༢༠༡༡ ཟླ་ ༡༡ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༧ ནས་ ༢༩ བར་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པས་མགྲོན་འབོད་ཞུས་པ་ལྟར་བཀའ་ཁྲི་བློ་བཟང་སེང་གེ་མཆོག་བེལ་ཇམ་གྱི་རྒྱལ་ས་བྷར་སེལ་དུ་ཕེབས་ཏེ་བོད་དོན་ལྷན་ཚོགས་སྐབས་མིང་དོན་མཚུངས་པའི་རང་སྐྱོང་གི་གནས་བབ་ཐོག་གསུང་བཤད་གནང་རྒྱུ་ཡིན་འདུག དེ་ཡང་བཀའ་ཁྲི་མཆོག་གིས་ཁུལ་དེར་ཉིན་གསུམ་གྱི་གཞུང་དོན་ལས་རིམ་ལྟར་ན་ཡུ་ རོབ་གྲོས་ཚོགས་ཀྱི་ཆབ་སྲིད་མི་སྣ་གཙོ་གྲས་ཁག་གཅིག་དང་ལྷན་མཇལ་འཕྲད་གནང་ རྒྱུ་མ་ཟད། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་རྒྱུ་ཡིན་འདུག

ཕྱོགས་མཚུངས་བཀའ་ཁྲི་མཆོག་གིས་ཡུ་རོབ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དུ་གསུང་བཤད་གནང་རྒྱུ་དང། གསར་འགོད་པ། དེ་བཞིན་གནད་ཡོད་མི་སྣ་དང་ཉམས་ཞིབ་པ་རྒན་གྲས་ཁག་གཅིག་དང་ཡང་མཇལ་འཕྲད་གནང་རྒྱུ་ཡིན་འདུག གཞན་ཡང་བཀའ་ཁྲི་མཆོག་གིས་ས་གནས་བོད་རིགས་ཚོ་དང་བྷེ་ནི་ལཀ་སི་རྒྱབ་སྐྱོར་ཚོགས་ (Benelux Support Group) པའི་ཚོགས་མི་རྣམས་ལ་བཙན་བྱོལ་བོད་མིའི་སྒྲིག་འཛུགས་ཀྱི་འཛིན་སྐྱོང་དང་འབྲེལ་བའི་ལས་རིམ་ཁག་ངོ་སྤྲོད་གནང་རྒྱུ་ཡིན་འདུག དེ་བཞིན་བྷར་སེལ་གསར་འགོད་མཐུན་ཚོགས་(Brussels Press Club)ཀྱིས་ཕྱི་ཚེས་ ༢༨ ཉིན་མགྲོན་འབོད་ཞུས་པ་ལྟར་བཀའ་ཁྲི་མཆོག་གིས་བོད་ནང་གི་ད་ལྟའི་གནས་སྟངས་དང་གསར་འགོད་པའི་དྲི་བར་ལན་འདེབས་གནང་རྒྱུ་ཡིན་འདུག་པ་བཅས།།