༢༠༡༡ ཟླ་ ༡༠ ཚེས་ ༢༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༩ རེས་གཟའ་ལྷག་པའི་ཉིན་ཨུ་རུ་སུ་གྲོང་ཁྱེར་ཆེ་ཤོས་གཉིས་པར་གྲགས་པ་སན་པི་ཊར་སི་བྷག་(St.Petersburg)ཏུ་རྟེན་གཞི་བྱས་པའི་ཨུ་རུ་སུའི་བོད་དོན་རྒྱབ་སྐྱོར་བ་བོད་ཀྱི་གྲོགས་པོ། ཞེས་པའི་ཚོགས་པས་རྒྱ་ནག་གི་སྲིད་འཛིན་ཧུའུ་ཅིན་ཐའོ་ཡི་མིང་ཐོག་ལ་རྒྱ་ནག་གཞུང་ཚབ་ཁང་ལ་ཛ་དྲག་གི་འབོད་སྐུལ་སྙན་ཞུ་ཞིག་ཕུལ་འདུག སྙན་ཞུ་དེའི་ནང་འཁོད་དོན། ད་ལྟ་བོད་ནང་རྒྱ་ནག་གཞུང་གིས་བོད་མི་ཚོར་འཛིན་བཞིན་པའི་དྲག་གནོན་གྱི་སྲིད་བྱུས་དེ་འཕྲལ་དུ་མཚམས་འཇོག་དགོས་པ་དང། བོད་མི་རྣམས་ཀྱི་ཛ་དྲག་ཆེ་བའི་དཀའ་ངལ་གྱི་གནད་སྟངས་དེ་མྱུར་དུ་སེལ་དགོས་པ་མ་ཟད། བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་མངོན་འདོད་ལ་རྒྱ་ནག་གཞུང་གིས་བརྩི་སྲུང་བྱེད་དགོས་པའི་རེ་འདུན་ཤུགས་ཆེ་བཏོན་འདུག ཕྱི་ལོ་ ༡༩༤༩ ལོ་ནས་རྒྱ་ནག་གཞུང་གིས་བོད་ནང་མི་རིགས་རྩ་མེད་གཏོང་རྒྱུའི་སྲིད་བྱུས་ལག་བསྟར་བྱས་པ་དེར་ངོས་ལེན་ཐོག་བོད་མི་རྣམས་ལ་རང་སྲིད་རང་སྐྱོང་གི་ཐོབ་ཐང་སྤྲོད་དགོས་པ་སོགས་འཁོད་ཡོད་འདུག
བོད་ཀྱི་གྲོགས་པོ་ཞེས་པའི་ཚོགས་པ་འདི་ནི་ཕྱི་ལོ་ ༡༩༩༣ ལོར་ཐོག་མར་ལྕམ་སྐུ་མར་གྷ་རི་ཏ་ལགས་(Mrs.Margarita) དང་སྐུ་ཞབས་ཨེ་ཊེ་རེན་ཨེ་ཝ་(Dr.A Terentyev)ལགས་གཉིས་ཀྱིས་བཙུགས་པ་དང་། ད་ལྟ་ཚོགས་པ་འདིའི་འབྲེལ་མཐུད་པ་གསར་པ་ནི་ལྕམ་སྐུ་ཨི་ལི་ན་ཀིམ་ལགས་(Ms.Elena Kim)དང་སྐུ་ཞབས་ཨེ་པི་ཀི་རི་ཤན་ལགས་(Mr.A.P Christian) ཡིན་འདུག་པ་བཅས།།