༢༠༡༡ ཟླ་ ༡༠ ཚེས་ ༡༧ རེས་གཟའ་ཟླ་བ།
༄༅། །འདི་གར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༡༥ ཉིན་གྱི་བོད་ནང་གི་སྔ་དྲོའི་དུས་ཚོད་ ༡༡།༥༠ ཙམ་ལ་རྔ་པ་རྫོང་ཆོས་རྗེ་ཞང་སོ་རུ་མའི་པདྨ་ཚང་གི་བུ་ནོར་བུ་དགྲ་འདུལ། རང་ལོ་ ༡༩ ཙམ་ཡིན་པ་ཁོང་གིས་རྔ་པའི་ཁྲོམ་གཞུང་དུ་ཐོན་ནས་རང་ལུས་མེར་སྲེག་བཏང་ཞིང་བོད་ཁ་བ་ཅན་ལ་རང་དབང་རང་བཙན་དགོས། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་ཞེས་ཞི་རྒོལ་སྐད་འབོད་བྱས་ཡོད་འདུག སྐབས་དེར་རྔ་པའི་ཁྲོམ་གཞུང་དུ་ཡོད་པའི་ཉེན་རྟོག་པ་རྣམས་ཀྱིས་ཆུ་དང་མེ་གསོད་ཡོ་ཆས་ཀྱིས་ཁོང་གི་ལུས་ཀྱི་མེ་བསད་ཅིང་། གཅར་རྡུང་བཏང་ཡོད་ལ། ཉེན་རྟོག་པའི་རླངས་འཁོར་ཆུང་ཆུང་ཞིག་གི་ནང་དུ་བཞག་ནས་འཁྱེར་ཡོད་འདུག་མོད། ས་གནས་ཡུལ་མི་རྣམས་ཀྱིས་གང་དུ་འཁྱེར་ཡོད་མེད་སོགས་ཤེས་རྟོགས་ཐུབ་མེད། གནས་ཚུལ་འགྲེལ་བརྗོད་གནང་མཁན་གྱིས་བཤད་ན་ཁོང་གི་གཟུགས་པོ་མེས་ཚིག་པ་ཚབས་ཆེན་ཡིན་ཡང་སྐབས་དེ་རང་ལ་གྲོངས་མེད་པ་གསལ་པོ་ཡིན་འདུག ཁོང་ཆུང་ཆུང་སྐབས་རྔ་པ་ཀིརྟི་དགོན་པར་ཆོས་ཞུགས་བྱས་ཤིང་། ཕྱི་ལོ་ ༢༠༡༠ ལོའི་ཟླ་ ༦ ཡས་མས་ཤིག་ལ་སྐྱ་བབས་ནས་དེང་སྐབས་ཕ་མའི་རྩར་བསྡད་ཡོད་འདུག
གོང་གསལ་གནས་ཚུལ་དེའི་སྐོར་དངོས་སུ་མཐོང་མཁན་ཞིག་གིས་བརྗོད་པ་ཇི་བཞིན་ཡིག་ཐོག་ལ་བཀོད་པ་གཤམ་གསལ་ལྟར་ཡིན། སྔ་དྲོའི་དུས་ཚོད་ ༡༡།༥༠ ཡས་མས་སུ་ང་ཁྲོམ་གྱི་གཞུང་ལམ་ཟུར་ཞིག་ལ་ཡོད། སྐབས་དེར་ཁྲོམ་ལ་མི་མང་པོ་འདུག དང་པོ་ངས་ཤེས་དུས་བོད་ཁ་བ་ཅན་ལ་རང་དབང་རང་བཙན་དགོས། རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་ཞེས་སྐད་ཤུགས་ཆེན་པོས་ཁ་འབོད་བྱེད་བཞིན་པའི་སྒྲ་དེ་རྒྱབ་ཕྱོགས་ནས་གོ་བྱུང་། སྐབས་དེར་མར་བལྟས་དུས་མི་ཞིག་གིས་རང་ལུས་མེར་སྒྲོན་ནས་ཡར་ང་ཚོའི་ཕྱོགས་སུ་ རྒྱུགས་ཡོང་གི་འདུག མཐོང་མ་ཐག་ང་རང་ཧ་ཅང་སྐྲག་སྣང་སྐྱེས་བྱུང་། ཕར་བལྟས་ཚོད་ལ་དུས་ཚོད་གང་མཚམས་འགོར་ཡོད་པའི་སྣང་བ་བྱུང་བས་འགོ་གང་ཞིག་ནས་བཙུགས་པ་ངས་མ་ཤེས། ཁོང་གི་མགོའི་སྐྲ་དང་རྒྱབ་ཀྱི་སྟོད་གོས་སོགས་མེས་ཚིག་ནས་ས་ལ་འཐོར་ཡོང་གི་འདུག