༢༠༡༡ ཟླ་ ༡༠ ཚེས་ ༢༤ རེས་གཟའ་ཟླ་བ།
༄༅། །འདི་ག་ཕྱི་དྲིལ་བོད་ཡིག་ཚན་པའི་གསར་འགོད་པས་ཀ་སྦུག་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༢༢ ཉིན་བཀའ་ཁྲི་བློ་བཟང་སེང་གེ་མཆོག་རྒྱ་གར་བྱང་ཤར་རྡོར་གླིང་དབུས་བོད་མིའི་གཏན་སློབ་དབུ་བརྙེས་ནས་ལོ་ངོ་ལྔ་བཅུ་འཁོར་བའི་མཛད་སྒོ་དང་བསྟུན་ཀ་སྦུག་ས་གནས་མི་མང་ལ་གསུང་བཤད་གནང་ཡོད།
དེ་ཡང་དེ་ཉིན་ཞོགས་པ་བཀའ་ཁྲི་མཆོག་ལ་ཀ་སྦུག་ས་གནས་འགོ་འཛིན་རྡོ་རྗེ་ལགས་ཀྱི་དབུས་ས་གནས་འཐུས་ཚོགས་དང་རང་བདེན་ཚོགས་ཆུང་། གཞོན་ནུ། བུད་མེད། དགོན་སྡེ་སོགས་ཚོགས་སྐྱིད་ཁག་གི་ལས་སྣེ་རྣམ་པ། ས་གནས་མི་མང་དང་སློབ་དགེ་སློབ་ཕྲུག་བཅས་ཀྱིས་ཕེབས་བསུ་གཟབ་རྒྱས་དང་སྦྲགས་དེ་ཉིན་སྔ་དྲོ་ཆུ་ཚོད་ ༡༠ ཐོག་ཀ་སྦུག་མ་ཎི་ཚོགས་ཁང་དུ་གདན་ཞུས་ཀྱིས་ཁྱོན་མི་གྲངས་ ༤༠༠ བརྒལ་བ་ལྷན་འཛོམས་ཐོག་ས་གནས་འགོ་འཛིན་རྡོ་རྗེ་ལགས་ཀྱིས་བཀའ་ཁྲི་མཆོག་ལ་འཚམས་འདྲིའི་མཇལ་དར་ཕུལ་རྗེས་གཞིས་ཆགས་ཀྱི་ད་ལྟའི་གནས་སྟངས་ངོ་སྤྲོད་མདོར་བསྡུས་ཤིག་ཞུས།
དེ་ནས་བཀའ་ཁྲི་མཆོག་གིས་གསུང་བཤད་གནང་དོན། དེ་རིང་འདི་ག་ཀ་སྦུག་ཏུ་བཅར་རྒྱུ་བྱུང་བར་ཧ་ཅང་དགའ་པོ་བྱུང་། ཆབ་སྲིད་ཀྱི་གནད་དོན་ཐོག་ནས་ཞུས་ན་༸གོང་ས་མཆོག་གིས་ཆབ་སྲིད་ཀྱི་སྐུ་དབང་མི་མང་གིས་འོས་འདེམས་བྱས་པའི་དབུ་ཁྲིད་ལ་གསོལ་རས་སྩལ་བར་བརྟེན། ཆབ་སྲིད་ཀྱི་ལེའུ་གསར་པ་ཞིག་སྒོ་ཕྱེ་བ་ལྟ་བུ་མིན་པར་བཀའ་ཁྲིའི་དམ་འབུལ་ཉིན་༸གོང་ས་མཆོག་སྐུ་ན་ཕྲ་བའི་སྐབས་རྒྱལ་ཚབ་སྟག་བྲག་རིན་པ་ཆེས་༸གོང་ས་མཆོག་ལ་བོད་ཀྱི་ཆབ་སྲིད་ཀྱི་སྐུ་དབང་ཕུལ་བ་དེ་ད་རེས་མི་མང