༢༠༡༡ ཟླ་ ༡༠ ཚེས་ ༢༥ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༢༣ རེས་གཟའ་ཉི་མའི་ཉིན་སུད་སི་དང་ལེ་ཁེ་སི་ཊེན་ས་གནས་བོད་རིགས་ཐུན་མོང་ནས་སུད་སི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ལས་ཁུང་མདུན་དུ། ཉེ་ལམ་བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་བོད་ཀྱི་ཤར་ཕྱོགས་རྔ་པ་ས་ཁུལ་གྱིས་གཙོས་བོད་ནང་བོད་མི་དགུས་རང་ལུས་མེར་བསྲེགས་ཀྱི་ལམ་ནས་རྒྱ་ནག་གཞུང་ལ་ངོ་རྒོལ་བྱས་པ་དེར་གདུང་སེམས་མཉམ་སྐྱེ་མཚོན་ཆེད་ཞི་བའི་སྐད་འབོད་བྱས་ཡོད། སྐབས་དེར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་གི་གནས་སྟངས་ཐོག་འཛམ་གླིང་མཉམ་འབྲེལ་རྒྱལ་ཚོགས་ངོས་ནས་སེམས་འཚབ་ཡོད་པའི་བསྒྲགས་གཏམ་ཞིག་འཕྲལ་དུ་འདོན་དགོས་པ་མ་ཟད། བོད་མདོ་སྨད་རྔ་པ་ཀིརྟི་དགོན་པའི་གནས་སྟངས་ཇི་ཡིན་རྟོག་ཞིབ་ཆེད་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་རྟོག་ཞིབ་ཚོགས་ཆུང་གི་སྐུ་ཚབ་གཏོང་དགོས་པའི་རེ་འདུན་ཤུགས་ཆེ་བཏོན་པ་དང་སྦྲགས་གསུང་དོན།
གཞན་དོན་གྱི་ཆེད་དུ་རང་ལུས་མེར་སྲེག་བཏང་བ་དེ་ནི་འཚེ་བ་མེད་པའི་ལམ་ནས་བློས་གཏོང་ཆེ་ཤོས་ཤིག་ཡིན། རྒྱ་ནག་སྲིད་འཛིན་ཧུའུ་ཅིན་ཐའོས་འཆམ་མཐུན་གྱི་སྤྱི་ཚོགས་བསྐྲུན་དགོས་པ་བརྗོད་ཀྱི་ཡོད། འཆམ་མཐུན་སྤྱི་ཚོགས་དེ་དྲག་གནོན་བྱས་ནས་སྐྲུན་མི་ཐུབ། དེ་ནི་ཕན་ཚུན་གཅིག་གིས་གཅིག་ལ་ཡིད་ཆེས་ཐོག་གྲོས་མོལ་གྱི་ལམ་ནས་བསྐྲུན་དགོས་ཞེས་སོགས་ཀྱི་གསུང་བཤད་གནང། ཕྱོགས་མཚུངས་སྐབས་དེར་སུད་སི་བུད་མེད་རྩོམ་པ་པོ་ཞིག་གིས་ཕྱི་ལོ་ ༡༩༩༩ ལོར་ཁོ་མོ་རང་ཉིད་ལྷ་སར་འགྲོ་མྱོང་བར་བརྟེན་བོད་མི་ཚོར་རྒྱབ་སྐྱོར་གྱི་གསུང་བཤད་གནང་དོན། བོད་མི་ཚོས་སེམས་ཤུགས་ནམ་ཡང་ཆག་རྒྱུ་མེད། རྒྱ་ནག་གིས་བཙན་བཟུང་ལ་བོད་མི་ཚོས་གདོང་ལེན་བྱ་རྒྱུའི་ཆོས་སེམས་ཧ་ཅང་བརྟན་པོ་ཡོད་པ་ངས་དངོས་སུ་མཐོང་བྱུང། ད་ལྟའི་བོད་ནང་གི་དམ་བསྒྲགས་ཀྱི་སྲིད་བྱུས་དེར་ང་ཚོས་ངོས་ལེན་ནམ་ཡང་བྱ་ཐབས་མེད་ཅེས་གསུངས།
ཞི་བའི་གོམ་འགྲོས་ཐོག་གདུང་སེམས་མཉམ་སྐྱེའི་ལས་འགུལ་དེ་ལེཀ་ཇེ་ནི་ཝ་(Lake Geneva)ནས་འགོ་འཛུགས་ཀྱིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ལས་ཁུང་མདུན་བར་གནང་ཡོད་པ་མ་ཟད།
མཐར་ལས་འགུལ་བ་རྣམས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་ལྟེ་བར་འཛོམས་ཏེ་རྣམ་འགྱུར་འདྲ་མིན་ཐོག་ནས་བོད་མི་ཚོའི་དཀའ་ངལ་རྣམས་ར་སྤྲོད་གནང་ཐབས་བྱས་ཡོད། ལས་འགུལ་བ་རྣམས་སུད་སི་དང་ལེ་ཁེ་སི་ཊེན་ནས་སྤྱི་སྤྱོད་རླང་འཁོར་ ༡༡ ནང་སླེབས་ཡོད།
གདུང་སེམས་མཉམ་སྐྱེའི་ལས་འགུལ་དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཉིན་མོ་སྲུང་བརྩི་ཞུ་བའི་དུས་སྐབས་དང་བསྟུན་གོ་སྒྲིག་གནང་བ་ཞིག་ཡིན་འདུག གཞན་ཡང་སུད་བོད་མཛའ་འབྲེལ་ཚོགས་ཆུང་གིས་མགྲོན་འབོད་ཞུས་པ་ལྟར་སྤྱི་འཐུས་ཚོགས་གཙོ་མཆོག་ཕྱི་ལོ་ ༢༠༡༡ ཟླ་ ༡༠ ཚེས་ ༢༠ ཉིན་སུད་སི་གྲོང་ཁྱེར་ཛུ་རིཀ་ཏུ་འབྱོར་བ་དང་། ཕྱི་ཚེས་ ༢༢ ཉིན་གྱི་ཕྱེད་ཡོལ་ཛུ་རིཀ་གནས་སྡོད་ས་གནས་བོད་རིགས་ཚོར་༸གོང་ས་མཆོག་གིས་བོད་མིའི་ཆབ་སྲིད་ཀྱི་དབུ་ཁྲིད་དེ་བཞིན་མང་ཚོགས་ཀྱིས་འོས་འདེམས་བྱས་པའི་བཀའ་ཁྲི་བློ་བཟང་སེང་གེ་མཆོག་ལ་རྩིས་སྤྲོད་མཛད་རྗེས་བོད་མིའི་ཆབ་སྲིད་འཐབ་རྩོད་ཀྱི་ངོ་བོ་དང་།
བོད་མི་མང་སྤྱི་འཐུས་རྣམ་པ་དང་བོད་མི་ཚང་མས་རྡོག་རྩ་ཆིག་སྒྲིལ་ཐོག་ནས་བཀའ་ཁྲི་བློ་བཟང་སེང་གེར་རྒྱབ་སྐྱོར་ཐོག་རྒྱ་ནག་གཞུང་གིས་བོད་མིའི་ཆིག་སྒྲིལ་ཁ་ཐོར་གཏོང་རྒྱུའི་བྱ་ངན་རྩོམ་བཞིན་པ་དེར་ཡིད་གཟབ་དགོས་པའི་དྲན་སྐུལ་ཡང་གནང་ཡོད་པ་བཅས།།
