༢༠༡༡ ཟླ་ ༡༠ ཚེས་ ༡༨ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༧ ཉིན་བཞུགས་སྒར་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་འཛམ་གླིང་གི་གྲགས་ཅན་ཚན་རིག་པ་ཁག་གཅིག་དང་ཁོར་ཡུག་ཚན་རིག་པ། ལས་འགུལ་བ། དེ་བཞིན་སེམས་ཁམས་དང་ནང་ཆོས་མཁས་པ་སོགས་ལྷན་འཛོམས་ཀྱིས་སེམས་དང་སྲོག་གི་ལྷན་ཚོགས་ཐེངས་ ༢༣ པ་དབུ་འཛུགས་བསྐྱངས་འདུག
དེ་ཡང་ཚོགས་ཐུན་དང་པོའི་སྐྱོང་བ་སྐུ་ཞབས་ (Daniel Goleman) ཌན་ནིལ་གྷོལ་མན་ལགས་ཀྱིས་ངོ་སྤྲོད་གསུང་བཤད་གནང་དོན། ད་རེས་ཀྱི་སེམས་དང་སྲོག་གི་ལྷན་ཚོགས་འདིས་ཁོར་ཡུག་གི་དཀའ་ངལ་སེལ་རྒྱུར་ཆོས་དང་ཚན་རིག དེ་བཞིན་ལྟ་གྲུབ་ཀྱི་ངོས་ནས་ཞབས་འདེགས་གང་སྒྲུབ་ཀྱི་ཡོད་པའི་སྐོར་ལ་བཀའ་བསྡུར་ཞུ་རྒྱུ་དང་། དེ་ནི་སེམས་དང་སྲོག་གི་ལྷན་ཚོགས་ཐོག་བརྗོད་གཞི་མི་འདྲ་བ་ཞིག་ཆགས་ཡོད་པ་མ་ཟད། ཁོར་ཡུག་གི་བརྗོད་གཞིའི་ཐོག་ལ་བཀའ་བསྡུར་གནང་བའི་ལྷན་ཚོགས་ཐེངས་གཉིས་པ་འདི་ཆགས་ཡོད། ཅེས་གསུང་བཤད་གནང་། ཚོགས་ཐུན་དང་པོར་ཨེ་རི་ཛོ་ན་གཙུག་ལག་སློབ་གཉེར་ཁང་གི་ཁོར་ཡུག་སྡེ་ཚན་གྱི་ངེས་སྟོན་པ་ལྩམ་སྐུ་(Diana Liverman)ཌའི་ན་ལེ་ཝར་མན་ལགས་ཀྱིས་འགྲོ་བ་མིའི་ཀུན་སྤྱོད་ཀྱི་རྐྱེན་པས་གོ་ལའི་ནང་ཚེ་སྲོག་རྒྱུན་གནས་ཐུབ་མིན་སྐོར་གསུང་བཤད་གནང་དོན། ཁོར་ཡུག་གི་དཀའ་ངལ་ནི་ཉེན་ཚབས་ཆེ་བའི་གནམ་གཤིས་འགྱུར་ལྡོག་ཙམ་མིན་པར་སྐྱེ་ཁམས་རྩ་བརླག་དང་རྒྱ་མཚོའི་མཐོ་ཚད་ལ་འགྱུར་བ་འགྲོ་རྒྱུ། དེ་བཞིན་ས་ཆུ་དང་རང་བྱུང་གཏེར་དངོས་རྣམས་ཚད་ལས་བརྒལ་བའི་བེད་སྤྱོད་བཏང་བར་བརྟེན་ནས་བྱུང་བ་ཞིག་ཡིན་ཞེས་གསུང་བཤད་གནང་ཡོད། སྐབས་དེར་༸གོང་ས་མཆོག་གིས་གནད་དོན་དེའི་ཐོག་དོགས་འདྲི་མཛད་དོན། འཛམ་གླིང་ས་ཆ་ཁ་ཤས་དེ་རིང་ཁ་སང་གྲངས་མོ་ཡིན་པ། དེ་ཚོའི་གྲས་སྔ་མོ་ཚ་བ་ཡོད་པ་རྩི་བཞིན་ཡོད། དེར་བརྟེན་སའི་གོ་ལ་ག་ལེར་ག་ལེར་འགྱུར་བ་ཞིག་འགྲོ་གི་ཡོད་པ་ལྟ་བུ་འདུག ད་ལྟའི་འགྱུར་བ་དེ་ལོ་བརྒྱ་ཕྲག་སྟོང་ཕྲག་ནང་ཚུན་ལ་རེད་དམ། ཡང་ན་ལོ་བརྒྱ་ཕྲག་སྟོང་ཕྲག་གོང་གི་ད་ལྟའི་བཟོ་ལྟ་འདི་ལྟ༌བུ་ཡོད་པ་དེ་ཆགས་ཟིན་པའི་སྐད་ཆ་ཤོད་ཀྱི་ཡོད་དམ། ད་ལྟ་འདི་གང་འདྲ་བྱས་ནས་བརྗོད་ཀྱི་ཡོད་དམ། ཞེས་དོགས་འདྲི་མཛད་ཡོད།
