༢༠༡༡ ཟླ་ ༡༡  ཚེས་ ༡ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༢༡ ཉིན་ཇར་མན་གྲོས་ཚོགས་ནང་བོད་དོན་གླེང་མོལ་ཚོགས་ཆུང་གི་འགན་འཛིན་འཐུས་མི་གསུམ་སྟེ་ལྕམ་སྐུ་ས་བྷེན་ཝེ་སི་མཆོག་(Mrs.Sabine Weiss)དང་ལྕམ་སྐུ་ཧེ་རལ་ཌི་ལེབ་རེ་ཆི་ཌི་(Mrs. Herald- Leibrecht) མཆོག  ལྕམ་སྐུ་ས་བྷེན་བྷ་ཛིང་(Mrs. Sabine Batzing-Lichtenthaler)བཅས་ཀྱིས་ཇར་མན་གྱི་སྲིད་འཛིན་ལྕམ་སྐུ་ཨན་ཇེ་ལ་མར་ཀེལ་(Dr. Merkel)མཆོག་ལ་འབྱོར་ལྡན་རྒྱལ་ཁབ་ ༢༠ ཚོགས་ཆེན་ཐོག་བོད་དོན་གླེང་དགོས་པའི་འབོད་སྐུལ་གྱི་ཞུ་ཡིག་ནང་འཁོད་དོན། འབྱུང་འགྱུར་འབྱོར་ལྡན་རྒྱལ་ཁབ་ ༢༠ ཚོགས་ཆེན་དེ་བཞིན་ཕ་རན་སིའི་གྲོང་ཁྱེར་ཀེན་སིར་(Cannes)འཚོགས་རྒྱུ་ཡིན་པ་་དང་། སྐབས་དེར་ཇར་མན་སྲིད་འཛིན་མཆོག་གིས་བོད་ཀྱི་གནད་དོན་དང་འབྲེལ་ནས་རྒྱ་ནག་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཀྱི་སྲིད་བྱུས་དེ་འཕྲལ་དུ་མཚམས་འཇོག་དགོས་པ་དང། བོད་མི་ཚོའི་དོན་དམ་གྱི་མངོན་འདོད་རྣམས་དྲག་པོས་ཐོག་ནས་མིན་པར་གྲོས་མོལ་གྱི་ལམ་ནས་སེལ་དགོས་པའི་རེ་འདུན་འདོན་དགོས།
ད་ལྟ་བོད་ནང་གི་གནས་སྟངས་དེ་བཞིན་ཉེན་ཚབས་ཧ་ཅང་ཆེན་པོ་ཆགས་བཞིན་ཡོད། ཉེ་ལམ་བོད་ནང་བོད་མི་དགེ་འདུན་པ་དགུ་དང་བཙུན་མ་གཅིག་བཅས་ཀྱིས་རང་ལུས་མེར་སྲེག་བཏང་བའི་དོན་རྐྱེན་དེས་ད་ལྟའི་ཆར་བོད་ནང་གི་གནས་སྟངས་ཧ་ཅང་འཚབས་ཆེན་པོ་ཆགས་བཞིན་ཡོད། གནས་སྟངས་དེའི་འོག་རྒྱ་ནག་གཞུང་གིས་དྲག་ཆས་དམག་མི་ཕོན་ཆེ་ས་གནས་སུ་བཏང་སྟེ་ངོ་རྒོལ་བྱེད་མཁན་ཚོར་དྲག་གནོན་ཤུགས་ཆེ་བྱས་དང་བྱེད་མུས་ཡིན་པ་མ་ཟད། མི་འདོད་པའི་རྣམ་པ་ཕྲན་བུ་བཏོན་ནའང་འཕྲལ་དུ་དྲག་གནོན་འོག་འཛིན་བཟུང་བཀག་ཉར་དང་གཅར་རྡུང་གཏོང་བཞིན་ཡོད་ཅེས་སོགས་འཁོད་ཡོད་པ་མ་ཟད། གཞན་ཡང་ཞུ་སྙན་དེའི་ནང་ད་ལྟ་རྒྱ་ནག་གཞུང་གིས་བོད་ནང་འཛིན་བཞིན་པའི་དམ་བསྒྲགས་ཆེ་བའི་སྲིད་བྱུས་དེའི་འོག་བོད་ནང་གི་དགེ་འདུན་པ་དང་བཙུན་མ་སོགས་ལ་དཀའ་ངལ་ཆེ་ཤོས་འཕྲད་བཞིན་ཡོད་པ་དང།  རྒྱ་ནག་གཞུང་གིས་འཛིན་བཟུང་བཀག་ཉར་བྱས་པའི་བོད་མི་རྣམས་ད་ལྟ་ས་གནས་གང་དུ་ཡོད་མེད་སོགས་ཀྱི་གནས་སྟངས་སྐོར་ཁོང་ཚོའི་ནང་མི་སྤུན་མཆེད་སོགས་ལ་གསལ་བཤད་གང་ཡང་བྱས་མེད་པ་དང། བོད་མི་རྣམས་ད་ཆ་བོད་པའི་ཆོས་དང་རིག་གཞུང་རྩ་མེད་བཟོ་རྒྱུའི་སྲིད་བྱུས་འོག་དཀའ་ངལ་ཤུགས་ཆེ་འཕྲད་བཞིན་ཡོད་སྐོར་སོགས་འཁོད་ཡོད། ཕྱོགས་མཚུངས་ཞུ་སྙན་དེའི་ནང་སྲིད་འཛིན་ལྕམ་སྐུ་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཇལ་འཕྲད་གནང་བར་བསྔགས་བརྗོད་གནང་བ་དང་སྦྲགས། ད་ཆ་བོད་མི་ཚོར་ཆབ་སྲིད་ཀྱི་རྒྱབ་སྐྱོར་དགོས་པ་དང་ལྷག་པར་ཡུ་རོབ་རྒྱལ་ཁབ་ཀྱི་རྒྱབ་སྐྱོར་དེ་བས་དགོས་ངེས་ཤིག་ཆགས་ཡོད་སྐོར་འཁོད་ཡོད།
དེ་བཞིན་ཞུ་སྙན་དེའི་ནང་འཁོད་དོན། འགྲོ་བ་མིའི་ཐོབ་ཐང་དེ་ཚོང་གི་ཁེ་ཕན་དང་བརྗེས་པ་ལྟ་བུའི་མཐོང་སྣང་ང་ཚོས་ནམ་ཡང་བསྐྲུན་རྒྱུ་མེད་ཅེས་སོགས་འཁོད་ཡོད། གོང་བརྗོད་གྲོས་ཚོགས་འཐུས་མི་གསུམ་ནས་ལྕམ་སྐུ་ས་བྷེན་ཝེ་སི་མཆོག་དང་ལྕམ་སྐུ་ཧེ་རལ་ཌི་ལེབ་རེ་ཆི་ཌི་མཆོག་རྣམ་གཉིས་ད་ལྟ་གཞུང་འཛིན་ཚོགས་པའི་འཐུས་མི་ཡིན་འདུག་པ་བཅས།།