༢༠༡༡ ཟླ་ ༡༠ ཚེས་ ༢༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢ ཉིན་ལྷོ་ཨ་མི་རི་ཁའི་ཁུལ་གྱི་གྲོང་ཁྱེར་བཅུ་གཉིས་ནང་བོད་དོན་རྒྱབ་སྐྱོར་མཚོན་ཆེད་གདུང་སེམས་མཉམ་སྐྱེའི་ལས་འགུལ་ཞིག་སྤེལ་རྒྱུ་ཡིན་འདུག
དེ་ཡང་ཕོ་ལོ་རི་ཡ་ན་པོ་ལི་སི།(Florianopolis) རི་ས་ཡི་ཕི་རི་ཨོ་ཌི་ཇ་ནི་རོ། (Recife, Rio de Janeiro) ས་ཨོ་པཱ་ལོ། (Sao Paolo)བཅས་བྷར་སིལ་རྒྱལ་ཁབ་ཀྱི་གྲོང་ཁྱེར་ཆེ་ཁག་གསུམ་དང།  མེཀ་སི་ཁོ་སི་ཊི། (Mexico city) མོ་རི་ལི་ཡ། (Morelia) ཁུ་རེ་ཊ་རོ། (Queretaro) མོན་ཊི་རི། (Monterry) བཅས་མེཀ་སི་ཁོའི་ཡུལ་གྱི་གྲོང་ཁྱེར་ཆེ་ཁག་བཞི་དང། ཕྱོགས་མཚུངས་ཨུ་རུ་གོ་ཝེའི་གྲོང་ཁྱེར་མོན་ཊི་ཝི་ཌི་ཨོ། (Montevideo) ནང་དང། ཆི་ལི་ཡུལ་གྱི་གྲོང་ཁྱེར་སེན་ཊི་ཨ་གྷོ། (Santiago) ནང་དང། ཀོ་ལམ་བྷི་ཡའི་ཡུལ་གྱི་གྲོང་ཁྱེར་བྷོ་གྷོ་ཊ། (Bogota) དང་། ཀོ་སི་ཊ་རི་ཀའི་གྲོང་ཁྱེར་སེན་ཧོ་སི་(San Jose) བཅས་ལྷོ་ཨ་མི་རི་ཀའི་གྲོང་ཁྱེར་ཆེ་ཁག་བཅུ་གཉིས་ནང་བོད་ནང་གི་བོད་མི་ཚོའི་ཛ་དྲག་གི་གནས་སྟངས་ལ་རྒྱབ་སྐྱོར་གྱིས་གདུང་སེམས་མཉམ་སྐྱེའི་ལས་འགུལ་གཞི་རྒྱ་ཆེ་བ་ཞིག་སྤེལ་རྒྱུ་ཡིན་འདུག
གྲོང་ཁྱེར་སོ་སོའི་ནང་ལས་འགུལ་གོ་སྒྲིག་གནང་མཁན་ཚོས་རང་གི་གཉེན་མཚན་གཙོས་གྲོགས་པོ་གྲོགས་མོ། དེ་བཞིན་རང་གི་ལས་རོགས་སོགས་མདོར་ན་མང་ཚོགས་དཀྱུས་མའི་ཁྲོད་བོད་ནང་གི་ཛ་དྲག་གནས་སྟངས་གསལ་བཤད་ཐོག་རྒྱབ་སྐྱོར་ཐོབ་ཐབས་ཀྱི་ལས་འགུལ་གཞི་རྒྱ་ཆེ་བ་ཞིག་སྤེལ་རྒྱུ་ཡིན་པ་དེའི་ནང་མཉམ་ཞུགས་ཡོང་ཆེད་འབད་བརྩོན་གནང་བཞིན་ཡོད་འདུག སྐབས་དེར་འཕྲེད་དར་དང་སྦྱར་ཡིག་སོགས་བགོ་འགྲེམས་བྱ་རྒྱུ་ཡིན་པ་ཙམ་མ་ཟད། དེ་བཞིན་དྲིལ་བསྒྲགས་ཡིག་ཆ་གཞན་ཁག་ཀྱང་མང་ཚོགས་ལ་གང་མང་བགོ་འགྲེམས་བྱ་འཆར་ཡོད་འདུག
ཕྱོགས་མཚུངས་ལས་འགུལ་དེ་དག་ས་ཁུལ་སོ་སོའི་རླུང་འཕྲིན་དང་བརྙན་འཕྲིན་བརྒྱུད་ལམ་ནང་བསྟན་ཐུབ་ཐབས་ཀྱང་གནང་རྒྱུ་ཡིན་འདུག དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ཁང་དང་རྒྱལ་སྤྱིའི་བོད་དོན་ལས་འགུལ་ཁང་། བོད་བརྒྱུད་ནང་པའི་ཆོས་ཚོགས་ཐུན་མོང་ཐོག་བོད་མདོ་སྨད་རྔ་པ་གཙོ་བོར་གྱུར་བའི་བོད་མི་ཚོར་གདུང་སེམས་མཉམ་སྐྱེའི་རྒྱབ་སྐྱོར་ཡོད་པའི་མཚན་རྟགས་བསྡུ་རུབ་ཀྱི་འགུལ་སྤེལ་འཆར་ཡོད་པ་མ་ཟད། བོད་དོན་དང་འབྲེལ་བའི་གནས་ཚུལ་ཁག་སི་པན་གྱི་སྐད་ཡིག་ཐོག་སྐུ་ཚབ་དོན་ཁང་གི་དྲ་རྒྱ་དང་དྲ་འཕྲིན་བརྒྱུད་ལྟ་རྒྱུའི་མཐུན་རྐྱེན་ཡང་བསྐྲུན་འདུག་པ་བཅས།།