༢༠༡༡ ཟླ་ ༡༡ ཚེས་ ༧ རེས་གཟའ་ཟླ་བ།
༄༅། འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༡ ཚེས་ ༥ ཉིན་ཐེ་ཝན་ནང་སྐབས་བཅུ་གཉིས་པའི་ཐའེ་ལུའུ་གྷེ་གྲོག་རོང་ས་རྒྱུད་ཀྱི་རྒྱང་རྒྱུག་འགྲན་བསྡུར་ནང་ལུས་རྩལ་ལ་དགའ་བའི་ཐེ་ཝན་མི་མང་གིས་གཙོས་ཕྱི་རྒྱལ་མི་རིགས་མཉམ་ཞུགས་ཀྱིས་ཐག་རིང་རྒྱུག་ཤར་འགྲན་ཚོགས་ཆེན་མོའི་ནང་ཐེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པའི་ཚོགས་མི་མི་གྲངས་བཅུ་ནས་མཉམ་ཞུགས་གནང་ཡོད། ཁོང་ཚོའི་ཁྲོད་ནས་སློབ་ཕྲུག་ཝང་གིས་སྟོད་གོས་སྟེང་བོད་ཀྱི་རྒྱལ་དར་སྦྱར་ནས་ལུས་རྩལ་འགྲན་བསྡུར་བ་གཞན་དང་མཉམ་དུ་རྒྱུག་ཤར་ཁོངས་ཞུགས་ཅིང་། རྒྱང་ཚད་སྤྱི་ལེ་ ༣༡ ཙམ་གྱི་མཚམས་སུ་སླེབས་སྐབས་ཁོང་གི་རྐང་ཚིགས་འཆུས་ཀྱང་། ཁོང་གིས་རང་ཉིད་ཀྱི་རྐང་པ་གཉིས་པོ་ལ་བརྟེན་ནས་གོམ་པ་སྤོས་ཏེ་རྒྱང་ཐག་ཆ་ཚང་སོང་ཡོད། ཁོང་གིས་དེ་ལྟར་སྡུག་རུས་བྱེད་དགོས་པའི་སྐོར་གསུང་དོན། འདི་ལོ་ཁོ་ནར་བོད་མི་བཅུས་རང་ལུས་མེར་སྲེག་བཏང་སྟེ་རྒྱ་གཞུང་ལ་ངོ་རྒོལ་བྱས་ཡོད་པ་བཞིན། བོད་མིས་མྱངས་པའི་དཀའ་སྡུག་དང་། ཁོང་ཚོས་མཐའ་གཅིག་ཏུ་འགོག་རྒོལ་བྱེད་པའི་དམ་བཅའ་དང་སྙིང་སྟོབས་ལ་བསྡུར་ན་ང་རང་ངལ་དུབ་ཅུང་ཙམ་མྱོང་བ་འདི་ནི་བརྗོད་རིན་མེད་པ་ཞིག་རེད། ཅེས་བརྗོད་སློབ་ཕྲུག་གཞན་རྣམས་ཀྱིས་རྒྱུག་ཤར་ཁོངས་སུ་རྣམ་པ་འདྲ་མིན་གྱི་ཁྱབ་བསྒྲགས་བྱས་ཡོད་པ་དང་།
ཕྲེད་དར་སྟེང་རྒྱ་ཡིག་དང་དབྱིན་ཡིག་ཐོག་༼ངའི་བོད་ཀྱི་གྲོགས་པོ་ཚོ་མེས་འཚིགས་སོང་སྐྱོབས་རོགས་གནང་༽སོགས་ཀྱི་འབོད་ཚིག་སྒྲོག་ཞིང་གཞུང་ལམ་ཐོག་ཉལ་བ་སོགས་བྱས་པར་ཐེ་ཝན་མི་མང་དང་ཕྱི་རྒྱལ་མི་རིགས་ཀྱིས་དོ་སྣང་དང་། ཁོང་ཚོར་སྐད་ཆ་སོགས་དྲིས་ཡོད་པས་བོད་དོན་དྲིལ་བསྒྲགས་ནུས་པ་ལྡན་པ་ཞིག་བྱུང་ཡོད། ཐེངས་འདིའི་ལས་འགུལ་ནི་ཐེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པས་ཐའེ་ལུའུ་གྷེ་གྲོག་རོང་ས་རྒྱུད་ཀྱི་རྒྱང་རྒྱུག་ནང་མཉམ་ཞུགས་གནང་བ་ཐེངས་གཉིས་པ་དེ་ཆགས་ཀྱི་ཡོད་པ་བཅས།།
