༢༠༡༡ ཟླ་ ༡༠ ཚེས་ ༢༡ རེས་གཟའ་པ་སངས།
༄༅། །འདི་གར་ཨོ་སི་ཊོ་ལི་ཡའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༡༩ ཉིན་འཛམ་གླིང་ས་ཕྱོགས་གང་སར་གནས་པའི་བོད་མི་སྤྱི་དང་བོད་དོན་རྒྱབ་སྐྱོར་བ་ཚོས་བཀའ་སྤྱི་གཉིས་ཀྱི་གོ་སྒྲིག་ལམ་སྟོན་ལྟར། གཞིས་ལུས་བོད་རིགས་སྤུན་ཟླ་ཚོར་གདུང་སེམས་མཉམ་སྐྱེ་ཞུ་ཆེད་ཉིན་བརྒྱ་དུས་གཅིག་ཏུ་སྨོན་ལམ་གསུང་འདོན་དང་ཟས་བཅད་ངོ་རྒོལ་གྱི་ལས་འགུལ་སྤེལ་མུས་ལྟར། ཨོ་སི་ཊོ་ལི་ཡའི་གྲོང་ཁྱེར་ཀེན་བྷེ་རའི་རིག་པ་ཆོས་ཚོགས་སུ་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་ཀྱིས་གཙོས་བོད་མི་དང། བོད་དོན་རྒྱབ་སྐྱོར་བ་རྣམས་ཀྱིས་སྔ་དྲོ་ཆུ་ཚོད་ ༡༠།༣༠ ནས་དགོང་དྲོ་ཆུ་ཚོད་ ༥ བར་སྨོན་ལམ་གསུང་འདོན་དང་ཟས་བཅད་ངོ་རྒོལ་གྱི་ལས་འགུལ་དབུ་འཛུགས་གནང་ཡོད།
དེ་ཡང་ཐོག་མར་སྐུ་ཚབ་དོན་གཅོད་ཀྱིས་རྒྱ་གཞུང་གིས་བོད་ས་བཙན་བཟུང་བྱས་ཏེ་གཞིས་བཞུགས་བོད་མི་རྣམས་ལ་གདུག་རྩུབ་མནར་གཅོད་ཚད་མེད་བཏང་དང་གཏོང་བཞིན་ཡོད་པ་མ་ཟད། བོད་མིའི་ཆོས་དང་རིག་གཞུང་། སྐད་ཡིག་སོགས་གཏོར་བཤིག་ཚབས་ཆེན་བཏང་བ་སོགས་ཀྱི་མི་སེར་སྤེལ་
བའི་མཁྲེགས་བཟུང་སྲིད་བྱུས་འོག བོད་མི་རྣམས་འུ་ཐུག་ཐབས་ཟད་ཀྱིས་ད་བར་བོད་རིགས་ན་གཞོན་དགུས་རང་ལུས་ཞུགས་མེར་བསྒྲོན་པ་སོགས་བོད་ནང་གི་གནས་སྟངས་ཛ་དྲག་ཏུ་ཕྱིན་པའི་གནས་ཚུལ་ཁག་ངོ་སྤྲོད་གནང་ཡོད།
དེ་བཞིན་མེལ་བྷོན་ཁུལ་དུ་ས་གནས་བོད་རིགས་ཚོགས་པས་གོ་སྒྲིག་འོག་ཕྱི་ཚེས་ ༡༣ དང་ ༡༤ ཉིན་བོད་མི་དང་བོད་དོན་རྒྱབ་སྐྱོར་བས་མི་མང་འདུ་འཛོམས་སར་ལག་ཏུ་བོད་ཀྱི་རྒྱལ་དར་དང་ཕྲེད་དར་འདྲ་མིན་བཟུང་སྟེ་བོད་ནང་གི་ཛ་དྲག་གནས་སྟངས་ཇི་འདྲ་ཆགས་ཡོད་མེད་སྐོར་ངོ་སྤྲོད་ཀྱི་ཡིག་ཆ་འགྲེམས་སྤེལ་གནང་བ་མ་ཟད། དེ་ཉིན་ཕྱི་དྲོར་མར་མེ་ཁྲོམ་སྐོར་ཡང་གནང་ཡོད། ཕྱི་ཚེས་ ༡༩ ཉིན་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་ཞི་རྒྱ་ཆེ་བ་ཞིག་ཀྱང་སྤེལ་ཡོད།
གཞན་ཡང་ཕྱི་ཚེས་ ༡༩ ཉིན་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནི་ཁུལ་དུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་སྨོན་ལམ་གསུང་འདོན་དང་ཡིག་ཆ་འགྲེམས་སྤེལ་རྒྱ་གང་ཆེ་གནང་ཡོད། ཕྱི་ཚེས་ ༡༤ ཉིན་གྲོང་ཁྱེར་སྦེར་སི་སྦེན་ཁུལ་དུ་བོད་མི་རྣམས་ཀྱིས་སྨོན་ལམ་གསུང་འདོན་སོགས་ཀྱི་ལས་འགུལ་སྤེལ་ཡོད། དེ་བཞིན་སླད་བོད་ནང་རང་ལུས་ཞུགས་མེར་སྒྲོན་མཁན་རྒྱལ་གཅེས་སྤུན་ཟླ་རྣམས་ཀྱི་ཆེད་ལས་འགུལ་སྔར་ལྷག་སྤེལ་འཆར་ཡོད་འདུག་པ་བཅས།།
