།  འདི་གར་ཨོ་སི་ཊོ་ལི་ཡའི་སྐུ་ཚབ་དོན་ཁང་ནས་ཕྱི་ལོ་ ༢༠༡༡ ཟླ་ ༡༡ ཚེས་ ༧ ཉིན་བཏང་གནས་ནང་འཁོད་དོན། འདི་ཟླའི་ཕྱི་ཚེ་ ༦ ཉིན་ཨོ་སི་ཊོ་ལི་ཡའི་རྒྱལ་ས་ཀེན་བྷེ་རའི་ནང་གནས་སྡོད་བོད་མི་རྣམས་ལ་ཁུལ་དེའི་ས་གནས་བོད་རིགས་མཐུན་ཚོགས་ནས་དབུ་མའི་ལམ་གྱི་སྲིད་བྱུས་སྐོར་ཟབ་སྦྱོང་ཤིག་གོ་སྒྲིག་གནང་བ་དང། སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་གདན་ཞུས་ལྟར་ཟབ་སྦྱོང་ཐོག་གསུང་བཤད་གནང་ཡོད།
དེ་ཡང་ཟབ་སྦྱོང་མ་ཚོགས་གོང་དུ་བོད་བསྟན་སྲིད་ཀྱི་ཆེད་དུ་རང་སྲོག་བློས་བཏང་གིས་སྐུ་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་བོད་མི་རྣམས་ལ་མྱང་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་རྗེས། འཕགས་མཆོག་སྤྱན་རས་གཟིགས་ཀྱི་མཚན་སྔགས་མ་ཎི་ཡིག་དྲུག་གསོག་སྒྲུབ་གནང་ཡོད། དེའི་རྗེས་ཟབ་སྦྱོང་དབུ་འཛུགས་གནང་སྟེ་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་ཀྱིས་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་བྱུང་རིམ། གྲུབ་འབྲས་ཀྱི་སྐོར་དང་། དེ་བཞིན་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་གྱི་འགྲེལ་བརྗོད། དབུ་མའི་ལམ་དང་འབྲེལ་བའི་སྒོ་ནས་བོད་རྒྱ་ཞི་མོལ་གྱི་གནས་སྟངས་བཅས་ཀྱི་སྐོར་ལ་ངོ་སྤྲོད་སྙིང་བསྡུས་གནང་བ་དང་ལྷན་རང་གཞུང་ནས་གསར་དུ་དཔར་སྐྲུན་ཞུས་པའི་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་། བྱུང་རིམ། གྲུབ་འབྲས་བཅས་ཀྱི་ངོ་སྤྲོད་འོད་སྡེར་ཞིག་ཟབ་སྦྱོང་ནང་མཉམ་ཞུགས་མཁན་རྣམས་ལ་བསྟན་ཡོད། དེ་བཞིན་སྐུ་ཚབ་དོན་གཅོད་ཀྱིས་ཚོགས་བཅར་བས་བཏོན་པའི་དྲི་བ་ཁག་ལ་ལན་འདེབས་ཁ་གསལ་གནང་ཡོད་ལ། རང་གཞུང་ནས་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་བྱུང་རིམ་གྲུབ་འབྲས་བཅས་ཀྱི་ངོ་སྤྲོད་སྐོར་གྱི་ཡིག་ཆ་དང་འོད་སྡེར་དཔར་སྐྲུན་གནང་བ་ཁག་བོད་རིགས་ཚོགས་པ་བརྒྱུད་མང་ཚོགས་ལ་འགྲེམས་སྤེལ་གནང་ཡོད། སླད་མེལ་བྷོན་དང་ས་གནས་གཞན་ཁག་ལ་ཡང་གོང་བཞིན་ཟབ་སྦྱོང་ཀྱི་ལས་རིམ་གོ་སྒྲིག་གནང་འཆར་ཡོད་འདུག་པ་བཅས།།