་གིས་འོས་འདེམས་བྱས་པའི་སྲིད་སྐྱོང་ལ་གནང་བ་ཡིན་གསུང་པ་དེས་ག་རེ་མཚོན་གྱི་ཡོད་དམ་ཞེ་ན། བོད་ཀྱི་ལོ་རྒྱུས་ཀྱི་རང་བཞིན་ལྡན་པའི་ཁྲིམས་མཐུན་གྱི་ཆབ་སྲིད་བདག་དབང་མུ་མཐུད་དེ་གནས་ཀྱི་ཡོད་པ་མི་མང་ལ་གསལ་འདེབས་མཛད་ཡོད། དེ་བཞིན་དམ་འབུལ་རྗེས་བཀའ་ཤག་གི་བཀའ་བློན་བསྐོ་འཇོག་ཐད་འོས་བསྡུའི་སྐོར་བསྐྱོད་སྐབས་ཁས་ལེན་ཞུས་པ་ལྟར་ཕོ་མོ་རྒན་གཞོན་དང་ཆོལ་ཁ་དབྱེར་མེད་ཀྱི་བཀའ་བློན་དྲུག་བསྐོ་གཞག་བྱུང་བའི་ནང་། ལྷག་པར་དུ་ཕྱི་ལ་གདོང་སྟོན་རྒྱུའི་ཕྱི་དྲིལ་ལས་ཁུངས་དང་། ནང་གི་ཁྱིམ་འཛིན་བདག་པོའི་ནང་སྲིད་ལས་ཁུངས་ཀྱི་བཀའ་བློན་བུད་མེད་ཡིན། དེ་བཞིན་གཞི་རིམ་ལྟ་གྲུབ་སྐོར་ལ་ཆིག་སྒྲིལ་གྱི་སྡིངས་ཆའི་ཐོག་ནས་ཆོལ་ཁ་ཆོས་བརྒྱུད་དབྱེ་མེད་ཀྱི་རྡོག་རྩ་ཆིག་སྒྲིལ་དང་། གསར་གཏོད་ཀྱི་བྱེད་ཕྱོགས་ཐོག་ནས་མི་རབས་སྔོན་མས་དཀའ་སྤྱད་ལས་ཀའི་རྨང་གཞིའི་ཐོག་གསར་གཏོད་ཀྱི་ནུས་པ་བཟོ་རྒྱུ་དང་། རང་ཁ་རང་གསོའི་ཕུགས་ཀྱི་དམིགས་དོན་བཟུང་ཐོག་ཕྱིའི་རྒྱབ་སྐྱོར་ཆད་ནའང་འཚོ་བ་དང་ཆབ་སྲིད་ཀྱི་ལམ་ཕྱོགས་གང་ཐད་ནས་རང་ཚུགས་ཐུབ་པ་བྱ་རྒྱུ་དེ་ཡིན། བཀའ་ཤག་གི་ལས་གཞིའི་ནང་གཙོ་ཆེ་བ་ཞིག་ཤེས་ཡོན་ལ་ཤུགས་བརྒྱབ་སྟེ་རིགས་གཅིག་རྐང་འཛིན་པའམ་ཁྱད་ལས་པ་གང་མང་ཐོན་ཐུབ་ན་རྩ་དོན་ལ་ཕན་ཐོགས་ཡོང་རྒྱུར་དགེ་མཚན་ཡོད། འཛམ་གླིང་སྟེང་ཇིའུ་མི་རིགས་དེ་ཧ་ཅང་མི་འབོར་ཉུང་ཉུང་ཡིན་ཀྱང་ཤེས་ཡོན་གྱི་མ་རྩར་བརྩི་མཐོང་གིས་ཁྱད་ལས་པ་གང་མང་ཐོན་པ་ལས་ཨ་རིའི་སྤྱི་ཚོགས་ཀྱི་དཔལ་འབྱོར་དང་། ཤེས་ཡོན། སྒྱུ་རྩལ། དངུལ་རྩ། འཕྲོད་བསྟེན་སོགས་གལ་ཆེན་གནས་བབ་ཀྱི