༢༠༡༡ ཟླ་ ༡༠ ཚེས་ ༡༧ རེས་གཟའ་ཟླ་བ།
༄༅།  འདི་གར་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་ཕྱི་ལོ་ ༢༠༡༡ ཟླ་ ༡༠ ཚེས་ ༡༦ ཉིན་བཏང་གནས་ནང་འཁོད་དོན། བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་མི་རི་ཀའི་གྲོས་ཚོགས་ཀྱི་གསེར་གྱི་གཟེངས་རྟགས་ཕུལ་ནས་ལོ་བཞི་འཁོར་བའི་དགའ་སྟོན་གྱི་མཛད་སྒོ་དེ་བཞིན་ ༢༠༡༡ ཕྱི་ཟླ་ ༡༠ ཚེས་ ༡༥ ཉིན་ཨ་རིའི་གྲོང་ཁྱེར་ནིའུ་ཡོཀ་གི་ཡི་ཤུ་ལྷ་ཁང་ཞིག་ནང་ཚོགས་ཤིང་།  སྐུ་མགྲོན་གཙོ་བོ་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་མཛད་སྒོའི་ཐོག་གསུང་བཤད་གནང་སྐབས་༸གོང་ས་མཆོག་ལ་རྒྱལ་སྤྱིའི་སྤྱི་ཚོགས་ནས་ཆེ་བསྟོད་ཞུས་ཏེ་མཚན་སྙན་ཆེ་བའི་གཟེངས་རྟགས་སྣ་ཚོགས་ཕུལ་དགོས་པའི་རྒྱུ་མཚན་གང་ཡིན་པའི་སྐོར་དང་། ༸གོང་ས་མཆོག་ས་ཕྱོགས་གང་དུ་ཆིབས་སྒྱུར་བསྐྱངས་ནའང་མགོན་པོ་གང་ཉིད་མཆོག་གི་མཛད་ཁུར་གཙོ་བོ་གསུམ་ཡོད་པ་མུ་མཐུད་རྒྱུན་འཁྱོངས་མཛད་བཞིན་ཡོད་པ་རྣམས་ནི་མི་རིགས་དང་།  ཆོས་ལུགས།  ཤ་མདོག་གི་དབྱེ་བ་མེད་པར་འཛམ་གླིང་གི་མི་ཚང་མས་དགའ་མོས་ཆེན་པོས་ཨ་རི་ལྟ་བུར་མཚོན་ན།  ཆིབས་སྒྱུར་གདན་འདྲེན་ཞུ་མཁན་མང་དྲགས་པའི་རྐྱེན་གྱིས་ཚང་མར་ཆིབས་སྒྱུར་བསྐྱངས་ཐུབ་ཀྱི་མེད་པའི་གནས་སྟངས་ཤིག་ཆགས་ཡོད་པའི་སྐོར་ངོ་སྤྲོད་གནང་།
ཡང་ཁོང་གིས་རྔ་པ་ཁུལ་དང་།  རྟའུ་ཉ་མཚོ་དགོན་པའི་གཞོན་སྐྱེས་ཚོས་གཅིག་རྗེས་གཉིས་མཐུད་ངང་རང་སྲོག་དོར་བའི་ལམ་ནས་རྒྱ་ནག་གཞུང་ལ་ངོ་རྒོལ་གནང་དང་གནང་བཞིན་ཡོད་པ་འདི་ཚོའི་ཐོག་ནས་བོད་མི་ཡོངས་ནས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་འདོད་པ་མེད་པ་གསལ་པོར་མཚོན་པ་ཞིག་ཡིན་པའི་སྐོར། བོད་ནང་གི་ཛ་དྲག་གནས་སྟངས་ལ་སེམས་འཚབ་མི་བྱེད་མཁན་བོད་མི་སུ་ཞིག་མེད་ཀྱང་།  སེམས་འཚབ་ཡོད་པ་དེ་སེམས་ནང་ཉར་ནས་མ་བསྡད་པར་ཕྱི་ལ་བཏོན་ཏེ་རྒྱལ་སྤྱིའི་ཐོག་ནས་ཤེས་པ་བཟོ་རྒྱུ་དེ་ཧ་ཅང་གལ་ཆེ་ཡིན་པར་བརྟེན་བོད་རིགས་སྤྱི་མཐུན་ཚོགས་པ་དང་།  