༢༠༡༡ ཟླ་ ༡༠ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༩ ཉིན་བོད་མིའི་སྒྲིག་འཛུ
གས་ཀྱི་བཀའ་སྤྱི་ཐུན་མོང་ནས་གོ་སྒྲིག་ཐོག་བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་བོད་ཀྱི་ས་ཁུལ་ཁག་གི་ནང་རྒྱ་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེར་ཞི་རྒོལ་ཆེད་རང་ལུས་ཞུགས་མེར་སྒྲོན་མཁན་རྣམས་དང་དཔའ་ངར་ལྡན་པའི་ཐོག་ནས་བོད་དོན་ཆེད་རྒྱ་གཞུང་ལ་ཞི་རྒོལ་གནང་སྟེ་འདས་གྲོངས་སུ་གྱུར་བ་རྣམས་དང་ད་ལྟ་རྒྱའི་ནག་བཙོན་དུ་བཞུགས་བཞིན་པའི་བོད་རིགས་རྣམས་ཀྱི་ཆེད་སྨོན་ལམ་གསུང་འདོན་དང་ཟས་བཅད་ངོ་རྒོལ་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་དང་མཆོད་མེ་སྟོང་མཆོད་བཤམས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་ མཆོག་དབུ་བཞུགས་ཐོག་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དང་། སྟག་ལུང་ཞབས་དྲུང་རིན་པོ་ཆེ་མཆོག ཀིརྟི་རིན་པོ་ཆེ་མཆོག རྡ་སར་བཅའ་བཞུགས་མཁན་པོ་བླ་སྤྲུལ་རྣམས་དང། དགེ་བཙུན་སྔགས་གསུམ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། སྲི་ཞུའི་ལས་བྱེད་རྣམ་པ། མང་ཚོགས་བཅས་ཁྱོན་མི་གྲངས་ ༤༥༠༠ བརྒལ་བས་རྒྱལ་གཅེས་པ་ཁོང་རྣམ་པའི་ཆེད་མཆོད་འབུལ་སྨོན་ལམ་ཆུ་ཚོད་ ༡ གསུང་འདོན་གནང་བའི་བར་མཚམས་སུ་བཀའ་ཁྲི་བློ་བཟང་སེང་གེ་མཆོག་གིས་ཐེངས་འདིའི་སྨོན་ལམ་གསུང་འདོན་གྱི་ལས་འགུལ་དང་འབྲེལ་བའི་ཐོག་བཀའ་ཤག་གི་གསུང་བཤད་སྒྲོག་སྦྱངས་གནང་རྗེས་སྨོན་ལམ་གསུང་འདོན་དང་ཟས་བཅད་ངོ་རྒོལ་མུ་མཐུད་གནང་། མཆོད་འབུལ་སྨོན་ལམ་གྱི་གསུང་འདོན་རྣམས་ཡོངས་སུ་གྲུབ་བསྟུན། ༸གོང་ས་མཆོག་ཕོ་བྲང་དུ་ཆིབས་སྒྱུར་བསྐྱངས། དེ་རྗེས་དེར་འདུས་སེར་སྐྱ་མང་ཚོགས་རྣམས་ཀྱིས་མུ་མཐུད་ཕྱི་དྲོ་ཆུ་ཚོད་ ༥ བར་ཉིན་གང་ཟས་བཅད་ངོ་རྒོལ་གྱི་ལས་འགུལ་དང་སྨོན་ལམ་གསུང་འདོན་གནང་ཡོད།
དེ་མཚུངས་ཉིན་འདིར་རྒྱ་གར་གྱི་ས་གནས་ཡོངས་སུ་རྫོགས་པ་དང་དེ་བཞིན་ཕྱི་རྒྱལ་ཡུལ་གྲུ་ཁག་ཏུ་ བོད་མི་གནས་སྡོད་བྱེད་ཡུལ་ས་གནས་ཁག་ཚང་མའི་ནང་གདུང་སེམས་མཉམ་སྐྱེའི་ལས་འགུལ་སྤེལ་ཡོད་ལ་དམིགས་བསལ་ལྡི་ལིར་བོད་མི་མང་སྤྱི་འཐུས་རྣམས་དང་དེ་བཞིན་ས་གནས་ཁག་ནས་ཆེད་བཅར་གྱི་མི་གྲངས་ ༣༥༠༠ བརྒལ་བ་ལྷན་འཛོམས་ཀྱིས་ཉིན་བརྒྱ་དུས་གཅིག་ལ་གཞི་རྒྱ་ཆེ་བའི་ལས་འགུལ་སྤེལ་ཡོད།།
