༢༠༡༡ ཟླ་ ༡༠ ཚེས་ ༡༣ རེས་གཟའ་ཕུར་བུ།
༄༅། །འདི་གར་ཀོ་ལེ་གྷལ་དོན་ལྡན་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཀོ་ལེ་གྷལ་དོན་ལྡན་གླིང་གཞིས་ཆགས་སུ་ཕྱི་ལོ་ ༢༠༡༡ ཟླ་ ༡༠ ཚེས་ ༡༡ ཉིན་གྱི་སྔ་དྲོ་ཆུ་ཚོད་༩ པར་དབུ་འཛུགས་ཀྱིས་ཉིན་དགུང་ཆུ་ཚོད་ ༡ བར་ཁྱབ་ཁོངས་དགོན་སྡེ་ཁག་གི་བླ་སྤྲུལ་དང་དགེ་འདུན་བརྒྱ་སྐོར་ཞིག དེ་བཞིན་གཞིས་ཆགས་ཀྱི་གྲོང་སྡེ་ ༢༢ ཀྱི་མང་ཚོགས་བཅས་ཁྱོན་མི་གྲངས་ ༦༠༠ ཙམ་གཞིས་ཆགས་ཀྱི་ཚོགས་ཁང་ཆེན་མོའི་ནང་འདུས་འཛོམས་ཀྱིས་ཉེ་ལམ་བོད་མདོ་སྨད་རྔ་པ་དང་དཀར་མཛེས་ཁུལ་དུ་རྒྱལ་གཅེས་དཔའ་བོ་བདུན་གྱིས་བོད་བསྟན་སྲིད་མི་རིགས་ཀྱི་དོན་དུ་རང་ལུས་ཞུགས་མེར་ཕུལ་བར་གདུང་སེམས་མཉམ་སྐྱེ་མཚོན་ཆེད་དང་༸གོང་ས་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་པ་དང་བོད་དོན་བདེན་མཐའ་མྱུར་དུ་སེལ་ཐབས་བཅས་ཀྱི་སླད་གཞིས་གྲོང་རེ་ནས་མཆོད་མེ་བརྒྱ་མཆོད་རེ་ཕུལ་ཏེ་སྨོན་ལམ་གསུང་འདོན་རྒྱ་ཆེ་གནང་ཡོད་འདུག