༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༡ རེས་གཟའ་ཟླ་བའི་ཕྱེད་ཡོལ་ཙམ་ལ་སུད་སི་ཕྱི་སྲིད་ལྷན་ཁང་ནས་བོད་ནང་གི་ད་ལྟའི་གནས་སྟངས་ཐོག་སེམས་འཚབ་ཧ་ཅང་ཆེན་པོ་ཡོད་སྐོར་གྱི་བསྒྲགས་གཏམ་ཞིག་སྤེལ་ཡོད། བསྒྲགས་གཏམ་དེའི་ནང་ཕྱི་སྲིད་ལྷན་ཁང་གིས་བོད་ནང་གི་བོད་མི་ཚོས་འུ་ཐུག་ཐབས་ཟད་ཀྱིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་འཛིན་པའི་དམ་བསྒྲགས་ཅན་གྱི་སྲིད་བྱུས་དེར་ངོ་རྒོལ་བྱས་པའི་གནས་སྟངས་དེ་ནི་ཧ་ཅང་སེམས་ཚབས་བྱེད་དགོས་པའི་གནད་དོན་ཞིག་ཆགས་ཡོད། རྒྱ་ནག་དང་ལྷག་པར་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེ་ནི་སུད་སི་དང་རྒྱ་ནག་གཞུང་དབར་གྲོས་མོལ་ཡང་ཡང་བྱ་རྒྱུའི་གནད་དོན་ཞིག་ཡིན་སྐོརའཁོད་ཡོད།
དེ་ཉིན་སྔ་དྲོ་བཀའ་ཁྲི་བློ་བཟང་སེང་གེ་མཆོག་གིས་སུད་སི་རྒྱལ་ས་བྷར་ཎའི་ནང་སུད་སི་ཕྱི་སྲིད་ལྷན་ཁང་གི་ལས་བྱེད་མཐོ་གྲས་ཤིག་དང་མཇལ་འཕྲད་གནང་ཡོད། སྐབས་དེར་བཀའ་ཁྲི་བློ་བཟང་སེང་གེ་མཆོག་གིས་འདི་ལོ་ཕྱི་ཟླ་ ༣ ནས་བོད་མི་ ༡༡ གྱིས་རང་ལུས་མེར་སྲེག་བཏང་ཡོད་པ་དང། བོད་མི་ཚོས་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་འོག་འུ་ཐུག་ཐབས་ཟད་ཆགས་ཏེ་བྱ་སྤྱོད་དེ་འདྲ་ཞིག་མ་སྤེལ་ཐབས་མེད་ཆགས་པ་ལས་གཞན་མི་སུ་ཞིག་གིས་ཀྱང་འཆི་རྒྱུའི་འདོད་པ་བྱེད་ཀྱི་མ་རེད་ཅེས་སོགས་ཀྱི་གསལ་བཤད་གནང་ཡོད་པ་མ་ཟད། ཕྱི་ལོ་ ༡༩༦༠ ཙམ་ནས་རྒྱ་གྲམ་དམར་པོ་དང་སུད་སི་གཞུང་མང་གཉིས་ཀྱིས་བོད་མི་ཚོར་རྒྱབ་སྐྱོར་གནང་བར་བོད་མི་ཚོའི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུས་ཡོད། ཕྱོགས་མཚུངས་བཀའ་ཁྲི་མཆོག་གིས་དབུ་མའི་ལམ་གྱི་ཐབས་ལམ་བརྒྱུད་བོད་ཀྱི་གནད་དོན་སེལ་རྒྱུའི་ཆོད་སེམས་བརྟན་པོ་ཡོད་སྐོར་གསལ་བཤད་གནང་བ་དང་སྦྲགས། བཀའ་ཁྲི་མཆོག་གིས་ཧར་ཝཌ་གཙུ་ལག་སློབ་ཁང་དུ་ལོ་ ༡༦ རིང་བཞུགས་ཡུན་རིང་རྒྱ་ནག་སྐམ་ས་ནས་རྒྱ་རིགས་ཤེས་ལྡན་པ་དང་ལྷན་ཚོགས་དེ་འདྲ་ཐེངས་ལྔ་ཙམ་གོ་སྒྲིག་ཞུས་སྐབས་ལྷན་ཚོགས་སྐབས་གཉིས་ལ་༸གོང་ས་མཆོག་ཀྱང་ཆིབས་སྒྱུར་བསྐྱངས་ཡོད་སྐོར་དང།
བཀའ་ཁྲི་མཆོག་གིས་རྒྱ་རིགས་ཚོ་དང་ལྷན་གྲོས་མོལ་སྐབས་བཟོད་བསྲན་དང་བྱམས་བརྩེའི་བསམ་བློ་དགོས་རྒྱུ་གལ་ཆེ་ཡིན་སྐོར་སོགས་ཀྱི་གསུང་བཤད་གནང། ཕྱོགས་མཚུངས་བཀའ་ཁྲི་མཆོག་གིས་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་མ་ཡ་གྷ་རབ་མཆོག་དང་ལྷན་ཟུར་དུ་མཇལ་འཕྲད་སྐབས་ལྕམ་སྐུ་མཆོག་གིས་རྒྱ་ནག་གཞུང་གིས་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་ལ་སྲུང་བརྩི་བྱེད་དགོས་སྐོར་གསུངས་པ་མ་ཟད། སུད་སི་དང་རྒྱ་ནག་དབར་ཚོང་དོན་གན་རྒྱ་ཇི་འདྲ་ཞིག་འཇོག་དགོས་ཀྱང་འགྲོ་བ་མིའི་ཐོབ་ཐང་དང་ཁོར་ཡུག་གནད་དོན་ངེས་པར་དུ་ཚུད་དགོས་ཞེས་སོགས་ཀྱི་གསུང་བཤད་གནང། དེ་རྗེས་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་མ་ཡ་གྷ་རབ་མཆོག་དང་ལྷན་གསར་འགོད་ལྷན་ཚོགས་སྐབས་བཀའ་ཁྲི་མཆོག་གིས་རྒྱ་ནག་དང་ལྷན་ཚོང་རྒྱག་མཁན་རྒྱལ་ཁབ་སུ་ཡིན་རུང་ཁེ་བཟང་མེད་པར་བརྟེན་འགྲོ་བ་མིའི་ཐོབ་ཐང་སྐོར་འབོད་སྒྲ་ཤུགས་ཆེ་རུ་གཏོང་དགོས་སྐོར་གསུངས་ཡོད། ཕྱི་ཚེས་ ༢༢ ཉིན་བཀའ་ཁྲི་མཆོག་ཇར་མན་རྒྱལ་ས་བྷར་ལན་དུ་ཕེབས་ཏེ་གྲོས་ཚོགས་འཐུས་མི་རྣམས་དང་མཇལ་འཕྲད་གནང་རྒྱུ་མ་ཟད། ས་གནས་བོད་མི་ཚོར་གསུང་བཤད་གནང་རྒྱུ་ཡིན་འདུག་པ་བཅས།།
