༢༠༡༡ ཟླ་ ༡༠ ཚེས་ ༧ རེས་གཟའ་པ་སངས།
༄༅། །བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༡ ཟླ་ ༡༠ ཚེས་ ༧ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༧ ཉིན་བོད་ནང་གི་སྔ་དྲོའི་ཆུ་ཚོད་ ༡༡།༣༠ ཐོག་རྔ་པ་རྫོང་མཐའ་བ་གོང་མའི་འཇུག་རིས་ཚང་གི་བུ་ཆོས་འཕེལ། རང་ལོ་ ༡༩ ཡིན་པ་ཁོང་དང་། མཐའ་བ་གོང་མའི་གསོང་པོ་ཚང་གི་སྐལ་བཟང་གི་བུ་མཁའ་དབྱངས་༼ཁག་གཅིག་གིས་བཤད་ན་ཁོང་གི་མིང་ལ་ལྷུང་ཡངས་རེད་ཟེར་གྱིན་འདུག༽ རང་ལོ་ ༡༨ ཡས་མས་ཤིག་ཡིན་པ་ཁོང་གཉིས་རྔ་པ་རྫོང་གི་ཁྲོམ་གཞུང་དུ་ཐོན་ནས་རང་ལུས་ལ་མེ་སྤར་ཞིང་ལག་ཟུང་ཐལ་མོ་སྦྱར་ཏེ་རྒྱ་ནག་གཞུང་ལ་ངོ་རྒོལ་སྐད་འབོད་གནང་ཡོད་འདུག་ལ། སྐབས་དེར་ཉེན་རྟོག་པ་སོགས་ཀྱིས་ཁོང་གཉིས་ཀྱི་ལུས་ཀྱི་མེ་བསད་ཅིང་གཅར་རྡུང་གཏོང་བཞིན་ས་གནས་རྫོང་མི་མང་སྨན་ཁང་དུ་ཁྱེར་ཡོད་པ་དང་། ཉེན་རྟོག་པ་རྣམས་ཀྱིས་ཡར་སྨན་ཁང་ནང་ལ་ཁྲིད་ནས་འགྲོ་སྐབས་མཁའ་དབྱངས་ཀྱིས་ཁུ་ཚུར་གནམ་ལ་འཕྱར་ནས་འབོད་སྒྲ་སྒྲོག་ཡོད་ཀྱང་འབོད་ཚིག་གསལ་པོ་གོ་མི་འདུག འཇུག་རིས་ཚང་གི་བུ་ཆོས་འཕེལ་དངོས་སུ་མཐོང་མཁན་མང་པོས་ཞིག་གིས་གསུངས་པ༌ལྟར་ན་བོད་ནང་གི་ཆུ་ཚོད་ ༡༢ ཡས་མས་སུ་གྲོངས་ཚར་ཡོད་པའི་གནས་ཚུལ་འབྱོར་ཡོད་ཅིང་། ཁོང་གཉིས་ཀ་དེ་སྔོན་རྔ་པ་ཀིརྟི་དགོན་པའི་དགེ་འདུན་པ་ཡིན་ཞིང་རྗེས་སུ་སྐྱ་སར་བབ་ཡོད་འདུག སྐལ་བཟང་གི་བུ་མཁའ་དབྱངས་ནི་ཕྱི་ལོ་ ༢༠༠༨ ལོར་རྒྱ་ནག་གཞུང་གིས་དམར་གསོད་བཏང་བའི་མཐའ་བ་གོང་མའི་རྩེ་ཕྲུག་ཚང་གི་རྒྱལ་གཅེས་དཔའ་བོ་བཀྲ་ཤིས་ཀྱི་ཚ་བོ་ཡིན་འདུག དེང་སྐབས་རྔ་པ་རྫོང་ལ་དམ་བསྒྲགས་ཤུགས་ཆེ་ཡོད་མུས་ཐོག་སྔར་བས་དམ་བསྒྲགས་ཤུགས་ཆེ་རུ་བཏང་ཡོད་པ་དང་། དམག་མི་གང་སར་འགྲེམས་འཇོག་བྱས་ཡོད་འདུག མི་མང་རྣམས་སྐྱོ་གདུང་དྲག་པོས་གཟིར་ཞིང་ཚོར་བ་རབ་ཏུ་འབར་གྱིན་ཡོད་པས་ཆེས་ཛ་དྲག་དང་ཉེན་ཁ་ཆེན་པོ་ཞིག་ལ་འཕྲད་བཞིན་ཡོད་འདུག་པ་བཅས། །