༢༠༡༡ ཟླ་ ༡༠ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༩ རེས་གཟའ་ལྷག་པའི་ཉིན་གཞིས་ལུས་བོད་མི་ཚོར་གདུང་སེམས་མཉམ་སྐྱེ་མཚོན་ཆེད་ཨུ་རུ་སུའི་རྒྱལ་ས་མོ་སི་ཀོར་རྟེན་གཞི་བྱས་པའི་སྐུ་ཚབ་དོན་ཁང་གིས་གོ་སྒྲིག་འོག་མོ་སི་ཀོའི་བླ་མ་ཙོང་ཁ་པ་ནང་པའི་ཆོས་ཚོགས་སུ་མཆོད་འབུལ་སྨོན་ལམ་གོ་སྒྲིག་ཞུས་ཡོད། སྐབས་དེར་ཨུ་རུ་སུ་ནང་པ་དང་ཐུ་ཝ། བྷུར་ཡ། ཀལ་མུཀ། བཅས་ནས་སེར་སྐྱ་མང་ཚོགས་དང་དེ་བཞིན་བོད་དོན་རྒྱབ་སྐྱོར་བ་ཁག་གཅིག་བཅས་ནས་མཉམ་བཞུགས་གནང་ཡོད། སྐབས་དེར་སྐུ་ཚབ་དོན་གཅོད་ངག་དབང་རབ་རྒྱས་ལགས་ཀྱིས་ད་ལྟ་བོད་ནང་གི་བོད་མི་ཚོའི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་སྐོར་ངོ་སྤྲོད་གནང། དེ་རྗེས་སེར་བྱེས་དགེ་བཤེས་ངག་དབང་ཐུགས་རྗེ་ལགས་དང་ངག་དབང་རིག་ལམ་ལགས་གཉིས་ཀྱིས་སྨོན་ལམ་གསུང་འདོན་གནང་ཡོད།
ཕྱོགས་མཚུངས་ཁལ་མུཀ་རྒྱལ་ས་ཨེ་ལི་སི་ཏའི་ནང་བོད་མི་དང་བོད་ཀྱི་མཛའ་གྲོགས་ལྷན་ཚོགས་ཟུང་འབྲེལ་ཐོག་ནང་པའི་ལྷ་ཁང་ཞིག་ཏུ་སྨོན་ལམ་གོ་སྒྲིག་ཞུས་ཡོད། སྐབས་དེར་བོད་ཀྱི་མཛའ་གྲོགས་ལྷན་ཚོགས་ཀྱི་ཚོགས་གཙོ་ལྕམ་ཨན་ཊོ་ནི་ན་མཆོག་གིས་བོད་ནང་གི་བོད་མི་ཚོའི་གནས་སྟངས་ཛ་དྲག་སྐོར་ངོ་སྤྲོད་གནང། གཞན་ཡང་སྐབས་དེར་མར་མེ་ཁྲོམ་སྐོར་གྱི་ལས་འགུལ་ཞིག་གོ་སྒྲིག་ཞུས་འཆར་ཡོད་ཀྱང་ཆོག་མཆན་སྔ་སྣུར་ཞུ་ཐུབ་མེད་སྟབས་དེ་ལྟར་བྱུང་མེད།
ཨུ་རུ་སུའི་རྒྱལ་ས་མོ་སི་ཀོ་དང་དེ་བཞིན་ཐུ་ཝ་དང་བྷུར་ཡ་བཅས་ཀྱི་རྒྱལ་སའི་ནང་བཀའ་སྤྱི་ཐུན་མོང་གི་བསྒྲགས་གཏམ་ཨུ་རུ་སུའི་སྐད་ཐོག་ཕབ་བསྒྱུར་ཞུས་ཏེ་མང་ཚོགས་ལ་བཀྲམ་ཡོད་པ་མ་ཟད། འཛམ་གླིང་མཉམ་འབྲེལ་རྒྱལ་ཚོགས་ལ་འབུལ་རྒྱུའི་ཞུ་སྙན་ལ་མང་ཚོགས་ཀྱི་ས་རྟགས་བསྡུ་རུབ་ཀྱི་ལས་འགུལ་ཞི་རྒྱ་ཆེ་བ་ཞིག་ཀྱང་སྤེལ་ཡོད་པ་བཅས།།
