༢༠༡༡ ཟླ་ ༡༠ ཚེས་ ༢༧ རེས་གཟའ་ཕུར་བུ།
༄༅། །འདི་གར་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས་ཕྱི་ལོ་ ༢༠༡༡ ཟླ་ ༡༠ ཚེས་ ༢༤ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༡༩ ཉིན་བོད་ཀྱི་རྒྱལ་ས་ལྷ་སར་སྡེ་དགེ་རྫོགས་ཆེན་སྟོབས་ལྡན་ལགས་འཛིན་བཟུང་བྱས་འདུག ཁོང་ནི་བཀའ་བློན་ཁྲི་ཟུར་སྐུ་གཤེགས་འཇུ་ཆེན་ཐུབ་བསྟན་རྣམ་རྒྱལ་མཆོག་གི་ཚ་བོ་ཡིན་པ་དང། ལྷ་སར་གནས་སྡོད་སྐུ་གཤེགས་དམ་པ་དེའི་སྤུན་ཉེ་སྡེ་དགེ་རྫོགས་ཆེན་པ་ཁག་གཅིག་དང། ཕ་ཡུལ་གཅིག་པ་བཅས་མི་གྲངས་བཅུ་ཕྲག་གཉིས་མ་ཟིན་ཙམ་གྱིས་བཀའ་བློན་ཁྲི་ཟུར་མཆོག་སྐུ་གཤེགས་ནས་དགུང་ཞག་ཞེ་དགུ་ཚང་བའི་ཉིན་མོ་དང་བསྟུན་ཕྱི་ཚེས་ ༡༩ ཉིན་ལྷ་ལྡན་གཙུག་ལག་ཁང་དུ་མཆོད་འབུལ་སྨོན་ལམ་ཞིག་གྲ་སྒྲིག་བྱས་ཏེ་འགོ་བཙུགས་མ་ཐག་ཉེན་རྟོག་པ་ཡོང་ནས་བཀག་སྡོམ་བྱས་པ་དང། རྫོགས་ཆེན་སྟོབས་ལྡན་ལགས་གོ་སྒྲིག་འགོ་གཙོ་ཡིན་གནས་ཀྱིས་འཛིན་བཟུང་བྱས་ཏེ་ད་བར་གང་དུ་ཁྲིད་མིན་ཤེས་རྟོགས་བྱུང་མི་འདུག བོད་ནང་རྒྱ་དམར་གྱི་དམ་བསྒྲགས་འོག་ནང་མི་གཉེན་ཉེ་འདས་གྲོངས་སུ་གྱུར་ནའང་བསྔོ་སྨོན་མཆོད་འབུལ་གྱི་འདུ་ཚོགས་ཙམ་ཡང་ཆོག་གི་མེད་པ་བཅས།།