༢༠༡༡ ཟླ་ ༡༡ ཚེས་ ༤ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༣ རེས་གཟའ་ཕུར་བུའི་ཉིན་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་ཨ་རིའི་གྲོས་ཚོགས་ཀྱི་ཊོམ་ལེན་ཊོ་སི་འགྲོ་བ་མིའི་ཐོབ་ཐང་ལྷན་ཁང་ (Tom Lantos Human Rights Commission) དུ་བོད་ཀྱི་གནད་དོན་དང་འབྲེལ་བའི་ཉན་ཞིབ་བྱ་རྒྱུའི་གོ་སྐབས་གནང་བར། བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་དང་བཀའ་ཟུར་ཀིརྟི་རིན་པོ་ཆེ་མཆོག་གིས་བོད་མིའི་འགྲོ་བ་མིའི་ཐོབ་ཐང་ལ་འཕྲད་བཞིན་པའི་དཀའ་ངལ་དང་ཨ་རིའི་གཞུང་གིས་བོད་མི་ཚོར་རྒྱབ་སྐྱོར་གནང་བར་བོད་མི་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་ཨ་རི་གཞུང་མང་གཉིས་ལ་ཐུགས་རྗེ་ཆེ་ཞུས་ཡོད་པ་མ་ཟད། བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་བོད་ཀྱི་ས་ཁུལ་ཁག་ནང་རྒྱ་ནག་གཞུང་གིས་བོད་མི་སྤྱི་དང་། ལྷག་པར་ཆོས་བྱེད་དགོན་སྡེ་ཁག་གི་ནང་དུ་ཆོས་དད་རང་དབང་ཐོག་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པར་བརྟེན། ད་བར་བོད་མི་སྐྱ་སེར་བཅུས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེར་ངོ་རྒོལ་བྱས་ཡོད་སྐོར་སོགས་གསལ་བཤད་གནང་ཡོད།
དེ་ཡང་ཉན་ཞིབ་དེའི་སྐབས་ཐོག་མར་བཀའ་ཁྲི་མཆོག་གིས་ཨ་རིའི་གྲོས་ཚོགས་ཀྱི་ཊོམ་ལེན་ཊོ་སི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ཟུར་པ་ཊོམ་ལེན་ཊོ་སི་ Tom Lantos དམ་པ་དེ་ཉིད་ཀྱིས་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་ཚོར་གདུང་སེམས་མཉམ་སྐྱེའི་ཐོག་སེམས་ཐག་ཧ་ཅང་ཉེ་པོ་གནང་ཡོད་པ་མ་ཟད། བོད་མི་ཚོའི་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད། ཕྱོགས་མཚུངས་བཀའ་ཁྲི་མཆོག་གིས་བོད་མིའི་མང་གཙོའི་འཕེལ་རིམ་ཐོག་གསལ་བཤད་ཀྱང་གནང་ཡོད། དེ་བཞིན་སྐབས་དེར་བཀའ་ཟུར་ཀིརྟི་རིན་པོ་ཆེ་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ནང་བཙན་འཛུལ་བྱས་པ་ནས་བཟུང་བོད་མི་སྤྱི་དང་ལྷག་པར་བོད་མདོ་སྨད་རྔ་པའི་ཁུལ་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཕྱི་ལོ་ ༡༩༣༥ ལོར་དམར་དམག་རྒྱང་བསྐྱོད་ཆེན་མོའི་སྐབས་རྔ་པའི་ཁུལ་དུ་སླེབས་ཏེ་བོད་མིའི་དགོན་སྡེ་ཁག་གཏོར་བཤིག་བཏང་བ་མ་ཟད། བོད་མི་མང་པོ་དམར་གསོད་བཏང་བ་སོགས་ཀྱི་བྱ་སྤྱོད་ལ་བརྟེན་བོད་མིའི་སེམས་ནང་རྨ་ཁ་ཆེན་པོ་བཟོས་ཡོད། དེ་རྗེས་རྔ་པའི་ཁུལ་དུ་ཕྱི་ལོ་ ༡༩༥༨ ལོར་དམངས་གཙོ་བཅོས་བསྒྱུར་ཟེར་བ་དང་ཕྱི་ལོ་ ༡༩༦༦ ལོར་རིག་གནས་གསར་བརྗེ་སྐབས་རྔ་པའི་ཁུལ་དུ་བོད་མི་མང་པོ་དམར་གསོད་བཏང་བ་དང་མུ་གེས་ཤི་བ་སོགས་ཀྱི་དཀའ་ངལ་ཚད་མེད་སྤྲད་དེ་རྨ་ཁ་གཉིས་པ་དེ་བཟོས་ཡོད།
དེ་རྗེས་ཕྱི་ལོ་ ༡༩༩༨ ལོར་རྒྱ་ནག་གཞུང་གིས་རྔ་པའི་ཁུལ་དུ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་སྤེལ་ཏེ་དགོན་སྡེ་ཁག་ནང་ཆོས་དད་རང་དབང་ལ་རྩིས་མེད་རྡོག་རོལ་བཏང་བའི་བྱ་སྤྱོད་སྤེལ་བར་བརྟེན། བོད་མི་ཚོའི་སེམས་ནང་རྨ་ཁ་གསུམ་པ་དེ་བཟོས་ཡོད་སྐོར་སོགས་ཀྱི་གསལ་བཤད་གནང། ཕྱོགས་མཚུངས་འདི་ལོ་ཕྱི་ཟླ་གསུམ་པ་ནས་རྔ་པ་ཀིརྟི་དགོན་པའི་དགེ་འདུན་པ་ཕུན་ཚོགས་ལགས་དང་རྟའུ་ཉ་མཚོ་དགོན་པའི་དགེ་འདུན་པ་ཚེ་དབང་ནོར་བུ་ལགས། ཀིརྟི་དགོན་པའི་དགེ་འདུན་པ་བློ་བཟང་སྐལ་བཟང་ལགས་དང། བློ་བཟང་དཀོན་མཆོག་ལགས། སྐལ་བཟང་དབང་ཕྱུག་ལགས། དེ་བཞིན་དེ་སྔ་ཀིརྟི་དགོན་པར་ཆོས་བཞུགས་གནང་མྱོང་མཁན་མི་སྐྱ་ཆོས་འཕེལ་ལགས་དང། མཁའ་དབྱིངས་ལགས། ནོར་བུ་དགྲ་འདུལ་ལགས། དཀར་མཛེས་ཟླ་བ་ཚེ་རིང་ལགས། རྟའུ་བཙུན་དགོན་དགའ་ལྡན་བྲག་དཀར་ཆོས་གླིང་གི་བཙུན་མ་བསྟན་འཛིན་དབང་མོ་ལགས། སོགས་ཀྱིས་རང་ལུས་མེར་སྲེག་བཏང་སྟེ་རྒྱ་ནག་གཞུང་ལ་ངོ་རྒོལ་བྱས་ཡོད་སྐོར་སོགས་ཞིབ་ཕྲ་གསལ་བཤད་གནང་ཡོད་པ་བཅས།།
