༢༠༡༡ ཟླ་ ༡༠ ཚེས་ ༢༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྡེ་ར་ལྡུན་དུ་རྟེན་གཞི་བྱས་པའི་ལྡུན་སློབ་གྲྭར་(Doon School)ཆིབས་སྒྱུར་བསྐྱངས་ཏེ་རྒྱ་གར་གྱི་སློབ་མ་དང་ས་གནས་བོད་མི་རྣམས་ལ་བཀའ་སློབ་སྩལ་བ།
དེ་ཡང་མགོན་པོ་གང་ཉིད་མཆོག་གིས་ཐོག་མར་རྒྱ་གར་གྱི་སློབ་ཕྲུག་དང་དཔོན་རིགས་རྣམས་ལ་བཀའ་སློབ་སྩལ་དོན། ཕྱི་ལོ་ ༡༩༥༩ ལོར་ངོས་རང་རྒྱ་གར་ལ་བཙན་བྱོལ་དུ་ཡོང་དགོས་ཐུག་སྟེ་མ་སུ་རིར་གང་ཙམ་ཞིག་བསྡད་པ་ཡིན། དེ་ནས་རིམ་བཞིན་རྡ་སར་གནས་སྤོ་བྱས་པ་རེད་ཅེས་སོགས་ཀྱི་བཀའ་གྲུབ་སྩལ་གྲུབ་བསྟུན་ས་གནས་བོད་རིགས་ཚོར་བཀའ་སློབ་ཕེབས་དོན། ང་རང་ཚོས་ག་དུས་ཡིན་རུང་ང་ཉིད་བོད་པ་ཡིན་བསམ་པའི་འདུ་ཤེས་དེ་བརྗེད་རྒྱུ་མེད། དེ་བཞིན་བོད་སྤྱི་པའི་དོན་ལ་སེམས་ཁུར་ལེན་རྒྱུ་དེ་ཡང་མ་བརྗེད་པ་བྱེད་དགོས། དེ་དང་ཆབས་ཅིག་བོད་སྤྱི་པའི་དོན་དུ་སེམས་ཁུར་བླང་སྟེ་བོད་སྤྱི་པའི་དོན་དུ་ཕན་ཐོགས་ཡོད་པའི་ལས་དོན་བསྒྲུབ་རྒྱུ་གལ་ཆེན་པོ་ཡིན། ཕྱོགས་གཅིག་ནས་འཛམ་གླིང་འདིའི་སྟེང་བོད་པ་ཞེས་བརྗོད་སྐབས་དགའ་པོ་བྱེད་མཁན་མང་པོ་འདུག དཔེར་ན། ཡུ་རོབ་དང་ཨ་རི། ཨོ་སི་ཊོ་ལི་ཡར་ཡོད་པའི་བོད་པ་ཚོར་ས་གནས་དེའི་མི་མང་གིས་དགའ་པོ་བྱེད་ཀྱི་འདུག བོད་པ་ཚོར་དགའ་པོ་བྱེད་དགོས་དོན་ནི་ང་ཚོར་ཐུན་མོང་མ་ཡིན་པའི་གཤིས་ཀ་བཟང་པོ་ཞིག་ཡོད་པའི་ཐོག་བོད་པས་དྲང་པོ་དྲང་ཤག་བྱེད་ཀྱི་འདུག་ཅེས་ནས་དགའ་པོ་བྱེད་བཞིན་འདུག དེ་དག་ནི་ང་ཚོ་བོད་པའི་རིན་ཐང་རེད། འཛམ་གླིང་འདིའི་ཐོག་བོད་པར་མཐོང་བྱ་རྒྱུ་དེ་ནི་གཞི་རྩ་དེ་དག་ཐུག་ཡོད། ཅེས་དང་། ཡང་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་དབང་མི་མང་གིས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་དགོས་དོན་སྐོར་ལ་བཀའ་སློབ་སྩལ་དོན། ༸གོང་ས་ལྔ་པ་ཆེན་པོའི་སྐབས་ནས་བཟུང་ལུགས་གཉིས་ཀྱི་འགན་དེ་༸རྒྱལ་བ་རིན་པོ་ཆེས་འཁྱེར་རྒྱུ་དེ་བཞིན་ངོས་ཀྱིས་དགའ་ཞིང་སྤྲོ་ཞིང་སྤོབས་པའི་ཐོག་ནས་དང་དུ་བླངས་ཏེ་བསྒྱུར་བཅོས་བཏང་བ་ཡིན། དེ་ནི་ངོས་རང་སེམས་ཤུགས་ཆག་པ་དང་བོད་སྤྱི་པའི་དོན་ལ་རེ་བ་བརླག་པ་ལྟ་བུའི་ཐོག་ནས་ངོས་ཀྱིས་ཐག་གཅོད་བྱས་པ་དེ་འདྲ་རྩ་བ་ནས་མིན། ཞེས་སོགས་ཀྱི་བཀའ་སློབ་སྩལ་ཡོད་པ་བཅས། །
