༢༠༡༡ ཟླ་ ༡༠ ཚེས་ ༢༡ རེས་གཟའ་པ་སངས།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། རང་གཞུང་བཀའ་སྤྱི་ཐུན་མོང་གིས་གསལ་བསྒྲགས་ཀྱི་དགོངས་དོན་བཞིན་ཕྱི་ལོ་ ༢༠༡༡ ཟླ་ ༡༠ ཚེས་ ༡༩ རེས་གཟའ་ལྷག་པ་ཉིན་ཐེ་ཝན་དུ་གནས་སྡོད་བོད་རིགས་ཚོགས་པས་གཙོ་འགན་བཞེས་པ་དང་། གཞུང་འབྲེལ་མིན་པའི་ཚོགས་པ་ཁག་བཅུ་གསུམ་སྟེ་ས་གནས་བོད་ཀྱི་གཞོན་ནུ་དང་། ས་གནས་བོད་ཀྱི་བུད་མེད་ཚོགས་པ། ཐེ་ཝན་བོད་ཀྱི་གྲོགས་པོའི་མཐུན་ཚོགས། ཐེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པ། ཐེ་ཝན་བོད་རྒྱ་མཐུན་ཚོགས། ཐེ་ཝན་འགྲོ་བ་མིའི་ཐོབ་ཐང་གོང་འཕེལ་ལྷན་ཚོགས། རྒྱལ་སྤྱིའི་ཉེས་ཡངས་ཚོགས་པ་ཐེ་ཝན་ཡན་ལག ཐེ་ཝན་གཞོན་ནུའི་གླེང་སྟེགས། ཐེ་ཝན་རྩ་ཁྲིམས་བསྐྱར་བཅོས་དམངས་འཁྲོད་ཐེབས་རྩ་ཁང་། མིའི་རང་གཤིས་སློབ་གསོ་ཐེབས་རྩ་ཁང་། ཐེ་ཝན་ངལ་རྩོལ་དཔུང་ཁག ལྗང་ཁུ་ཚོགས་པ། སྲོག་ཁྲིམས་བཀག་བསྡོམས་སྐུལ་འདེད་མཐུན་ཚོགས། སློབ་དཔོན་གྲེན་ཝུན་གྲེན་དྲན་གསོའི་ཐེབས་རྩ་ཁང་བཅས་ནས་གཞོགས་འདེགས་གནང་སྟེ་ཐེ་ཝན་གྱི་རང་དབང་ཐང་ཆེན་དུ་ཆུ་ཚོད་ ༡༢ རིང་ ༡༠།༡༩ རྒྱལ་སྤྱིའི་བོད་ཀྱི་ཉིན་མོ་ཞེས་པའི་ཟད་བཅད་སྨོན་ལམ་རྒྱ་ཆེ་ཞིག་གནང་ཡོད། ལས་འགུལ་སྔ་དྲོ་ཆུ་ཚོད་དགུ་པ་ནས་འགོ་འཛུགས་གནང་བ་དང་།
ཆུ་ཚོད་ ༩།༣༠ ཐོག་གསར་འགོད་ལྷན་ཚོགས་ཐོག་བོད་མི་སོགས་མི་གྲངས་བཅུ་གཅིག་ནས་ད་བར་བོད་ཕྱི་ནང་གཉིས་སུ་ཡོད་པའི་དཔའ་བོ་དཔའ་མོ་མི་གྲངས་བཅུ་གཅིག་གིས་རང་གི་གཅེས་པའི་ལུས་སྲོག་བོད་རང་དབང་གི་དོན་དུ་ལུས་སྦྱིན་མཆོད་འབུལ་གནང་བར་བཀའ་དྲིན་རྗེས་དྲན་དང་མྱ་ངན་མཚོན་ཆེད་མགོ་སྐྲ་བཞར་བ་རེད། དེའི་ཁོངས་ཐེ་ལན་ཌ་མི་རིགས་ (Wi Thi) ཞུ་བས་མཉམ་ཞུགས་གནང་བ་དང་། ཁོང་གིས་བརྗོད་དོན་ལ་རང་ཉིད་མི་ཚེ་འདིའི་རིང་མགོ་སྐྲ་དབུ་རིལ་ཐེངས་གསུམ་བཞར་མྱོང་ཡོད་ཅིང་། ཐེངས་དང་པོ་རང་གི་ཡུལ་སྲོལ་ལྟར་གནས་བརྟན་སྡེ་པའི་ལུགས་ཀྱི་སྡོམ་པ་ལེན་སྐབས་དང་། ཐེངས་གཉིས་པ་རང་གི་ཕ་རྒན་འདས་གྲོངས་སུ་གྱུར་སྐབས་ཡིན་པ་མ་ཟད། ཐེངས་གསུམ་པ་སྐབས་འདིར་བོད་མིར་གདུང་སེམས་མཉམ་སྐྱེ་ཆེད་མགོ་རིལ་བཞར་བ་ཞིག་ཡིན་ཞེས་གསུངས། དེ་བཞིན་ཐེ་ཝན་གྱི་རྒྱ་མི་རིགས་སྲས་མོ་ལིའི་མཱན་ལིང་དབུས་གྲོང་ཁྱེར་ཐེ་ཀྲུང་ཁུལ་ནས་ཆེད་དུ་བོད་མིར་རྒྱབ་སྐྱོར་བྱེད་པར་སླེབས་ནས་མགོ་སྐྲ་བཞར་བ་ཞིག་ཡིན་འདུག