༢༠༡༡ ཟླ་ ༡༠ ཚེས་ ༤ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༤ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་དབྱིན་ཡུལ་ནས་ཕེབས་པའི་དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་རྣམས་ལ་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་དང་དྲུང་ཆེ་ཐུབ་བསྟན་བསམ་འཕེལ་ལགས་རྣམ་གཉིས་ཀྱིས་མཇལ་འཕྲད་དང་སྦྲགས་ཁོང་རྣམས་ལ་ད་ལྟའི་བོད་ཀྱི་གནས་སྟངས་སྐོར་འགྲེལ་བརྗོད་གནང་ཡོད།
དེ་ཡང་ཕྱི་དྲིལ་བཀའ་བློན་མཆོག་གིས་བོད་ནང་གི་ཛ་དྲག་གནས་སྟངས་སྐོར་དང་ཉེ་ཆར་ཕྱི་ཚེས་ ༢༦ ཉིན་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་བློ་བཟང་སྐལ་བཟང་ལགས་དང་། བློ་བཟང་དཀོན་མཆོག་ལགས་གཉིས་ཀྱིས་རྒྱ་ནག་གཞུང་གིས་བོད་ནང་གི་བོད་མི་ཚོར་འཛིན་པའི་དྲག་གནོན་གྱི་སྲིད་བྱུས་ལ་མི་འདོད་པའི་རྣམ་འགྱུར་སྟོན་ཆེད་རང་ལུས་མེར་སྲེག་བཏང་སྟེ་རྒྱ་གཞུང་ལ་ངོ་རྒོལ་བྱས་པའི་དོན་རྐྱེན་སོགས་ཀྱི་སྐོར་འགྲེལ་བརྗོད་གནང་ཡོད་པ་མ་ཟད། ཕྱི་དྲིལ་བཀའ་བློན་མཆོག་གིས་དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི་རྣམས་ཀྱིས་དྲི་བར་ལན་འདེབས་གནང་སྐབས་རྒྱ་ནག་སྐམ་སར་ཡོད་པའི་རྒྱ་ནག་མི་མང་དང་ལྷག་པར་རྒྱ་རིགས་ཤེས་ཡོན་ཅན་དང་མཁས་དབང་སོགས་ལ་འབྲེལ་བ་བྱས་ཏེ་བོད་རྒྱ་འབྲེལ་ལམ་བཟང་དུ་གཏོང་རྒྱུ་ཡིན་སྐོར་སོགས་འགྲེལ་བརྗོད་གནང་ཡོད། དེ་བཞིན་ཕྱི་དྲིལ་དྲུང་ཆེས་ཀྱང་དབྱིན་ཡུལ་གྲོས་ཚོགས་ཀྱི་འཐུས་མི་རྣམ་པས་དྲི་བར་ལན་འདེབས་གནང་ཡོད་པ་བཅས།།
