༢༠༡༡ ཟླ་ ༡༠ ཚེས་ ༢༠ རེས་གཟའ་ཕུར་བུ།
༄༅། །ཕྱོགས་བཞུགས་སྤྱི་འཐུས་རོང་པོ་བློ་བཟང་སྙན་གྲགས་ལགས་ཀྱིས་གནས་ཚུལ་བཏང་འབྱོར་ལྟར་ན། ཕྱི་ཟླ་ ༡༠ ཚེས་༡༩ ཉིན་སྔ་དྲོ་ཆུ་ཚོད་༨།༠༠ ནས་དགོང་དྲོ་ཆུ་ཚོད་༥།༠༠ བར། བོད་ནང་གི་ཛ་དྲག་གནས་སྟངས་ཐད་གདུང་སེམས་མཉམ་སྐྱེ་དང་། རྒྱ་གཞུང་གི་གདུག་རྩུབ་སྲིད་བྱུས་ལ་ངོ་རྒོལ་ཆེད། བཀའ་སྤྱི་ཐུན་མོང་ནས་ཉིན་བརྒྱ་དུས་གཅིག་གི་ལམ་སྟོན་ཕེབས་དགོངས་བཞིན། འཇམ་མགོན་བསྟན་པའི་སྲོག་ཤིང་བྱང་རྩེ་ཆོས་རྗེ་རིན་པོ་ཆེ་བློ་བཟང་བསྟན་འཛིན་མཆོག་དང་། སེ་ར་བྱེས་སྨད་གཉིས་ཀྱི་མཁན་རིན་པོ་ཆེ་དང་། རྒྱུད་སྨད་མཁན་ཟུར་རིན་པོ་ཆེས་གཙོས་བྱེས་སྨད་གཉིས་ཀྱི་འདུས་མང་ཡོངས་དང་། སྔ་འགྱུར་རྣམ་གྲོལ་གླིང་དང་། བཀྲ་ཤིས་ལྷུན་པོ། ས་སྐྱ། བཀའ་རྒྱུད་དགོན་པ་གསུམ་གྱིས་གཙོས་པའི་སྐྱབས་གནས་དགེ་འདུན་གྱི་སྡེ་དང་། བོད་མི་མང་སྤྱི་འཐུས་རོང་པོ་བློ་བཟང་སྙན་གྲགས་ལགས་དང་། ལུགས་བདེ་གཉིས་ཀྱི་ས་གནས་འགོ་འཛིན་རྣམ་པ་གཉིས་ཀྱིས་གཙོས་གཞུང་ཞབས་ལས་བྱེད་དང་། རྒྱ་ཆེའི་སེར་སྐྱ་མང་ཚོགས། བཅས་སེར་སྐྱ་མི་གྲངས་ཆིག་ཁྲི་སུམ་སྟོང་བརྒལ་བ་འདུ་འཛོམས་ཀྱིས་ཉིན་བརྒྱ་དུས་གཅིག་གི་ཟས་བཅད་དང་མཆོད་འབུལ་སྨོན་ལམ་གནང་ཡོད་པ་མ་ཟད། སྐབས་དེར་སྤྱི་འཐུས་རོང་པོ་བློ་བཟང་སྙན་གྲགས་ལགས་ཀྱིས་བོད་ནང་གི་ཛ་དྲག་གི་གནས་སྟངས་དང་འབྲེལ་བའི་གསུང་བཤད་དང་། བོད་མི་མང་སྤྱི་འཐུས་ལྷན་ཚོགས་ཀྱི་གཏན་འབེབས་ལས་འགུལ་སྐབས་ཀྱི་བསྲུང་བྱ་ཁག་ལམ་སྟོན་སྒྲོགས་སྦྱང་གནང་ཡོད། ཕྱོགས་མཚུངས་ཉིན་རྒྱབ་ཆུ་ཚོད་ ༡།༠༠ ཐོག་རྒྱ་གར་གྱི་གསར་འགོད་པ་རྣམས་ལ་སྤྱི་འཐུས་རོང་པོ་བློ་བཟང་སྙན་གྲགས་ལགས་ཀྱིས་གསར་འགོད་གསལ་བསྒྲགས་གནང་ཡོད། རྒྱ་གར་གསར་འགོད་སྡེ་ཚན་མི་འདྲ་བ་སུམ་ཅུ་ལྷག་ལ་གནས་ཚུལ་ཁྱབ་བསྒྲགས་བྱུང་ཡོད་པ་བཅས། །
བཅུ་པའི་བཅུ་དགུ་ཉིན་སྦེལ་ཀོབ་སེར་སྐྱ་མང་ཚོགས་ཆིག་ཁྲི་སུམ་སྟོང་ལྷག་གིས་ཟས་བཅད་ངོ་རྒོལ་དང་མཆོད་འབུལ་སྨོན་ལམ་ཚོགས་པ།
གསར་གནས།
འབྲེལ་གནས།
