༢༠༡༡ ཟླ་ ༡༡ ཚེས་ ༢༡ རེས་གཟའ་ཟླ་བ།
༄༅། འདི་གར་ཨ་རིའི་སྐུ་ཚབ་དོན་ཁང་ནས་ཕྱི་ལོ་ ༢༠༡༡ ཟླ་ ༡༡ ཚེས་ ༢༡ ཉིན་བཏང་གནས་ནང་འཁོད་དོན། ཉིས་སྟོང་བཅུ་གཅིག་རྫོགས་ལ་ཉེ་བའི་སྐབས་ཏེ། ཕྱི་ཟླ་ ༡༡ ཚེས་ ༡༨ དགོང་དྲོ་ཨ་རིའི་སྐུ་ཚབ་དོན་གཅོད་ཁང་ནས་གྲོང་ཁྱེར་ནིའུ་ཡོག་ནང་གི་བོད་པའི་ཟ་ཁང་ཞིག་ཏུ་རྒྱ་རིགས་ཤེས་ཡོན་ཅན་དང་། རྩོམ་པ་པོ་ཁག་གཅིག་ལ་སྣེ་ལེན་གྱི་ཚོགས་འདུ་ཞིག་བསྐོང་ཚོགས་གནང་སྟེ་ལོ་འདིའི་ནང་རྒྱ་རིགས་གྲོགས་པོ་ཚོས་བོད་པའི་བདེན་དོན་འཐབ་རྩོད་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད། སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་ཐོག་མའི་ངོ་སྤྲོད་མདོར་བསྡུས་ཤིག་གནང་གྲུབ་རྗེས། སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་རྒྱ་རིགས་གྲོགས་པོ་ཡོངས་ལ་མཛའ་བརྩེའི་འཚམས་འདྲི་དང་ཆབས་ཅིག ཕྱི་ལོ་ ༢༠༠༨ ལོར་བོད་ས་ཡོངས་སུ་ཞི་རྒོལ་ཆེན་པོ་བྱུང་སྐབས་དང་། ལྷག་པར་བར་ལམ་བོད་ནང་མེར་བསྲེགས་ཀྱི་དོན་རྐྱེན་བསྟུད་མར་བྱུང་སྐབས་རྒྱ་ནག་ཕྱི་ནང་གཉིས་སུ་ཡོད་པའི་རྒྱ་རིགས་མང་པོས་རྣམ་པ་འདྲ་མིན་ཐོག་ནས་བོད་པར་གདུང་སེམས་མཉམ་སྐྱེ་དང་།
རྒྱབ་སྐྱོར་གནང་བར་ང་ཚོར་ཕན་ཐོགས་ཆེན་པོ་བྱུང་། རྒྱ་རིགས་གྲོགས་པོའི་རྒྱབ་སྐྱོར་ནི་བོད་མིའི་དཀའ་ངལ་སེལ་རྒྱུར་ཧ་ཅང་གལ་ཆེན་པོ་ཆགས་ཡོད་པར་བརྟེན་རྒྱབ་སྐྱོར་མུ་མཐུད་ནས་གནང་རོགས་ཞེས་སོགས་གསུངས་པ་དང་འབྲེལ་རྒྱ་གཞུང་གི་བོད་དོན་ཐོག་བསམ་བློ་གཏོང་སྟངས་དང་། བར་ལམ་གྱི་གནས་སྟངས་སྙིང་བསྡུས་ངོ་སྤྲོད་གནང་།རྒྱ་རིགས་ཤེས་ཡོན་ཅན་ལ་སྣེ་ལེན་ཞུ་བའི་ཚོགས་འདུར་ཆེད་དུ་གདན་ཞུ་བྱས་པའི་བཀའ་ཟུར་ཀི་རྟི་རིན་པོ་ཆེ་མཆོག་གིས་དེ་ཉིན་གྱི་གོ་སྐབས་དང་བསྟུན་ཏེ་རྒྱ་རིགས་རྣམས་ལ་མདོ་