༢༠༡༡ ཟླ་ ༡༠ ཚེས་ ༡༧ རེས་གཟའ་ཟླ་བ།
༄༅། །འདི་གར་ཁུངས་ལྡན་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༡༡ ཟླ་ ༡༠ ཚེས་ ༡༦ ཉིན་རྒྱབ་དང་དེ་རིང་ཕྱི་ཚེས་ ༡༧ ཉིན་གྱི་སྔ་དྲོ་དེང་སྐབས་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ལྗོངས་ཟེར་བའི་ཁོངས་སུ་ཡོད་པའི་གསེར་རྟ་རྫོང་ཁོངས་ཚེ་ཤུལ་སྡེ་བར་སེར་སྐྱ་མི་མང་ནས་ཞི་བའི་སྐད་འབོད་ཀྱི་ངོ་རྒོལ་ཤུགས་ཆེ་བྱས་རྗེས་རྫོང་འབྲེལ་ཡོད་ཚན་པས་དྲག་ཤུགས་བེད་སྤྱོད་ཀྱིས་ཞི་བའི་སྐད་འབོད་བྱེད་མཁན་སྟེང་མེ་མདའ་བརྒྱབ་པའི་གནས་ཚུལ་ཐོན་འདུག
དེ་ཡང་ཕྱི་ལོ་ ༢༠༡༡ ཟླ་ ༡༠ ཚེས་ ༡༦ ཕྱི་དྲོ་གསེར་རྟ་རྫོང་ཁོངས་ཚེ་ཤུལ་སྡེ་བའི་ཤང་སྲིད་གཞུང་དང་ཉེན་རྟོག་ལས་ཁུངས་སོགས་སུ་མི་མང་ནས་ཞི་བའི་སྐད་འབོད་བྱས་པའི་གནས་ཚུལ་ཐོན་རྗེས་ཕྱི་ཚེས་ ༡༧ ཉིན་གྱི་སྔ་དྲོ་སྤྱི་བདེ་ཉེན་རྟོག་པ་དང་དྲག་ཆས་དམག་མི་ཡོང་སྟེ། ཚེ་ཤུལ་སྡེ་བའི་འབྲུག་ལོ་དང་། མགོན་དགའ། རང་ལོ་ ༢༦ ཙམ་དུ་སོན་པའི་རིན་འགྲོས། རང་ལོ་ ༢༣ ཙམ་དུ་སོན་པའི་ཆོས་དགའ། རང་ལོ་ ༡༩ ཙམ་དུ་སོན་པའི་བོུ་བྷོ་རིས། དེ་བཞིན་མགོན་མཆོག་སྡེ་བའི་རང་ལོ་ ༡༨ ཙམ་དུ་སོན་པའི་རིག་མཛོས། ཁོང་མོ་དེ་སྔ་ ༢༠༠༨ ལོར་ཞི་རྒོལ་སྐབས་མེ་མདའ་ཕོག་སྟེ་རྐང་པ་ཡ་གཅིག་བཅད་དགོས་བྱུང་ཡོད་འདུག རྟ་ཤར་སྡེ་བའི་རང་ལོ་ ༡༩ ཙམ་དུ་སོན་པའི་ཚེ་དབང་སྐྱིད་སོགས་འཛིན་བཟུང་བྱས་ཡོད་པ་དང་། འཛིན་བཟུང་བྱེད་སྐབས་སྤྱི་བདེ་ཉེན་རྟོག་པས་མེ་མདའ་གང་བྱུང་བརྒྱབ་པར་བརྟེན་འབྲུག་ལོའམ་མགོན་དགའ་གང་རུང་གི་གྲོད་ཁོག་ལ་མེ་མདའ་ཕོག་པའི་གནས་ཚུལ་ཐོན་འདུག དེ་རིང་སྔ་དྲོ་བོད་མི་གང་བྱུང་འཛིན་བཟུང་བྱེད་བཞིན་པར་སྡེ་བ་གཞན་ནས་མི་ཡོང་སྟེ་ས་གནས་སུ་ངོ་རྒོལ་ཤུགས་ཆེ་བྱུང་སྟབས། ད་ལྟ་ས་གནས་ཡོངས་སུ་དྲག་ཆས་དམག་མི་བཏང་སྟེ་དམ་བསྒྲགས་ཤིན་ཏུ་ཆེན་པོ་བྱེད་བཞིན་པ་མ་ཟད། ཕྱི་ཕྱོགས་སུ་འབྲེལ་བ་བྱ་རྒྱུའི་བརྒྱུད་ལམ་ཡོངས་སུ་བཀག་སྟེ་དམ་བསྒྲགས་ཆེན་པོ་བྱེད་བཞིན་ཡོད་པའི་གནས་ཚུལ་ཐོན་འདུག་པ་བཅས།།
