༢༠༡༡ ཟླ་ ༡༠ ཚེས་ ༣༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༣༠ ཉིན་ཉི་ཧོང་གི་གྲོང་ཁྱེར་ཨོ་ས་ཀའི་དེང་རབས་རིག་གསར་གྱི་འཕྲུལ་ཆས་ཚད་དང་ལྡན་པའི་སྒྱུ་རྩལ་འོག་བསྐྲུན་པའི་མ་ཡི་ཤི་མའི་ཚོགས་ཁང་ཆེན་མོའི་ནང་ཉི་ཧོང་དང་ཀོ་རི་ཡའི་དད་ལྡན་ཆོས་ཞུ་བ་སྟོང་ཕྲག་མང་པོར། ༸གོང་ས་མཆོག་གིས་ཉི་ཧོང་གི་ཀོ་ཡ་སན་གཙུག་ལག་སློབ་གྲྭ་བཙུགས་ཏེ་ལོ་ ༡༢༥ འཁོར་བའི་དུས་དྲན་གྱི་མཛད་སྒོ་དང་སྦྲགས་ཤེས་རབ་སྙིང་པོའི་བཀའ་ཆོས་དང་། མི་ཚེའི་དཀའ་ངལ་ལས་རྒྱལ་ཐབས། ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད། མཛད་སྒོའི་ཐོག་མར་མགོན་པོ་གང་ཉིད་མཆོག་གིས་དབུ་འཛུགས་ཐོག་ཤེས་རབ་སྙིང་པོ་གསུང་འདོན་གནང་།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་རབ་སྙིང་པོའི་ཆོས་འབྲེལ་སྐབས་བྱམས་བརྩེ་དང་སྟོང་ཉིད་བཅས་ཀྱི་སྐོར་བཀའ་སློབ་སྩལ་དོན། ནང་ཆོས་བརྗོད་སྐབས་སྨོན་ལམ་རྒྱག་རྒྱུ་ཙམ་དང་འདོན་པ་འདོན་རྒྱུ་ཙམ་ཞིག་མིན། དེ་ནི་ཕྱིའི་རྣམ་པ་ཙམ་ཡིན། སྟོང་ཉིད་བརྗོད་སྐབས་གང་ཡང་མེད་པའི་དོན་མིན། དཔེར་ན། ངོས་རང་འདིར་བསྡད་ཡོད། འོ་ན་ཏཱ་ལའི་བླ་མ་གང་དུ་ཡོད་བརྗོད་ན། ངོས་ཀྱི་ལུས་པོའི་ཆ་ཤས་གང་ཞིག་ཏཱ་ལའི་བླ་མ་ཡིན། དེ་བཞིན་ཁྱེད་ཚོས་སོ་སོའི་ལུས་པོར་བསམ་བློ་གཏོང་སྐབས་རང་གི་ལུས་པོའི་ཆ་ཤས་གང་ཞིག་རང་ཉིད་ཡིན་པ་ངོས་འཛིན་བྱེད་བཞིན་ཡོད། ང་ཚོའི་རྒྱུད་ལ་ང་ཞེས་པའི་ངར་འཛིན་ཡོད་པ་དེ་རང་གི་ལུས་དང་སེམས་གང་ནས་ཡོང་བཞིན་ཡོད་ཅེས་སོགས་ཀྱི་བཀའ་སློབ་སྩལ། ཕྱོགས་མཚུངས་སྐབས་དེར་མགོན་པོ་གང་ཉིད་མཆོག་གིས་བདེན་བཞིའི་རྣམ་གཞག་སྐོར་བཀའ་སློབ་སྩལ་དོན། བཅོམ་ལྡན་འདས་ལ་སྨོན་ལམ་བརྒྱབ་པ་ཙམ་གྱི་མི་ཆོག ནང་གི་ཞི་བདེ་སྐྲུན་པར་སེམས་ནང་དུ་ཕྱོགས་ནས་བསམ་བློ་གཏིང་གཟབ་གཏོང་དགོས། འཇིག་རྟེན་བཀོད་པ་པོ་ཁས་མི་ལེན་མཁན་ཚོས་སེམས་ནང་གི་ནུས་པའི་འབྱུང་ཁུངས་དེ་གང་ཟག་རང་ཉིད་གཙོ་བོ་ཆགས་པ་མ་གཏོགས། ཕྱི་ནས་དཀོན་མཆོག་གི་བྱིན་རླབས་ལྟ་བུ་དེ་འདྲ་ཁས་ལེན་བྱེད་ཀྱི་མེད་ཅེས་སོགས་ཀྱི་བཀའ་སློབ་སྩལ། དེ་རྗེས་ཉིན་གུང་ལྗགས་སྨིན་གྲུབ་བསྟུན་མགོན་པོ་གང་ཉིད་མཆོག་གིས་མང་ཚོགས་ཀྱི་དྲི་བར་བཀའ་ལན་སྩལ། སྐབས་དེར་མང་ཚོགས་རྣམས་ཀྱིས་ཤེས་རབ་སྙིང་པོའི་བཀའ་ཆོས་དང་འབྲེལ་བའི་སྟོང་ཉིད་དང་མི་རྟག་པ། ཆོས་ལུགས་རིས་མེད་ཀྱི་ལྟ་གྲུབ་བཅས་ཀྱི་སྐོར་ལ་དྲི་བ་ཕུལ་བར་༸གོང་ས་མཆོག་གིས་བཀའ་ལན་ཟབ་རྒྱས་སྩལ་ཡོད་པ་བཅས།།