གཞོན་ནུ་ཚོགས་པ།  བུད་མེད་ཚོགས་པ་བཅས་གཞུང་འབྲེལ་མ་ཡིན་པའི་ཚོགས་པ་ཁག་གིས་ཕྱི་ཟླ་ ༡༠ ཚེས་ ༢༤ སྟེ། འཛམ་གླིང་མཉམ་འབྲེལ་རྒྱལ་ཚོགས་དབུ་བརྙེས་ནས་ལོ་ ༦༠ འཁོར་བའི་དུས་ཚོད་དང་བསྟུན་ནས་མཉམ་འབྲེལ་རྒྱལ་ཚོགས་ཀྱི་མདུན་དུ་མར་མེའི་ཁྲོམ་སྐོར་གྱི་ལས་འགུལ་ཞིག་སྤེལ་རྒྱུའི་འཆར་གཞི་སྒྲིག་བཞིན་པ་ལྟར་མང་ཚོགས་གང་མང་མཉམ་ཞུགས་གནང་དགོས་པའི་གལ་ཆེའི་འབོད་སྐུལ་ཡང་གནང་ཡོད།
དེ་ནས་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་བརྟན་ལྷ་རྒྱལ་ལགས་ནས་དེ་རིང་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ཕུལ་བའི་དགའ་སྟོན་གྱི་ཉིན་མོ་འདིར་ང་ཚོ་ཚང་མས་མགོན་པོ་གང་ཉིད་ཀྱི་བཀའ་དྲིན་དྲན་པའི་ཐོག་ནས་སྔར་ལས་ལྷག་པའི་འབད་བརྩོན་གནང་དགོས་པ་དང་།  དེང་སང་བོད་ནང་གི་གཞོན་སྐྱེས་ཚོས་གཅེས་པའི་ལུས་སྲོག་གི་འགྲོ་གྲོན་བཏང་སྟེ། རྒྱ་གུང་ཁྲན་ཏང་གིས་བོད་མིར་གདུག་རྩུབ་ཀྱི་སྲིད་བྱུས་ལག་ལེན་བསྟར་བཞིན་པར་ངོ་རྒོལ་གྱི་ལས་འགུལ་སྤེལ་ནས་གནས་སྟངས་ཤིན་ཏུ་ཛ་དྲག་ཆེན་པོ་ཆགས་ཡོད་པའི་དུས་འདིར་ཨ་རིར་སྡོད་མཁན་བོད་མི་ཚོས་སོ་སོའི་དུས་ཚོད་ནས་ཕྲན་བུ་ཞིག་ཟུར་བཅད་ཀྱིས་བོད་སྤྱི་པའི་དོན་དུ་གཏོང་ཐུབ་པ་དགོས་པའི་འབོད་སྐུལ་ནན་པོ་གནང་འདུག  ༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་ནས་ལོ་བཞི་འཁོར་བའི་དགའ་སྟོན་གྱི་མཛད་སྒོ་དེ་ནི་ནིའུ་ཡོཀ་དང་།  ནིའུ་འཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ནས་གོ་སྒྲིག་གནང་ཞིང་། སྐུ་ཚབ་དོན་གཅོད་མཆོག་དང་།  དོན་གཅོད་ཁང་གི་ལས་བྱེད། བོད་ཀྱི་ཐེབས་རྩའི་འགན་འཛིན།  ནིའུ་ཡོཀ་གྲོང་ཁྱེར་ནང་ཡོད་པའི་གཞུང་འབྲེལ་མ་ཡིན་པའི་ཚོགས་པ་ཁག་དང་།  སྐྱིད་སྡུག་ཁག་གི་རྒྱུན་ལས་བཅས་ཁྱོན་སེར་སྐྱ་མང་ཚོགས་ ༨༠༠ ཙམ་དགའ་སྟོན་མཛད་སྒོར་མཉམ་ཞུགས་གནང་ཡོད།