༢༠༡༡ ཟླ་ ༡༠ ཚེས་ ༡༢ རེས་གཟའ་ལྷག་པ།
༄༅། ཕྱི་ལོ་ ༢༠༡༡ ཟླ་ ༡༠ ཚེས་ ༡༡ ཉིན་བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༥༢ འཁོར་བའི་དུས་དྲན་སྲུང་བརྩི་ཞུ་ཆེད་རྡ་ས་བོད་ཀྱི་ཟློས་གར་ཚོགས་ཁང་དུ་རྐང་བྲོ་གླུ་གཞས་ཀྱི་འགྲན་བསྡུར་གནང་རྒྱུའི་གྲ་སྒྲིག་སྔོན་སོང་ཟིན་ནའང་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེ་ཞུ་ཆེད་ཕྱིར་འཐེན་གནང་ཡོད།
དེ་ཡང་ཕྱི་ཚེས་ ༡༡ ཉིན་རྒྱབ་ཆུ་ཚོད་ ༢ ཐོག་རྡ་སར་རྟེན་གཞི་བྱས་པའི་བོད་ཀྱི་ཟློས་གར་ཚོགས་ཁང་དུ་སྐུ་མགྲོན་གཙོ་བོ་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་དང་། ཁྲིམས་ཞིབ་པ་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་མགྲོན་བཅས་ཁྱོན་མི་གྲངས་ ༧༠ ལྷག་ལྷན་འཛོམས་ཐོག་བོད་ནང་རྔ་པ་སོགས་ཀྱི་ས་ཁུལ་ཁག་ཏུ་ཉེ་ལམ་བསྟན་སྲིད་མི་རིགས་ཀྱི་དོན་དུ་རང་ལུས་ཞུགས་མེར་བསྒྲོན་ཏེ་ཞི་རྒོལ་གནང་མཁན་རྒྱལ་གཅེས་དཔའ་བོ་རྣམས་ཀྱིས་གཙོས་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་དང་། ད་ལྟ་རྒྱའི་བཙན་འོག་ཏུ་དཀའ་སྡུག་མྱོང་བཞིན་པའི་གཞིས་ལུས་སྤུན་ཟླ་རྣམས་ལ་གདུང་སེམས་མཉམ་སྐྱེ་མཚོན་ཆེད་སྐུ་མགྲོན་གཙོ་བོ་མཆོག་གིས་མར་མེ་ཞལ་ཕྱེ་གནང་རྗེས་ཚང་མས་སྐུ་བཞེངས་ཐོག་དུས་ཡུན་སྐར་མ་གཅིག་རིང་མྱ་ངན་གུས་འདུད་ཞུས།
དེ་ནས་ཟློས་གར་སྤྱི་ཁྱབ་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་ངོ་སྤྲོད་གསུང་བཤད་སྙིང་བསྡུས་ཤིག་གནང་དོན། དེ་རིང་འདིར་ཆོས་རིག་ལས་ཁུངས་ཀྱིས་བཀའ་འབྲེལ་ལྟར་དེང་སྐབས་བོད་ནང་བསྟན་པ་ཆབ་སྲིད་དོན་དུ་རང་སྲོག་བློས་གཏོང་གིས་ལས་འགུལ་རབ་དང་རིམ་པ་སྤེལ་དང་སྤེལ་མུས་ཡིན་པ་དེ་དག་ང་ཚོ་ཟློས་གར་ཚོགས་པའི་འགོ་ལས་ཡོངས་ཀྱིས་གསལ་པོ་ཤེས་ཀྱི་ཡོད།  འོན་ཀྱང་ཟློས་གར་ཚོགས་པའི་རྒྱུན་གཏན་བྱེད་སྒོ་རྣམ་གཞག་རྐང་བྲོ་གླུ་གཞས་དེ་དག་རིག་གཞུང་དང་འབྲེལ་བ་ཞིག་ལས་དགའ་དགའ་སྤྲོ་སྤྲོ་བྱ་རྒྱུ་ཞིག་ཆགས་ཀྱི་མེད་ཞུ་རྒྱུ་དང། གཞིས་ལུས་བོད་རིགས་སྤུན་ཟླ་ཚོར་གུས་བརྩི་ཞུས་པའི་ཐོག་ནས་དེ་རིང་གི་རྐང་བྲོ་གླུ་གཞས་དེ་བཞིན་ཕྱིར་འཐེན་གྱིས་རྒྱལ་གཅེས་དཔའ་བོ་ཚོའི་སྙིང་སྟོབས་ལ་ངོ་མཚར་དང་རྗེས་སུ་ཡི་རང་ཐོག་ང་ཚོ་འགོ་ལས་ཡོངས་ཀྱིས་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་གསུངས་རྗེས་བདེན་ཚིགས་སྨོན་ལམ་འུར་འདོན་གནང་སྟེ་འདི་ལོའི་དབྱར་སྐྱིད་ཀྱི་རྐང་བྲོ་གླུ་གཞས་འགྲན་བསྡུར་དེ་བཞིན་ཕྱིར་འཐེན་གནང་ཡོད་པ་བཅས།།