༢༠༡༡ ཟླ་ ༡༠ ཚེས་ ༡༢ རེས་གཟའ་ལྷག་པ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༡ ཟླ་ ༡༠ ཚེས་ ༡༡ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༧ ཉིན་བོད་ནང་གི་ཕྱེད་ཡོལ་ཆུ་ཚོད་ ༢ ཙམ་ལ་རང་ལུས་མེར་སྲེག་བཏང་ནས་རྒྱ་གཞུང་ལ་ངོ་རྒོལ་གནང་མཁན་རང་ལོ་ ༡༩ སོན་པའི་རྒྱལ་གཅེས་དཔའ་བོ་ཆོས་འཕེལ་ལགས་ཕྱི་ཟླ་ ༡༠ ཚེས་ ༡༡ ཉིན་འབར་ཁམས་སུ་ཡོད་པའི་རྔ་པ་ཁུལ་གྱི་སྨན་ཁང་ནང་གཟི་བརྗིད་ལྡན་པའི་ངང་སྐུ་ ཚེ་མ་ཟིན་པའི་ཡིད་སྐྱོའི་གནས་ཚུལ་བྱུང་ཐོན་འདུག སྔར་བཞིན་འབྲེལ་ཡོད་ཚོས་དམ་ པ་ཁོང་གི་སྐུ་ཕུང་ནང་མིར་སྤྲོད་དགོས་པའི་རེ་འདུན་ བཏོན་འདུག་ཀྱང་ད་བར་སྤྲད་མི་འདུག མཁའ་དབྱིངས་ལགས་ཀྱི་ནང་མི་ལ་བཤད་པ་ལྟར་ན་དགེ་འདུན་པ་ལྔ་ལས་མང་བ་དུས་གཅིག་ལ་ གདན་འདྲེན་ཞུ་མི་ཆོག་པ་དང༌། རྔ་པ་མི་མང་སེམས་གསོ་བྱེད་པར་གཏོང་གི་མེད་པ་སོགས་སྔར་ལས་ལྷག་པའི་དམ་བསྒྲགས་ ཤུགས་ཆེ་བྱེད་མུས་ཡིན་འདུག
ཕྱི་ཚེས་ ༡༡ ཉིན་བོད་ཚེས་ ༡༥ ཡིན་སྟབས་རྔ་པ་སྟོད་སྨད་བར་གསུམ་གྱི་སྐྱ་སེར་ཕོ་མོ་དབྱེར་མེད་ཀྱིས་འཆར་ཅན་ གྱི་ལས་ཀ་ཡོངས་རྫོགས་མཚམས་འཇོག་བྱས་ཏེ་སྤྱིར་འདས་གྲོངས་སུ་གྱུར་བ་རྣམས་དང་ ཡང་སྒོས་དཀའ་སྡུག་མནར་གཅོད་མྱོང་བཞིན་པའི་རྒྱལ་གཅེས་དཔའ་བོ་རྣམས་ཀྱི་ཆེད་ དུ་ཀིརྟི་དགོན་པ་གཙོ་བོར་གྱུར་བའི་དགོན་པ་ཁག་ལ་བསྔོ་རྟེན་དང་མཆོད་མེ་ཕུལ་བ། དེ་བཞིན་ཕྱག་སྐོར་སོགས་ཀྱི་ལས་ལ་ཞུགས་ཏེ་གདུང་སེམས་མཉམ་སྐྱེ་དང་སྐྱིད་སྡུག་ མཉམ་མྱོང་གི་རྣམ་འགྱུར་ཤུགས་ཆེ་བསྟན་ཡོད་འདུག་པ་བཅས། །
