༢༠༡༡ ཟླ་ ༡༠ ཚེས་ ༤ རེས་གཟའ་མིག་དམར།
༄༅། །འདི་གར་ཤེས་རིག་ལས་ཁུངས་ནས་གནས་ཚུལ་མཁོ་སྤྲོད་བྱུང་དོན་ལྟར་ན། དབུས་བོད་སློབ་འཛིན་ཚོགས་ཀྱི་གཏན་སློབ་སློབ་གྲྭ་ཁག་ཏུ་ལོ་གཉིས་རེ་ནང་རིག་གཞུང་འགྲན་བསྡུར་གནང་གི་ཡོད་པ་ལྟར། འདི་ལོ་ཕྱི་ཟླ་ ༩ ཚེས་ ༡༦ དང་ ༡༧ ཉིན་རྒྱ་གར་ཤར་ཁུལ་སློབ་གྲྭའི་སྡེ་ཁག་རྣམས་ཀ་སྦུག་གཏན་སློབ་བ་ཏུ་ཉིན་གཉིས་རིང་གནང་ཡོད་པ་མ་ཟད། བྱང་ཁུལ་སློབ་གྲྭའི་སྡེ་ཁག་རྣམས་ཌལ་ཧོར་གཏན་སློབ་ཏུ་ཕྱི་ཚེས་ ༡༨ དང་ ༡༩ ཉིན་འགྲན་བསྡུར་གནང་ཡོད། དེ་བཞིན་དབུས་ཀྱི་མཐའ་མའི་འགྲན་བསྡུར་དེ་ཕྱི་ཚེས་ ༢༢ དང་ ༢༣ ཉིན་ལྷོ་ཕྱོགས་སྦེལ་ཀོབ་སློབ་གྲྭར་ལེགས་གྲུབ་བྱུང་ཡོད། ཐེངས་འདིའི་རིག་གཞུང་འགྲན་བསྡུར་དེའི་ནང་བོད་ཀྱི་རིག་གཞུང་སྤྱི་དང་། ཡང་སྒོས་ཡུལ་སྲོལ་ཀྱི་གཞས་སྣ་འགྲན་བསྡུར་གནང་ཡོད་པ་བཅས།།