༢༠༡༡ ཟླ་ ༡༠ ཚེས་ ༤ རེས་གཟའ་མིག་དམར།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། 
ཕྱི་་ལོ་ ༢༠༡༡ ཟླ་ ༡༠ ཚེས་ ༣ ཉིན་བོད་ནང་གི་ཕྱི་དྲོའི་དུས་ཚོད་ ༢ ཙམ་ལ་རྔ་པ་རྫོང་ཆོས་རྗེ་མ་ཞང་སོ་རུ་མ་སྡེ་བའི་ཚུར་དྲིས་ཚང་གི་ཕ་ཚུར་དྲིས་དང་མ་བདེ་མཆོག་གཉིས་ཀྱི་བུ་རྔ་པ་ཀིརྟི་དགོན་པའི་དུས་འཁོར་གྲྭ་ཚང་གི་དགེ་འདུན་པ་རང་ལོ་ ༡༧ སོན་པ་སྐལ་བཟང་དབང་ཕྱུག་ལགས་ཀྱིས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་ལག་ཏུ་བཟུང་ནས་རྔ་པ་རྫོང་མཁར་གྱི་གཞུང་ལམ་དུ་ཐོན་པ་དང་རང་ལུས་ལ་མེ་སྤར་ཏེ་རྒྱ་ནག་གཞུང་ལ་ངོ་རྒོལ་སྐད་འབོད་གནང་འདུག་མོད། དེ་མ་ཐག་རྒྱ་དམག་གིས་བསྐོར་ནས་མེ་བསད་ཅིང་གཅར་རྡུང་དྲག་པོ་གཏོང་བཞིན་ཁྱེར་ཡོད་འདུག་པས་ཁོང་གི་རྨས་སྐྱོན་གང་འདྲ་བྱུང་མིན་སོགས་ཀྱི་གནས་སྟངས་ད་ལྟའི་ཆར་གསལ་པོ་ཤེས་རྟོགས་མ་ཐུབ། གནས་ཚུལ་བྱུང་མ་ཐག་གཡས་གཡོན་མི་མང་གིས་སྐད་འབོད་བྱེད་བརྩིས་བྱས་འདུག འོན་ཀྱང་དྲག་ཆས་ཉེན་རྟོག་པ་དང་དྲག་ཆས་དམག་མི་སོགས་ཀྱིས་མེ་མདའ་ཚད་ནས་མི་མང་ཁ་གཏོར་དུ་བཏང་ཡོད་འདུག དེ་མཚུངས་སུ་གཡུལ་ས་ལྟ་བུའི་གནས་སྟངས་འོག་ཡོད་པའི་རྔ་པ་རྫོང་མཁར་དང་ཀིརྟི་དགོན་པ་སོགས་ལ་སྔར་བས་དམག་མི་མང་དུ་བཏང་ནས་ཕྱི་ནང་གི་འགྲུལ་བཞུད་ཡོངས་རྫོགས་བཀག་སྡོམ་བྱས་ཏེ་དམ་བསྒྲགས་ཤུགས་ཆེ་རུ་བཏང་ཡོད་འདུག དེ་མིན་ཉིན་ཤས་སྔོན་ཀིརྟི་དགོན་པའི་གླིང་བར་དང་རྔ་པའི་ཁྲོམ་གཞུང་སོགས་ལ་ཡི་གེ་མང་པོ་སྦྱར་འགྲེམས་བྱས་ཡོད་པ་དང་། ཡི་གེའི་ནང་འཁོད་དོན་མུ་མཐུད་གནས་སྟངས་འདི་ལྟར་ལྷག་ན་མི་མང་པོས་རང་སྲོག་བློས་གཏོང་གིས་ངོ་རྒོལ་བྱ་རྒྱུའི་གྲ་སྒྲིག་ཡོད་ཚུལ་སོགས་བཀོད་ཡོད་འདུག་པ་བཅས།།