སྐྲ་རིང་པོ་ཅན་ཞིག་དང་། དོར་མ་ལོ་དུང་སྔོ་སྐྱ་ཞིག་གྱོན་འདུག་པ་གསལ་པོ་ཤེས་སོང་། དེ་ནས་གཡས་གཡོན་ནས་ཉེན་རྟོག་པ་རྣམས་ཀྱིས་དང་པོ་ཆུས་བརྒྱབ་ཀྱང་མེ་མ་སོད་པར་མ་ཟད། ཁོང་ས་ལའང་མ་འགྱེལ་བར་མུ་མཐུད་ཁ་འབོད་བྱེད་བཞིན་མདུན་དུ་ཡོང་གི་འདུག་པས། རྡོག་ཐོ་བརྒྱབ་ན་ཡང་ས་ལ་མ་འགྱེལ། དེ་ནས་མེ་གསོད་ཡོ་ཆས་ལག་ཏུ་ཡོད་པའི་ཉེན་རྟོག་པ་གཉིས་གསུམ་ཞིག་མདུན་དུ་ཐོན་སོང་ལ་ཁོ་པ་ཚོས་མེ་གསོད་ཡོ་ཆས་བརྒྱབ་ནས་ས་ལ་འགྱེལ་བཅུག་པ་དང་། མེ་བསད་ནས་དེ་མ་ཐག་ཉེ་ཁྲིས་སུ་ཉེན་རྟོག་པའི་རླངས་འཁོར་ཆུང་ཆུང་སྒམ་ཤིང་ཅན་ཞིག་འདུག་པ་དེའི་ནང་དུ་བཞག་ནས་ཡར་ཁྱེར་སོང་། ཕལ་ཆེར་རླངས་འཁོར་གྱི་ཁ་ཡར་འཁོར་འདུག་པས་ཡིན་པ་འདྲ་སྟེ། སྐོར་ར་བྱས་ནས་ཁྲོམ་ལམ་གཞན་ཞིག་ནས་མར་སྨན་ཁང་གི་ཕྱོགས་སུ་ཁྱེར་སོང་སྙམ་པ་བྱུང་ཡང་། ངས་མཐའ་མ་རིག་ས་དང་སྨན་ཁང་ལ་བར་ཐག་ཅུང་ཙམ་ཡོད་པས་སྨན་ཁང་དུ་ཁྱེར་སོང་ཟེར་ནས་བཤད་མི་ཐུབ། མི་དེ་སྐྲ་རིང་པོ་ཅན་གྱི་མི་སྐྱ་ཞིག་ཡིན་པ་ཐག་བཅད་ནས་བཤད་ཐུབ། གཞན་ངོ་ཤེས་ཤིག་ཡིན་མིན་ཙམ་ཡང་ཤེས་རྟོག་མ་བྱུང་། གཙོ་བོ་ང་རང་འཚབ་འཚོབ་ངང་ནས་སྙམ་འཇོག་མ་ཐུབ་པ་ཡང་ཡིན་མོད། ཁོང་གི་གདོང་དབྱིབས་མེས་བཏུམ་ནས་གསལ་པོ་རིག་མ་སོང་སྙམ་པ་ད་ལྟ་འདང་བརྒྱབ་ན་དྲན་གི། ང་ཁོང་གི་ཐག་ཉེ་སར་ཡོད་མོད། མི་དེའི་གདོང་དབྱིབས་ངའི་དྲན་ཡུལ་དུ་མི་གསལ། ཁོང་ཉེན་རྟོག་པས་ས་ལ་རྫོགས་པ་དང་མཉམ་དུ་མི་མང་པོས་སྐོར་སོང་ལ་ང་ཡང་ལྟ་རུ་སོང་བ་ཡིན། འོན་ཀྱང་སྐར་མ་གསུམ་བཞི་ཞིག་གི་ནང་ལ་ཉེན་རྟོག་པས་ཁྱེར་སོང་། སྐབས་དེར་ཉེན་རྟོག་པ་དང་དམག་མི་བཅས་མང་པོ་སླེབས་འདུག བོད་མི་ཡང་མང་པོ་འདུག་མོད། ཁོང་ཚོས་གང་མགྱོགས་ལྕགས་དབྱུག་འཕྱར་ཞིང་། མེ་མདའ་ཚད་ནས་མི་མང་ཁ་གཏོར་བཏང་སོང་ལ། སྐབས་དེར་ཉེན་རྟོག་པ་དང་དམག་མི་ཧ་ཅང་མང་པོ་ཁྲོམ་ཡོངས་ལ་འགྲེམས་འཇོག་བྱས་ཚར་འདུག བོད་མི་རྣམས་ཀྱིས་བཤད་དོན་རྫོང་མཁར་ཕྱི་ནང་གི་འགྲུལ་བཞུད་མཚམས་བཅད་འདུག་ཅེས་གསུངས་པ་བཅས།།