༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༤ ཉིན་འཕྲོད་བསྟེན་ལས་ཁུངས་ནས་འདི་གར་བཏང་གནས་ནང་འཁོད་དོན། ཕྱི་ཟླ་ ༨ ཚེས་ ༣༡  ནས་ཕྱི་ཟླ་ ༩ ཚེས་ ༢༥ བར་ལྷོ་ཕྱོགས་སྦེལ་སྐོབ་ལུགས་བསམ་དང་བདེ་སླར།  ཧོན་སུར་།  ཀོ་ལི་གྷལ།  མོན་གྷོ་གཞིས་མི་དང་སློབ་གྲྭ་ཁག  སྦེང་ལོར་ལས་རིགས་སྦྱོང་བརྡར་བསྟི་གནས་ཁང་དང་བོད་ཁྱིམ་མཐོ་སློབ། བོད་མི་གཞོན་ནུ་སྡོད་ཁང་གི་སློབ་ཕྲུག་བཅས་ལ་དེང་སྐབས་ཁྱབ་བརྡལ་ཆེ་རུ་འགྲོ་བཞིན་པའི་ཛ་དྲག་ཅན་གྱི་ནད་གཞི་མྱོས་རྫས་ངན་གོམས་དང་གཉན་ནད་རེག་དུག་སྔོན་འགོག་སྐོར་སློབ་གསོའི་གོ་རྟོག་ལས་འགུལ་སྤེལ་ཡོད། དེ་ཡང་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བློ་བཟང་དར་རྒྱས་ལགས་དང་གཉན་ནད་རེག་དུག་ནད་པ་བློ་བཟང་དམ་ཆོས་ལགས་གཉིས་ལ་ས་གནས་འགོ་འཛིན་དང་སྨན་ཁང་ཁག་གིས་མི་མང་འདུ་འཛོམས་མཐུན་འགྱུར་འོག་མཉམ་ཞུགས་ཀྱིས་བོད་མིའི་སྤྱི་ཚོགས་ཁྲོད་གཉན་ནད་རེག་དུག་ནད་གཞི་ཐོག་ངོ་སྤྲོད་དང་སྦྲགས་ནད་གཞི་འགོས་སྟངས་བརྒྱུད་ལམ་གཙོ་བོར་ཁག་ངོ་སྤྲོད་དང་སྔོན་འགོག་སྐོར།  ནད་གཞི་ཅན་དང་ཟ་བཏུང་མཉམ་ཤིབ་སོགས་གནས་སྟངས་འདིའི་འོག་ནད་གཞི་འགོས་ཀྱི་མེད་པའི་གསལ་བཤད་དང་། ནད་པར་བལྟ་སྟངས། ཁོང་ཚོར་སྤྱི་ཚོགས་ནང་དམའ་འབེབབ་དང་དབྱེ་འབྱེད་སོགས་མེད་པའི་འབོད་སྐུལ་ནན་ཏན་ཞུས། དེ་བཞིན་གཉན་ནད་རེག་དུག་ནད་པ་བློ་བཟང་དམ་ཆོས་ལགས་ཀྱིས་གཉན་ནད་རེག་དུག་གི་ནད་གཞི་གང་འདྲ་འགོས་མིན་དང་སྤྱི་ཚོགས་ཀྱི་ལྟ་ཕྱོགས་གང་བྱུང་གི་ལོ་རྒྱུས། ནད་གཞི་དེའི་རྐྱེན་པས་ལུས་སེམས་ལ་དཀའ་ངལ་དང་ནད་གཞི་སྔོན་འགོག་ཐོག་དོ་སྣང་དགོས་གལ། ནད་གཞི་ཡོད་མཁན་ཚོར་སྨན་བཅོས་དུས་ཐོག་དང་ཟས་སྤྱོད་བསྟེན་ཚུལ་གལ་འགངས་ཆེ་བ་སོགས་སོ་སོའི་ཉམས་མྱོང་གི་ཐོག་ནས་འགྲེལ་བཤད་གནང་བར་མང་ཚོགས་ནས་དམིགས་བསལ་དོ་སྣང་ཆེན་པོས་མིག་ཆུ་ཤོར་མཁན་ཡང་མང་པོ་བྱུང་བ་དང་གཉན་ནད་རེག་དུག་ནད་པ་རྣམས་ལ་སྤྱི་ཚོགས་ནང་དབྱེ་འབྱེད་མི་ཡོང་བ་དང་ནད་གཞི་ཡོད་མཁན་རྣམས་ལ་ནད་གཞི་མི་གཞན་ལ་མ་འགོས་པའི་རེ་སྐུལ་ཞུས་ཡོད། དེ་ནས་འཕྲོད་བསྟེན་འབྲེལ་ལས་ནས་མྱོས་རྫས་ངན་གོམས་ངོ་སྤྲོད་དང་མྱོས་རྫས་བེད་ལོག་རྐྱེན་གྱིས་ལུས་སེམས་གཉིས་ཀར་དཀའ་ངལ་ཧ་ཅང་འཕྲད་ཏེ་གནས་སྐབས་དང་ཕུགས་རྒྱང་ལ་གནོད་སྐྱོན་གྱིས་ནང་མི་དང་གྲོང་སྡེ་ཁྱིམ་མཚེས་ཡོངས་ལ་དཀའ་ངལ་གནས་སུ་ལྷུངས་བ། ཡང་མྱོས་རྫས་རིགས་ཡུན་རིང་བསྟེན་རྗེས་ལམ་སེང་མཚམས་འཇོག་བྱས་ན་འདར་སིག་དང་ན་ཟུག་མང་པོར་ཡོད་པ། དེ་བཞིན་ནད་པར་ཇི་ལྟར་ངོས་འཛིན་ཐུབ་པའི་མངོན་རྟགས། ཕ་མ་དང་དགེ་ལས་རྣམས་ཀྱི་ལས་འགན། སྔོན་འགོག་ཐབས་ལམ་དང་ནད་པར་སྨན་བཅོས་ཀྱི་མཐུན་འགྱུར་སྦྱར་ནས་དཀའ་ངལ་སེལ་ཐབས་སྐོར་འགྲེལ་བཤད་འཐུས་གཙང་དང་། དེ་བཞིན་མང་ཚོགས་ལ་འཕྲོད་བསྟེན་ལས་ཁུངས་ནས་གཉན་ནད་རེག་དུག་ནད་པ་དང་མྱོས་རྫས་ངན་གོམས་ལངས་ཤོར་ཅན་རྣམས་ལ་སྨན་བཅོས་སོགས་ཀྱི་མཐུན་འགྱུར་རོགས་རམ་ཆ་ཚང་གནང་བཞིན་ཡོད་པའི་སྐོར་སོགས་གསལ་བཤད་གནང་ཡོད་པ་བཅས།།