༢༠༡༡ ཟླ་ ༡༡ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༡ རེས་གཟའ་ཟླ་བའི་ཉིན་ཨོ་སི་ཊོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ལྕམ་སྐུ་མེ་ལི་ས་པར་ཀེ་(Ms. Melissa Parke) མཆོག་གིས་གྲོས་ཚོགས་སུ་བསྒྲགས་གཏམ་ཞིག་སྤེལ་བའི་ནང་འཁོད་དོན། ཉེ་ལམ་བོད་ཤར་ཕྱོགས་ཁུལ་དུ་བོད་མི་གཞོན་སྐྱེ་ཚོས་རང་ལུས་མེར་སྲེག་བཏང་བའི་དོན་རྐྱེན་བྱུང་བར་ང་རང་ཧ་ཅང་བློ་ཕམ་བྱུང།
འདི་ལོ་ཕྱི་ཟླ་ ༣ ནས་བོད་མི་ཚོས་བོད་ཀྱི་རིག་གཞུང་དང་ཆོས་དད་ལ་དམ་བསྒྲགས་ཚབས་ཆེ་གཏོང་བཞིན་པ་དེར་དོ་སྣང་ཡོང་ཆེད་འ་ཆད་འུ་ཐུག་ལ་བརྟེན་ལས་འགུལ་དེ་སྤེལ་ཡོད། བཙུན་མ་གཉིས་ཀྱིས་གཙོས་རང་ལུས་མེར་སྲེག་གཏོང་མཁན་གྱི་བོད་མི་དྲུག་ལ་མེ་སྐྱོན་ཚབས་ཆེ་ཕོག་པར་བརྟེན་འདས་གྲོངས་སུ་གྱུར་ཡོད། བོད་མི་ལྷག་མ་གཞན་ལྔ་ད་ལྟ་གང་དུ་ཡོད་མེད་ཤེས་རྟོགས་རྩ་བ་ནས་བྱུང་མེད། རང་ལུས་མེར་སྲེག་གཏོང་མཁན་ཁོངས་ནས་དགེ་འདུན་པ་བདུན་ཀིརྟི་དགོན་པ་ནས་ཡིན་ཞིང་། ཀིརྟི་དགོན་པ་ནི་ཕྱི་ལོ་ ༢༠༠༨ ལོར་ས་བྱི་ཞི་རྒོལ་ཆེན་མོའི་སྐབས་མཉམ་ཞུགས་གནང་མཁན་གྱི་དགོན་པ་གལ་ཆེ་ཞིག་ཆགས་ཡོད། བོད་ནང་རང་ལུས་མེར་སྲེག་བཏང་བ་ཐོག་མ་དེ་ཕྱི་ལོ་ ༢༠༡༡ ཕྱི་ཟླ་ ༣ ཚེས་ ༡༦ ཉིན་ཡིན་པ་དང། དུས་ཚིགས་དེ་ནི་ཕྱི་ལོ་ ༢༠༠༨ ལོར་རྒྱ་མིའི་ཉེན་རྟོག་པས་ས་བྱི་ཞི་རྒོལ་ཆེན་མོའི་ནང་མཉམ་བཞུགས་གནང་མཁན་གྱི་ཀིརྟི་དགོན་པའི་དགེ་འདུན་པ་བཅུ་གསུམ་ལ་མེ་མདའ་བརྒྱབ་སྟེ་དམར་གསོད་བཏང་ནས་ལོ་གསུམ་འཁོར་བའི་དུས་ཚིགས་ཤིག་ཡིན་འདུག རྒྱ་ནག་གཞུང་གིས་བོད་མི་ཚོར་དམ་བསྒྲགས་ཤུགས་ཆེ་བཏང་བའི་ཐོག་རྒྱལ་གཅེས་ཆོས་གཅེས་ཟེར་བའི་སློབ་གསོའི་ལས་འགུལ་སྤེལ་མུས་་ཁར་དགེ་འདུན་པ་ཚོའི་འགྲོ་བསྐྱོད་ཀྱིས་གཙོས་ཆོས་དད་ལ་དམ་བསྒྲགས་ཆེ་རུ་བཏང་ཡོད།
དེར་བརྟེན་བོད་མིས་ངོ་རྒོལ་དང་རྒྱ་ནག་གཞུང་གིས་དམ་བསྒྲགས་བྱ་རྒྱུའི་འཁོར་ལོའི་བརྒྱུད་རིམ་དེ་གྲུབ་ཡོད། ད་ཆ་རྒྱ་ནག་གཞུང་གི་དམ་བསྒྲགས་ཀྱི་ཚད་གཞི་དེའི་འོག་བོད་མི་ཚོས་འུ་ཐུག་ཐབས་ཟད་ཀྱི་བྱ་སྤྱོད་དེ་འདྲ་ཞིག་སྤེལ་དགོས་ཐུག་ཡོད། ང་ཚོས་རྔ་པའི་ཕྱི་ལ་ཡོད་པའི་ཁམས་དཀར་མཛེས་ཁུལ་དུ་རང་ལུས་མེར་སྲེག་བཏང་བ་ཐོག་མ་དེ་མཐོང་ཡོད། གལ་ཏེ་བོད་མིའི་དཀའ་ངལ་དེ་དག་གང་མྱུར་མ་སེལ་ཚེ་རང་ལུས་མེར་སྲེག་བཏང་བའི་དོན་རྐྱེན་དེ་རིགས་ད་དུང་མང་དུ་འགྲོ་ཉེན་ཡོད།
ཨོ་སི་ཊོ་ལི་ཡའི་སྲིད་གཞུང་གིས་རྒྱ་ནག་གཞུང་དང་ལྷན་ཕྱི་ཟླ་ ༡༠ ཚེས་ ༡༩ ཉིན་རྒྱ་ནག་གི་རྒྱལ་ས་པེ་ཅིང་དང་ཨོ་སི་ཊོ་ལི་ཡའི་གྲོང་ཁྱེར་ཀེན་བྷེར་ར་གཉིས་ཆའི་ནང་བོད་མི་ཚོའི་དཀའ་ངལ་ལ་སེམས་ཚབས་ཀྱི་རྣམ་པ་ཤུགས་ཆེ་བསྟན་ཡོད་པ་མ་ཟད། མུ་མཐུད་རྒྱ་ནག་གཞུང་དང་ལྷན་བོད་མི་ཚོའི་དཀའ་ངལ་སྐོར་འགྲོ་གླེང་གནང་རྒྱུ་དང། ཡུལ་གཉིས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་གཉིས་མོལ་སྐབས་རྒྱ་ནག་གཞུང་གིས་བོད་མིའི་སྐུ་ཚབ་དང་ལྷན་གྲོས་མོལ་གྱི་ལམ་ནས་བོད་མི་ཚོའི་དཀའ་ངལ་གང་མྱུར་སེལ་དགོས་པའི་རེ་འདུན་འདོན་རྒྱུའི་རེ་བ་ཞུ་བཞིན་ཡོད། བོད་ནང་དུ་བོད་མི་ཚོའི་དཔལ་འབྱོར་ཡར་རྒྱས་བཏང་བ་དང་སྦྲགས་བོད་མི་ཚོའི་ཐུན་མིན་ཆོས་དང་སྐད་ཡིག རིག་གཞུང་སོགས་སྲུང་སྐྱོབས་དགོས་རྒྱུ་གལ་ཆེན་པོ་ཆགས་ཡོད་ཅེས་སོགས་འཁོད་ཡོད།།