སྨད་རྔ་པ་ཁུལ་དང་། ཀིརྟི་དགོན་པས་གཙོས་བོད་མི་རིགས་ཁྱོན་ལ་མི་ཐོག་གསུམ་ལ་འཕྲད་པའི་དཀའ་སྡུག་རྣམས་ངོ་སྤྲོད་སྙིང་བསྡུས་དང་སྦྲགས། བོད་ནང་རང་ལུས་མེར་སྲེག་བཏང་བའི་དོན་རྐྱེན་ཡོང་དགོས་པའི་རྒྱུ་རྐྱེན་ངོ་སྤྲོད་གནང་།དེ་རྗེས་རྒྱ་རིགས་གྲོགས་པོ་ཁག་གཅིག་གིས་སེམས་ཚོར་ཆེན་པོའི་ཐོག་ནས་བོད་དང་བོད་མིར་རྒྱབ་སྐྱོར་གྱི་གཏམ་བཤད་སྤེལ་བའི་ནང་། རང་དབང་ལུང་པར་ཡོད་པའི་རྒྱ་རིགས་ཚོས་རང་དབང་བྲལ་བའི་རྒྱ་ནག་མི་མང་ལ་བོད་ཀྱི་དངོས་ཡོད་དཀའ་ངལ་རྣམས་ངོ་སྤྲོད་བྱེད་རྒྱུར་ཤུགས་སྣོན་རྒྱག་དགོས་པ་དང་།
ད་ལྟའི་དུས་སྐབས་ལ་རང་ལུས་མེར་སྲེག་བཏང་བའི་དོན་རྐྱེན་བསྟུད་མར་ཐོན་པ་དེ་འགྲིག་དང་མི་འགྲིག་གི་གོ་བསྡུར་བྱེད་རྒྱུའི་དུས་ཚོད་མ་ཡིན་པར། རང་ལུས་མེར་སྲེག་བཏང་བའི་དོན་རྐྱེན་ཐོན་པ་འདིས་གང་ཞིག་སྟོན་གྱི་ཡོད་པ་ཤེས་རྟོགས་བྱེད་རྒྱུ་དེ་གལ་ཆེན་པོ་རེད་ཅེས་སོགས་གསུངས། དེ་བཞིན་རྒྱ་ནག་གི་གྲགས་ཅན་སྙན་ངག་པ་བགྲེས་སོང་ཧོང་ཞང་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་སྙན་ངག་ཞིག་ཀྱང་གྱེར་འདོན་ཞུས་པར་མི་རྣམས་ཀྱི་སེམས་ལ་ཚོ་བ་དམིགས་བསལ་ཞིག་བྱུང་ཡོད་། ཐེངས་འདིའི་སྐུ་ཚབ་དོན་གཅོད་ཁང་ནས་གོ་སྒྲིག་བྱས་པའི་རྒྱ་རིགས་གྲོགས་པོར་སྣེ་ལེན་བྱེད་པའི་ཚོགས་འདུ་དེར་རྒྱ་རིགས་རྩོམ་པ་པོ་དང་། སློབ་ཕྲུག སློབ་གྲྭའི་དགེ་རྒན། དཔྱད་གཏམ་པ། རྒྱ་ནག་སྐམ་ས་ཆེན་པོ་ནས་ཕེབས་པའི་མཁས་དབང་། གསར་འགྱུར་ལས་རིགས་ཀྱི་མི་སྣ་བཅས་ཁྱོན་མི་གྲངས་ ༥༠ ཙམ་དང་། དེ་མིན་བོད་ཀྱི་ཐེབས་རྩའི་འགན་འཛིན་དང་། སྤྱི་མཐུན་ཚོགས་པ། གཞོན་ནུ། བུད་མེད། བོད་རང་དབང་སློབ་ཕྲུག་ཚོགས་པའི་ཚོགས་གཙོ། དོན་གཅོད་ཁང་གི་ལས་བྱེད་བཅས་རྒྱ་བོད་མི་གྲངས་ ༨༠ ཙམ་མཉམ་ཞུགས་གནང་ཡོད་པ་བཅས།།
