༢༠༡༡ ཟླ་ ༡༠ ཚེས་ ༡༨ རེས་གཟའ་མིག་དམར།
༄༅། །འདི་གར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༡ ཟླ་ ༡༠ ཚེས་ ༡༧ ཉིན་བཏང་གནས་ནང་འཁོད་དོན། ཕྱི་ལོ་ 
༢༠༡༡ ཟླ་ ༡༠ ཚེས་ ༡༧ ཉིན་བོད་ནང་གི་ཉིན་རྒྱབ་ཆུ་ཚོད་ ༡ ཡོལ་ཙམ་ལ་བོད་ཨ་མདོ་རྔ་པ་རྫོང་བྱ་སྐོར་མའི་ཉི་ཚེ་ཚང་གི་མ་མའི་བཙུན་དགོན་གྱི་བཙུན་མ་བསྟན་འཛིན་དབང་མོ། རང་ལོ་ ༢༠ ཡས་མས་ཡིན་ཞིང་། ཕ་མིང་ལ་ཉི་ཚེ་ཡིན་པ་ཁོང་མོས་རྔ་པ་རྫོང་མཁར་དང་བར་ཐག་སྤྱི་ལེ་གསུམ་ཙམ་ཡོད་པའི་བཙུན་དགོན་གྱི་ཞོལ་གྱི་གསུམ་མདོའི་ཟམ་ཁ་ནས་༸གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་ཆོས་དད་རང་དབང་དགོས་ཞེས་སྐད་འབོད་བྱེད་བཞིན་རང་ལུས་མེར་སྲེག་བཏང་ནས་རྒྱ་ནག་གཞུང་ལ་ངོ་རྒོལ་གནང་ཡོད་འདུག་ལ། ཁོང་མོ་དུས་ཡུན་སྐར་མ་བདུན་བརྒྱད་ཅིག་གི་རིང་གོམ་བགྲོད་བྱས་ནས་སོང་ཡོད་པ་དང་། སྐབས་དེར་ས་གནས་སུ་ཉེན་རྟོག་པ་སོགས་འབྱོར་མེད་སྟབས། ཁོང་མོའི་ཕུང་པོ་མ་མའི་བཙུན་དགོན་གྱི་བཙུན་མ་རྣམས་ཀྱིས་ཡར་ཁྱེར་ཡོད་འདུག གནས་ཚུལ་ཡོང་ཁུངས་ནས་བརྗོད་པ་ལྟར་ན། ཁོང་མོ་དུས་ཐོག་དེ་རང་ལ་གྲོངས་ཡོད་ཀྱང་། ཕུང་པོ་རྒྱ་གཞུང་ལ་སྤྲོད་ཀྱི་མིན་ཟེར་ནས་བཙུན་མ་ཚོས་སྲུང་བྱ་བྱས་ཡོད་ཀྱང་རྒྱ་གཞུང་ལ་བརྩི་སྤྲོད་དགོས་པ་ལས་གལ་སྲིད་མ་སྤྲད་ན། དོ་དགོང་མཚན་རང་ལ་ས་འོག་ཏུ་སྦས་དགོས་ཚུལ་བརྗོད་ཀྱིན་ཡོད་འདུག་པས་རྗེས་ཀྱི་གནས་ཚུལ་ཤེས་རྟོགས་མ་ཐུབ། གནས་ཚུལ་དེ་བྱུང་ནས་ཅུང་མ་འགོར་བར་དམག་མི་དང་ཉེན་རྟོག་པ་སོགས་འབྱོར་ནས་མ་མའི་བཙུན་དགོན་དང་ས་གནས་ཀྱི་གྲོང་སྡེ་ཁག་ཡོངས་རྫོགས་བཀག་སྡོམ་ནན་མོ་བྱས་ཡོད་འདུག མ་མའི་བཙུན་དགོན་གྱི་མིང་ཡོངས་ལ་མ་མའི་བཙུན་དགོན་བདེ་ཆེན་ཆོས་འཁོར་གླིང་ཡིན་ཞིང་། རྔ་པ་རྫོང་མཁར་གྱི་ནུབ་བྱང་ཕྱོགས་སུ་བར་ཐག་སྤྱི་ལེ་གསུམ་ལྷག་གི་ས་ན་ཡོད་འདུག གྲུབ་མཐའ་དགེ་ལུགས་ཡིན་པ་དང། སྔོན་ཕ་མཐའི་རི་ཁྲོད་ཤུལ་དུ་སྐལ་བ་བཟང་པོ་སོགས་ཀྱིས་བསྐྱངས། རྔ་པ་རྫོང་ཁོངས་ཀྱི་བཙུན་དགོན་ཆེ་ཤོས་ཡིན་པ་དང་། དེང་སྐབས་བཙུན་དགོན་དེར་བཙུན་མ་ ༣༥༠ ལྷག་ཡོད་འདུག དེ་མིན་ཕྱི་ཚེས་ ༡༥ ཉིན་རང་ལུས་མེར་སྲེག་གཏོང་མཁན་རྒྱལ་གཅེས་དཔའ་བོ་ནོར་བུ་དགྲ་འདུལ་ལགས་རྔ་པ་ནས་ས་གནས་གཞན་ཞིག་ལ་ཁྱེར་ཡོད་ཀྱང་གང་དུ་ཁྱེར་ཡོད་མེད་དང་ཁོང་གི་ཤི་གསོན་གྱི་གནས་ཚུལ་ག་འདྲ་ཡིན་མིན་སོགས་ཞིབ་ཕྲའི་གནས་ཚུལ་ཤེས་རྟོགས་མ་ཐུབ་པས་ཧ་ཅང་བློ་འཚབ་སྐྱེ་གཞིར་གྱུར་ཡོད། ཕྱི་ཚེས་ ༡༦ ཉིན་སླར་ཡང་རྔ་པ་རྫོང་མཁར་གྱི་བོད་པའི་ཟ་ཁང་དང་ཚོང་ཁང་ཚང་མས་སྒོ་བརྒྱབ་ནས་གདུང་སེམས་མཉམ་སྐྱེ་བྱས་ཡོད་འདུག་པ་བཅས།།