གསར་འགོད་ལྷན་ཚོགས་ཐོག་ཕེབས་པའི་སྐུ་མགྲོན་གཙོ་བོ་ཐེ་ཝན་འགྲོ་བ་མིའི་ཐོབ་ཐང་གོང་འཕེལ་ལྷན་ཚོགས་ཚོགས་གཙོ་སྐུ་ཞབས་ལིན་ཅཱ་ཧྥན་ལགས་དང་། ཐེ་ཝན་བོད་ཀྱི་གྲོགས་པོའི་མཐུན་ཚོགས་ཚོགས་གཙོ་ལྕམ་ཀྲའུ་མེའི་ལི་ལགས། རྒྱལ་སྤྱིའི་ཉེས་ཡངས་ཚོགས་པ་ཐེ་ཝན་ཡན་ལག་ཚོགས་པའི་ཚོགས་མི་སྲས་མོ་ལིན་ཤིན་དབྱི་ལགས། ཐེ་པེ་གྲོང་ཁྱེར་གྲོས་ཚོགས་འཐུས་མི་ལྕམ་ཇན་ཡུའུ་ཨན་ལགས། ཐེ་ཝན་གྱི་དེ་སྔའི་སྲིད་བློན་གཞོན་པ་ལྕམ་ཡེའེ་ཅུན་ལན་ལགས་བཅས་ནས་བོད་མིར་གདུང་སེམས་མཉམ་སྐྱེ་དང་། མུ་མཐུད་བོད་མིར་རྒྱབ་སྐྱོར་གནང་རྒྱུ་མ་ཟད། ཐེ་ཝན་གཞུང་གིས་རྒྱ་ནག་སྐམ་ས་དང་འབྲེལ་ལམ་བྱེད་སྐབས་བོད་དོན་གླེང་སློང་དགོས་པའི་རེ་འདུན་གནང་བ་སོགས་ཀྱི་གཏམ་བཤད་གནང་། ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་བོད་མིའི་གནས་སྟངས་དང་། བོད་དོན་རྒྱབ་སྐྱོར་གནང་མཁན་ཚང་མར་ཐུགས་རྗེ་ཆེ་ཞུའི་གསུང་བཤད་གནང་རྗེས། བོད་མི་སེར་སྐྱ་མི་མང་དང་། ཐེ་ཝན་གྱི་ཡུལ་མི། ཕྱི་རྒྱལ་མི་རིགས་སོགས་མི་གྲངས་དྲུག་ཅུ་ལྷག་ནས་ཉིན་གཅིག་རིང་ཟས་བཅད་ངོ་རྒོལ་དང་སྨོན་ལམ་གསུང་འདོན། མ་ཎི་ཡིག་དྲུག་སོགས་གསོག་སྒྲུབ་གནང་བ་རེད། ཕྱི་དྲོ་ཐེ་ཝན་གྲོས་ཚོགས་འཐུས་མི་ཟུར་པ་སྐུ་ཞབས་ཇན་ཏཱ་ལགས་ཀྱིས་ཟས་བཅད་གནང་ཡུལ་དུ་ཕེབས་ནས་བོད་མིར་རྒྱབ་སྐྱོར་གྱི་གསུང་བཤད་གནང་བ་མ་ཟད། དགོང་དྲོ་ཐེ་ཝན་བོད་རྒྱ་མཐུན་ཚོགས་ཀྱི་ཚོགས་གཙོ་དགེ་རྒན་ཆེན་མོ་སྐུ་ཞབས་སུན་ཀྲེ་བྷན་ལགས་ཀྱང་ཆེད་དུ་ཤིན་ཀྲུའུ་གྲོང་ཁྱེར་ནས་བོད་མིར་རྒྱབ་སྐྱོར་གནང་ཆེད་ཕེབས་ཏེ་གསུང་བཤད་ཀྱང་གནང་ཡོད།
དགོང་དྲོ་ཆུ་ཚོད་དགུ་པའི་ཐོག་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ནས་སྨོན་ལམ་རེ་ཞིག་མཇུག་སྒྲིལ་གནང་བ་རེད།
སྐབས་འདིའི་ཟས་བཅད་ངོ་རྒོལ་དང་སྨོན་ལམ་སྐོར་ཐེ་ཝན་གྱི་གསར་ལམ་བརྙན་འཕྲིན་དང་། ཚགས་ཤོག དྲ་རྒྱ་སོགས་ནང་གནས་ཚུལ་གང་མང་བཀོད་ཐོན་བྱུང་བར་བརྟེན་ཁྱབ་བསྒྲགས་ཤུགས་ཆེ་བྱུང་ཡོད་པ་བཅས།
