༢༠༡༡ ཟླ་ ༡༡ ཚེས་ ༨ རེས་གཟའ་མིག་དམར།

༅༅། འདི་གར་ཨོ་སི་ཊོ་ལི་ཡའི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཟླ་འདིའི་ཕྱི་ཚེས་ ༣ ཉིན་ནས་བོད་ཀྱི་ཤུགས་རྐྱེན་(The Tibet Effect)ཞེས་པའི་ཚོགས་པ་དང་། གཞས་པ་བསྟན་འཛིན་ཆོས་རྒྱལ་ལགས་གཉིས་ཀྱིས་བོད་དོན་དྲིལ་བསྒྲགས་སླད། ཨོ་སི་ཊོ་ལི་ཡའི་གྲོང་ཁྱེར་སིད་ནི་ཁུལ་དུ་བོད་ཀྱི་གློག་བརྙན་སྒྱུ་རྩལ་ཞེས་པའི་དུས་སྟོན་ཐེངས་དང་པོ་དེ་བཞིན་ཉིན་གྲངས་བཞིའི་རིང་གོ་སྒྲིག་གནང་འདུག
དེ་ཡང་ཕྱི་ཚེས་ ༣ ཉིན་ཨོཔ་ར་ཧའོ་སི་(Opera House)ཞེས་པའི་གྲགས་ཅན་ཚོང་ཁང་ནང་དགོང་དྲོ་གཞས་པ་བསྟན་འཛིན་ཆོས་རྒྱལ་ལགས་ཀྱིས་བོད་ཞེན་གྱི་གླུ་གཞས་ཁག་གཅིག་བཏང་བ་དང་། རྒྱ་གར་བ་མ་ཧ་རི་ཤི་དང་། ཊོམ་ཝ་ཊི་གཉིས་ནས་རོལ་དབྱངས་དཀྲོལ་ཏེ་དུས་སྟོན་འགོ་འབྱེད་གནང་། དེ་རྗེས་བོད་དོན་འདི་བཞིན་རེ་བ་མེད་པ་རེད་དམ། ཞེས་པའི་བརྗོད་གཞིའི་ཐོག་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་དང་། རྒྱ་གར་ནས་ཆེད་མངགས་ཕེབས་པ་བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས། འགྲོ་བ་མིའི་ཐོབ་ཐང་འཐབ་རྩོད་པ་དང་མཁས་དབང་ཧའོ་ཝར་ཊེ་བིལ་(Howard Bill)བཅས་ནས་གོང་གསལ་བརྗོད་གཞིའི་ཐོག་བགྲོ་གླེང་གནང་བ་དང་། ཚོགས་ཁོངས་ནས་ཐེངས་འདིའི་བགྲོ་གླེང་ནི་བརྗོད་གཞི་དང་། དེ་མིན་དེང་སྐབས་བོད་ནང་གི་ཛ་དྲག་གི་གནས་སྟངས་བཅས་ཀྱི་སྐོར་ལ་དྲི་བ་བྱས་པར་ལན་འདེབས་གནང་ཡོད། དུས་སྟོན་གྱི་དབུ་འབྱེད་ཚོགས་འདུ་དེར་མི་འབོར་ཕོན་ཆེ་འདུ་འཛོམས་བྱུང་བ་མ་ཟད། བོད་དོན་སྐོར་གསལ་བསྒྲགས་ཡག་པོ་བྱུང་ཡོད། ཕྱི་ཚེས་ ༤ ནས་བཟུང་མེན་ལི་གློག་བརྟན་ཚོགས་ཁང་དུ་བོད་ཀྱི་གནད་དོན་དང་འབྲེལ་བའི་སྐོར་གློག་བརྙན་མི་འདྲ་བ་ཁག་དྲུག་བསྟན་ཡོད་པ་བཅས་སུ།།