༢༠༡༡ ཟླ་ ༡༠ ཚེས་ ༡༡ རེས་གཟའ་མིག་དམར།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༡ ཟླ་ ༡༠ ཚེས་ ༡༠ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༨ ཉིན་བོད་ནང་གི་ཕྱེད་ཡོལ་ཆུ་ཚོད་དང་པོ་ཡོལ་ཙམ་ལ་རང་ལུས་མེར་སྲེག་བཏང་ནས་རྒྱ་ནང་གཞུང་ལ་ངོ་རྒོལ་གནང་མཁན་གྱི་རྒྱལ་གཅེས་དཔའ་བོ་མཁའ་དབྱིངས་ལགས་རྔ་པ་ཁུལ་གྱི་ལྟེ་གནས་འབར་ཁམས་སུ་གཟི་བརྗིད་ལྡན་པའི་ངང་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་ཡོད་ཅིང་། འབྲེལ་ཡོད་མི་མང་གིས་དམ་པ་ཁོང་གི་སྐུ་ཕུང་ནང་མིར་རྩིས་སྤྲོད་བྱེད་དགོས་ཚུལ་གྱི་རེ་འདུན་ཤུགས་ཆེ་བཏོན་ཡང་རྒྱ་གཞུང་གིས་ཉན་འཇོག་རྩ་བ་ནས་མ་བྱས་པར་ཉིན་དེ་རང་ལ་འབར་ཁམས་སུ་ཁོང་གི་སྐུ་ཕུང་མེར་སྲེག་བཏང་ནས་རུས་ཐལ་ཞིག་ནང་མིར་སྤྲད་ཡོད་འདུག
གོང་གསལ་རང་ལུས་མེར་སྲེག་གིས་ངོ་རྒོལ་དོན་རྐྱེན་དེའི་སྐོར་རྒྱ་ནག་གཞུང་འབྲེལ་གྱི་ཤིན་ཧྭ་དྲ་བའི་ཐོག་ཕྱི་ཚེས་ ༨ ཉིན་གནས་ཚུལ་བཀོད་པར་ཁོང་གཉིས་ཀར་སྲོག་གི་ཉེན་ཁ་མེད་པར་མ་ཟད། རྨས་སྐྱོན་ཚབས་ཆེ་མེད་ཚུལ་ཡང་བཤད་ཡོད་འདུག
རྔ་པ་མི་མང་གིས་ཕྱི་ཚེས་ ༨ དང་ཚེས་ ༩ ཚེས་ ༡༠ བཅས་ཉིན་གསུམ་གྱི་རིང་རྔ་པ་རྫོང་ཁོངས་ཀྱི་བོད་ཀྱི་ཟ་ཁང་དང་ཚོང་ཁང་ཡོངས་རྫོགས་སྒོ་བརྒྱབ་ནས་ཉེ་ཆར་བྱུང་བའི་རང་ལུས་མེར་ སྲེག་གི་ལས་འགུལ་ཚང་མར་གདུང་སེམས་མཉམ་སྐྱེ་དང་རྒྱབ་སྐྱོར་གྱི་རྣམ་འགྱུར་ཤུགས་ཆེ་བསྟན་ཡོད་ཅིང་། ལྷག་པར་དུ་ཕྱི་ཚེས་ ༧ ཉིན་བྱུང་བའི་དོན་རྐྱེན་ཁྲོད་རྒྱལ་གཅེས་དཔའ་བོ་མཁའ་དབྱིངས་ལགས་འདས་གྲོངས་སུ་གྱུར་བར་བརྟེན། མི་མང་ཕལ་མོ་ཆེས་དགོན་པ་ཁག་ལ་བསྔོ་རྟེན་ཕུལ་བ་དང་། ཕྱག་སྐོར་མཆོད་འབུལ་བྱས་པ་སོགས་ཀྱིས་ཉིན་གསུམ་རིང་མྱ་ངན་དང་དགེ་སྒྲུབ་ཀྱིས་དུས་འདའ་བར་བྱས་ཡོད་ལ། ནང་མིས་དགེ་སྒྲུབ་བྱེད་བཞིན་ཡོད་ཀྱང་དགེ་འདུན་པ་ལྔ་ལས་མང་བ་ལྷན་ཅིག་ལ་གདན་འདྲེན་ཞུ་མི་ཆོག་ཚུལ་བརྗོད་ནས་རྒྱ་གཞུང་གི་འབྲེལ་ཡོད་མི་སྣ་བཅུ་གྲངས་ཤིག་གིས་གསོང་པོ་ཚང་སྲུང་བྱ་དམ་པོ་བྱས་འདུག དེ་སྔོན་རྒྱལ་གཅེས་དཔའ་བོ་ཕུན་ཚོགས་ལགས་སྐུ་གཤེགས་སྐབས་གདུང་སེམས་མཉམ་སྐྱེ་དང་མྱ་ངན་གུས་འདུད་ཞུས་པ་ལྟ་བུའི་རྣམ་འགྱུར་བསྟན་ན་རེ་རེ་བཞིན་འཛིན་བཟུང་བྱེད་ཀྱི་ཡིན་ཚུལ་བརྗོད་ནས་རྔ་པ་མི་མང་ཁོང་ཚང་ལ་སེམས་གསོ་བྱེད་པར་གཏོང་གི་མེད་པ་དང་། མཐའ་བ་གོང་མ་དམིགས་བསལ་གྱིས་དམ་བསྒྲགས་ཤུགས་ཆེན་པོ་བྱེད་མུས་ཡིན་འདུག
ཕྱི་ཚེས་ ༡༠ ཉིན་གྱི་སྔ་དྲོ་ཀིརྟི་དགོན་པའི་དགེ་འདུན་པ་རྣམས་མི་ཚང་དེར་ཆོས་སྦྱིན་ལ་ཕེབས་རྩིས་ཀྱིས་མཐའ་བ་གོང་མའི་སྡེ་འདབས་སུ་སླེབས་སྐབས། མཐའ་བ་གོང་མའི་སྡེ་མི་རྒན་པ་སྐོར་ཞིག་ཚུར་ ཡོང་ནས་དགེ་འདུན་པ་རྣམས་མ་ཕེབས་རོགས། གལ་སྲིད་ཕེབས་པ་ཡིན་ན་ཁོང་ཚང་ལ་དཀའ་ངལ་ཆེན་པོ་འཕྲད་རྒྱུ་ཡིན་ཚུལ་ཞུས་ཡོད་སྟབས། དགེ་འདུན་པ་རྣམས་ཕར་ཁོང་ཚང་ལ་མ་ཕེབས་པར་ས་གནས་དེ་ག་རང་ལ་བཞུགས་ནས་མ་ཎི་དང་བསྔོ་བ་སྨོན་ལམ་གསུངས་ནས་ཆོས་སྦྱིན་གནང་ཡོད་འདུག
རྔ་པ་ཀིརྟི་དགོན་པར་རྒྱ་གཞུང་གིས་བཙན་བཀའ་བཏང་དོན་དེ་སྔོན་རང་ལུས་མེར་སྲེག་གིས་ངོ་རྒོལ་གནང་མཁན་ཚང་མ་དགོན་པའི་སྐྱིད་སྡུག་ནས་གནས་དབྱུངས་གཏོང་དགོས་ཚུལ་བརྗོད་པར་དགོན་པ་གཞུང་སྒེར་གཉིས་ཀྱིས་ངོས་ལེན་རྩ་བ་ནས་མ་གནང་བར་མཐའ་གཅིག་ཏུ་ངོ་རྒོལ་བྱས་པར་བརྟེན་དོན་ འཁྱོལ་བྱུང་མེད་ནའང་། རྗེས་སུ་དེ་ལྟར་བྱུང་དུས་དགོན་པའི་སྐྱིད་སྡུག་ནས་གནས་དབྱུངས་གཏོང་དགོས་ཚུལ་གྱི་བཙན་བཀའ་བཏང་ཡོད་པར་མ་ཟད། དེ་དོན་གྱི་ཡི་གེའི་ཐོག་དགོན་པ་གཞུང་གི་ཐེལ་རྩེ་འགོད་དགོས་ཚུལ་ཡང་ཡང་ནན་བརྗོད་བྱེད་བཞིན་ཡོད་འདུག
རྒྱལ་གཅེས་དཔའ་བོ་ཆོས་འཕེལ་གྱིས་རང་ལུས་མེར་སྲེག་མ་བཏང་བའི་གོང་གི་ཉིན་ཤས་ནང་ཁོང་གིས་མི་མང་པོར་ད་ལྟའི་གནས་སྟངས་འདིས་ང་ཚོ་བཟོད་དཀའ་བའི་གནས་སུ་བརྫང་གི་ཡོད་ཚུལ་དང་། དགེ་འདུན་པ་རྣམས་ཀྱིས་བོད་སྤྱི་བའི་རྩ་དོན་ཆེད་རང་སྲོག་བློས་གཏོང་གནང་གི་ཡོད་ཚུལ་སོགས་ཡང་ཡང་གསུངས་ཡོད་འདུག དེ་བཞིན་ཁོང་གི་འཐབ་གྲོགས་མཁའ་དབྱིངས་ལགས་མ་གྲོངས་གོང་སྨན་ཁང་ནས་ངས་འདི་ལྟར་རང་སྲོག་བོད་དོན་ཆེད་གཏོང་ཐུབ་པ་དེས་རང་ཉིད་འདོད་པ་ཁེངས་པ་བྱུང་ཡོད་ཅིང་། འགྱོད་པ་རྩ་བ་ནས་མེད་པས་ཚང་མས་སེམས་སྡུག་མ་གནང་རོགས་ཞེས་ཁ་ཆེམས་ལྟ་བུའི་སྐད་ཆ་གསུངས་ ཡོད་པ་རྔ་པའི་མི་མང་ནང་ས་ཁྱབ་རྡོ་ཁྱབ་ཏུ་ཕྱིན་ཡོད་འདུག
དེ་མིན་འདི་ནས་ཡར་བརྩིས་པའི་ཉིན་ཤས་རིང་རྔ་པའི་རྫོང་མཁར་སོགས་ལ་ར་མའི་སྐེ་ལ་བོད་དོན་གྱི་ཡི་གེ་བཏགས་ནས་ཐེངས་མང་བཏང་ཡོད་པར། ཉེན་རྟོག་པ་རྣམས་ཀྱིས་ར་མ་ཡང་འཛིན་བཟུང་བྱེད་ཀྱིན་ཡོད་འདུག་པ་སོགས་དགོད་བྲོ་བའི་གཏམ་བརྒྱུད་མང་པོ་ཡོང་གི་ཡོད་འདུག
ཕྱི་ཟླ་ ༡༠ ཚེས་ ༣ ཉིན་རང་ལུས་མེར་སྲེག་གཏོང་མཁན་གྱི་རྒྱལ་གཅེས་དཔའ་བོ་སྐལ་བཟང་དབང་ཕྱུག་ལགས་རྔ་པ་རྫོང་མི་མང་སྨན་ཁང་དུ་ཡོད་ཀྱང་ད་ལྟ་ནས་ཉེན་རྟོག་པ་སོགས་ཀྱིས་དྲི་གཅོད་སྣ་ཚོགས་བྱས་ཏེ་གཅར་རྡུང་མནར་གཅོད་མི་སྤྱོད་ལས་འདས་པ་གཏོང་གི་ཡོད་འདུག་པ་བཅས། །
