༢༠༡༡ ཟླ་ ༡༡ ཚེས་ ༡༨ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༡༨ ཉིན་སྔ་དྲོ་ནས་ཕྱི་ཟླ་ ༡༢ ཚེས་ ༥ སྔ་དྲོ་བར་དཔལ་ལྡན་བཀའ་བློན་ཁྲི་པ་བློ་བཟང་སེང་གེ་མཆོག་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག
དེ་ཡང་ཕྱི་ཟླ་ ༡༡ ཚེས་ ༡༨ ཉིན་བཀའ་ཁྲི་མཆོག་རྡ་ས་ནས་ཕེབས་ཐོན་གྱིས་ཕྱི་ཚེས་ ༡༩ ཉིན་ལྡི་ལིར་ཕེབས་རྗེས་མི་སྣ་ཁག་མཇལ་འཕྲད་དང་ཨེ་ཤི་ཡའི་གཞོན་སྐྱེས་འགོ་ཁྲིད་རྣམས་ཀྱི་ཚོགས་ཆེན་ནང་མཉམ་ཞུགས་གནང་རྒྱུ་ཡིན་པ་དང། ཕྱི་ཚེས་ ༢༠ ཉིན་ལྡི་ལི་བརྒྱུད་ཛུ་རིཀ་ཏུ་ཕེབས་འབྱོར་གནང་རྒྱུ། ཕྱི་ཟླ་ ༡༡ ཚེས་ ༢༡ ནས་ཕྱི་ཟླ་ ༡༢ ཚེས་ ༢ བར་སུད་སིས་གཙོས་ཡུ་རོབ་རྒྱལ་ཁབ་ཁག་བདུན་ཏེ་ཇར་མན། དབྱིན་ཡུལ། ནོར་ཝེ། ཌེན་མག བྷེལ་ཇམ། ཕ་རན་སི་བཅས་ཀྱི་ནང་ཕེབས་ཏེ་གྲོས་ཚོགས་ཀྱི་འཐུས་མི་དང། སྲིད་བྱུས་ཉམས་ཞིབ་པ། རོགས་ཚོགས་ཁག གསར་འགོད་པ་བཅས་མཇལ་འཕྲད་གནང་རྒྱུ་དང། དེ་བཞིན་བོད་རིགས་མང་ཚོགས་ལ་གསུང་བཤད་གནང་རྒྱུ་ཡིན་འདུག་པ་བཅས།།