དེ་བཞིན་ལྷན་ཚོགས་དབུ་འབྱེད་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ངོས་ཀྱིས་ཆབ་སྲིད་འགན་དབང་ཡོངས་རྫོགས་མི་མང་ནས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་བྱས་པ་ཡིན། ལོ་ངོ་མང་པོའི་རིང་གི་དགའ་ལྡན་ཕོ་བྲང་གིས་གཞུང་འཛིན་སྐྱོང་བྱས་པའི་ལམ་སྲོལ་དེ་ཡང་ངོས་ཀྱིས་དང་བླངས་ཐོག་བསྒྱུར་བཅོས་ཤིག་བཏང་ཡོད། དེ་བཞིན་སེམས་དང་སྲོག་གི་ལྷན་ཚོགས་འདི་ལྟ་བུ་སོགས་ངོས་ཀྱིས་འགྲོ་བ་མིའི་ཀུན་སྤྱོད་གོང་འཕེལ་གཏོང་རྒྱུའི་ལས་འགན་གྱི་ཆ་ཤས་སུ་ཡོད་སྟབས། དེ་དག་མུ་མཐུད་མཇུག་སྐྱོང་བྱ་རྒྱུ་ཡིན། འདི་ལྟ་བུའི་ལྷན་ཚོགས་སྐབས་སུ་ཚང་མས་གོ་བསྡུར་དང་དགོངས་ཚུལ་བརྗེ་ལེན་བྱས་ཏེ་སེམས་བཟང་པོ་དང་སྙིང་རྗེའི་ཤུགས་རྐྱེན་ཇི་ཡོད། ཁོང་ཁྲོ་དང་ཞེ་སྡང་སོགས་ལ་སྐྱོན་ཆ་གང་ཡོད་ཐོག་ཞིབ་འཇུག་ནན་ཏན་བྱེད་དགོས། སྤྱིར་བཏང་རང་བྱུང་གི་གནོད་འཚེའི་དཀའ་ངལ་ཡོང་གི་ཡོད་པ་དེ་དག་ཟློག་དཀའ་བའི་གནས་སྟངས་ཤིག་ཡིན། འོན་ཀྱང་དེ་དག་འབྱུང་ཁུངས་གང་ཡིན་མིན་རྩད་གཅོད་བྱེད་དགོས་པ་མ་ཟད། མིའི་ཀུན་སྤྱོད་ཐོག་ལ་དཔྱད་པ་བྱེད་དགོས། དེ་རིང་སྔ་དྲོ་ངོས་ཀྱིས་གསར་འགྱུར་ལ་ལྟ་སྐབས་པ་ཀི་སི་ཐན་དུ་ཆུ་ལོག་དོན་རྐྱེན་འོག་གནོད་འཚེ་ཕོག་པ་རྣམས་ལ་རོགས་དངུལ་རིམ་བཞིན་རྫོགས་འགྲོ་གི་ཡོད་པའི་གསར་འགྱུར་ཞིག་འདུག གནས་སྟངས་དེ་དག་ནི་ཧ་ཅང་སེམས་སྐྱོ་དགོས་པའི་ཞིག་ཡིན། དེ་བཞིན་ལྷན་ཚོགས་འདིའི་སྐབས་ཚང་མས་ཐུགས་སྣང་ཆེན་པོས་དགོངས་ཚུལ་བརྗེ་ལེན་གནང་དགོས་པ་མ་ཟད། དཀའ་ངལ་དེ་དག་ཐོག་མི་གཞན་ནས་ཀྱང་དོ་སྣང་བྱ་རྒྱུར་ཡང་འབད་བརྩོན་གནང་དགོས་ཞེས་སོགས་ཀྱི་བཀའ་སློབ་སྩལ་ཡོད།
ཐེངས་འདིའི་ལྷན་ཚོགས་ཐོག་མཉམ་ཞུགས་གནང་མཁན་མཁས་པ་བཅུ་གསུམ་དང་ཟུར་ཉན་དུ་རྒྱལ་བ་ཀརྨ་པ་རིན་པོ་ཆེ་མཆོག ནང་པའི་དགེ་བཤེས། རྒྱ་གར་གྱི་མཁས་པ་མི་ཉུང་ཞིག་ཀྱང་ཕེབས་ཡོད་པ་དང་། ད་རེས་ཀྱི་ལྷན་ཚོགས་དེ་བཞིན་ཟླ་བ་འདིའི་ཕྱི་ཚེས་ ༡༧ ནས་ ༢༡ བར་འཚོགས་རྒྱུ་ཡིན་པ་མ་ཟད། ཉིན་གྲངས་ལྔའི་རིང་འཚོགས་རྒྱུའི་ལྷན་ཚོགས་ཐོག་མཁས་པ་ཚོས་སྣོད་བཅུད་དང་ཀུན་སྤྱོད་ཀྱི་བསྟན་བཅོས། དེ་བཞིན་རྟེན་འབྲེལ་བཅས་གཙོ་བཟུང་ཀྱིས་བགྲོ་གླེང་གནང་རྒྱུ་ཡིན་འདུག་པ་བཅས།
