༢༠༡༡ ཟླ་ ༡༠ ཚེས་ ༢༦ རེས་གཟའ་ལྷག་པ།
༄༅། །འདི་གར་ཕྱི་དྲིལ་འགྲེམས་སྟོན་ཚན་པས་བཏང་གནས་ནང་འཁོད་དོན། ཕྱི་དྲིལ་ལས་ཁུངས་ཀྱི་འགྲེམས་སྟོན་ཚན་པས་ཕྱི་ལོ་ ༢༠༡༡ ཟླ་ ༡༠ ཚེས་ ༢༥ ཉིན་བོད་ཀྱི་འགྲེམས་སྟོན་ཁང་དུ་ཉེ་དུས་བོད་ནང་དུ་གཅིག་མཇུག་གཉིས་མཐུད་ཀྱིས་བོད་བསྟན་སྲིད་ཆེད་རང་ལུས་མེར་སྲེག་བཏང་བའི་རྒྱལ་ཞེན་ལས་འགུལ་ཐོག་གཏམ་བཤད་དང་དྲི་བ་དྲིས་ལན་གྱི་ལས་རིམ་ཞིག་གོ་སྒྲིག་གནང་ཡོད།
དེ་ཡང་བགྲོ་གླེང་དེ་བཞིན་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣ ཐོག་བོད་ཀྱི་འགྲེམས་སྟོན་ཁང་དུ་འགོ་འཛུགས་གནང་ཡོད་པ་དང་བགྲོ་གླེང་ནང་རྒྱལ་ཁབ་འདྲ་མིན་ནས་ཕེབས་པའི་ཡུལ་སྐོར་བ་དང་རང་རིགས་ན་གཞོན་ཁག་གཅིག་བཅས་ཁྱོན་མི་གྲངས་ ༤༥ ཙམ་གྱིས་མཉམ་ཞུགས་གནང་འདུག
ཐེངས་འདིའི་བགྲོ་གླེང་གི་གཏམ་བཤད་གནང་མཁན་ནི་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་ཉམས་ཞིབ་ལས་བྱེད་མཚོ་མོ་ལགས་དང་། སྐལ་ལྡན་མཚོ་མོ་གཉིས་མགྲོན་འབོད་ཞུས་འདུག
ཐོག་མར་ཕྱི་དྲིལ་འགྲེམས་སྟོན་ཚན་པའི་ལས་བྱེད་བསྟན་འཛིན་རབ་འབྱམས་ལགས་ཀྱིས་འཚམས་འདྲི་དང་བགྲོ་གླེང་ངོ་སྤྲོད་གནང་གྲུབ་མཚམས་སྐལ་ལྡན་མཚོ་མོ་ལགས་ཀྱིས་བགྲོ་གླེང་གི་གཏམ་བཤད་གནང་བའི་སྙིང་དོན། བོད་ནང་གི་གནས་སྟངས་ནི་ད་ལྟའི་ཆར་ཛ་དྲག་ཅན་ཞིག་ཏུ་གྱུར་ཡོད་པ་མ་ཟད། བོད་མི་རྣམས་ལ་ཆོས་དད་རང་དབང་དང་སྨྲ་བརྗོད། དེ་བཞིན་འགྲོ་མིའི་ཐོབ་ཐང་གི་རང་དབང་སོགས་མེད་པའི་ཁར། གཉའ་གནོན་དང་དམ་བསྒྲགས་བཙན་དབང་ཐོག་རྒྱལ་གཅེས་ཆོས་གཅེས་ཟེར་བའི་སློབ་གསོ་སྤེལ་དང་སྤེལ་བཞིན་ཡོད་པ་སོགས་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ལ་བོད་མི་རྣམས་ཀྱིས་བཟོད་ཐབས་མེད་པར་གྱུར་ཏེ། འུ་ཐུག་ཐབས་ཟད་ཀྱིས་བོད་ནང་གི་ཡ་ང་བའི་གནས་སྟངས་དེ་འཛམ་གླིང་མི་མང་གིས་ཤེས་རྟོགས་སླད་རང་ལུས་མེར་སྲེག་གི་ལས་འགུལ་རྩོམ་བཞིན་པ་རེད། དེ་བཞིན་ཁོང་གིས་གཏམ་བཤད་གནང་བ་དང་སྦྲགས་ཉེ་དུས་བོད་ནང་རང་ལུས་མེར་སྲེག་བཏང་ཟིན་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་འདྲ་པར་དང་འབྲེལ་ཡོད་གནས་ཚུལ་ཁག་གཅིག་བརྙན་པར་བརྒྱུད་ཚོགས་ཞུགས་པ་རྣམས་ལ་གསལ་སྟོན་གནང་འདུག དེ་རྗེས་སྐར་མ་ ༢༠ ཙམ་གྱི་དུས་ཡུན་རིང་བགྲོ་གླེང་གཏམ་བཤད་པ་དང་ཚོགས་ཞུགས་པ་རྣམས་ཀྱིས་ཕན་ཚུན་དྲི་བ་དྲིས་ལན་དང་དགོངས་ཚུལ་བརྗེ་རེས་གྱི་ལམ་ནས་བོད་དོན་གོ་རྟོག་སྤེལ་རེས་གནང་མཐར་བོད་ཀྱི་འགྲེམས་སྟོན་ཁང་གི་ལས་བྱེད་འཆི་མེད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་དང་བོད་དོན་ཞེན་སྐུལ་གནང་ཡོད། དེ་ནས་གསོལ་ཇ་མཆོད་བཞིན་ཕན་ཚུན་བོད་དོན་ཐོག་གོ་བསྡུར་གནང་སྟེ་བགྲོ་གླེང་ལེགས་པར་གྲུབ་འདུག་པ་བཅས། །