་རྐང་འཛིན་མི་སྣར་འགྱུར་བའི་ནུས་པས་ལོ་རེར་ཨི་སི་རལ་རྒྱལ་ཁབ་ལ་ཨ་རིས་དཔལ་འབྱོར་གྱི་རྒྱབ་སྐྱོར་ཤུགས་ཆེ་གནང་གི་ཡོད་པ་དཔེ་དོན་དང་འབྲེལ་ཏེ་ཇི་ཙམ་སྐྱབས་བཅོལ་དུ་གནས་དགོས་ཀྱང་རྩ་དོན་གང་ཐད་ནས་སྤྱི་ཚོགས་ཡོངས་ལ་ཤེས་ཡོན་གྱི་མ་རྩ་གལ་ཆེན་ཆགས་ཡོད། དེ་བཞིན་ཉེ་ལམ་བོད་ནང་མི་དགུ་ཙམ་གྱིས་རང་སྲོག་བློས་བཏང་བ་དེ་འཕྲོ་བརླག་མི་འགྲོ་སླད། ང་ཚོ་ཕྱིར་ཡོད་པ་ཚོས་ལས་འགུལ་རིམ་པ་སྤེལ་དགོས་སྲིད་ཀྱང་། བཀའ་ཤག་གི་ལམ་སྟོན་ནི་ཞི་བ། ཡུལ་ཁྲིམས་དང་མཐུན་པ། བཟང་སྤྱོད་ཆེ་མཐོང་གནང་རོགས་ཞུ་རྒྱུ་དང་། ཕྱི་ལོ་ ༡༩༡༣ ལོར་༸གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་ལོ་རྒྱུས་ནང་ཀ་སྦུག་ཏུ་སྐྱབས་བཅོལ་དུ་སྐུ་བཞུགས་མཛད་ཡོད་པ་ནས་བོད་ལ་མི་རབས་རྒན་པས་དཀའ་ངལ་འཛེམས་མེད་ཀྱིས་གདན་འདྲེན་ཞུས་པ་ལྟར། དེང་དུས་བོད་པའི་གནས་ཚད་མཐོ་བ་ཡོད་པར་བརྟེན། ༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་བོད་ཀྱི་རྒྱལ་སར་གདན་འདྲེན་ཞུ་ཐུབ་རྒྱུར་ང་རང་ཡིད་ཆེས་ཡོད། མི་མང་ཡོངས་ཀྱི་ཆིག་སྒྲིལ་དང་མཉམ་རུབ་གནང་རོགས། ཞེས་སོགས་ཀྱི་གསུང་བཤད་གནང་རྗེས་ཀ་སྦུག་གཏན་སློབ་ཀྱི་སློབ་སྤྱི་སྐལ་བཟང་རྡོ་རྗེ་ལགས་ཀྱི་ཐུགས་རྗེ་ཆེ་ཞུས་ཏེ་གྲོལ། ཀ་སྦུག་ས་གནས་འགོ་འཛིན་ཁྱབ་ཁོངས་སུ་ཁ་འཐོར་ས་གནས་བདུན་དང་། དགོན་སྡེ་གྲྭ་ཚང་བརྒྱད་བཅས་ཀྱི་མི་འབོར་གྲངས་ ༢༠༠༧ ཡོད་པ་དང་། མི་མང་དེ་དག་གི་འཚོ་ཐབས་ནི་ཚོང་ལས་གཙོ་བོ་གྱུར་པའི་སྤོས་དང་། ཐུག་པ། ཞྭ་མོ་ཚེ་རིང་སྐྱིན་ཁེབས་སོགས་ཀྱི་བཟོ་ལས་ཐོག་འཚོ་བ་རང་སྐྱོང་ཡིན་འདུག་པ་བཅས།།
