༢༠༡༡ ཟླ་ ༡༠ ཚེས་ ༢༨ རེས་གཟའ་པ་སངས།
༄༅། །དབྱིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་སེནཏ་ཇོན་སི་ཝེལ་སི་(St John Wales)ཞེས་པའི་ཡི་ཤུའི་རོགས་ཚོགས་ཀྱི་དྭངས་བླང་ཚོགས་མི་གཞོན་སྐྱེས་ཁག་གཅིག་དེང་སྐབས་རྒྱ་གར་བྱང་ཕྱོགས་ཧི་མ་ཅལ་མངའ་སྡེའི་ནང་སློབ་ཕྲུག་དང་། སྨན་ཞབས་པ་སོགས་འབྲེལ་ཡོད་ཚོར་མྱུར་སྐྱོབ་སྨན་བཅོས་བྱེད་སྟངས་ཀྱི་ཟབ་སྦྱོང་སྤྲོད་བཞིན་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༡ ཟླ་ ༡༠ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁོང་རྣམ་པ་ཚོར་མཇལ་ཁ་སྩལ་ཡོད་པ་མ་ཟད སྐབས་དེར་བཀའ་སློབ་ཕེབས་དོན། ཁྱེད་རང་ཚོའི་ཚོགས་པའི་ཐོག་ནས་འཛམ་གླིང་ཁྱོན་ཡོངས་ལ་ཞབས་འདེགས་ཧུར་ཐག་ཞུ་གི་ཡོད་པ་ངོས་ཀྱིས་ཤེས་རྟོག་ཡོད་ལ་ད་རེས་འདི་ཁུལ་ཁྱེད་རང་ཚོས་ང་ཚོ་བོད་མི་ཚོར་ཡང་ཟབ་སྦྱོང་སྤྲོད་འཆར་འདུག་པས་ངོས་ཀྱིས་བསྔགས་བརྗོད་ཡོད་ཅེས་བཀའ་སློབ་ཕེབས་ཡོད།
དེ་བཞིན་ཁོང་རྣམ་པས་རྡ་རམ་ས་ལའི་བོད་ཁྱིམ་སློབ་ཕྲུག་དང་འབྲེལ་ཡོད་སྨན་ཞབས་ཚོར་ཟབ་སྦྱོང་སྤྲོད་རྒྱུ་ཡིན་འདུག
རོགས་ཚོགས་དེ་བཞིན་འཛམ་གླིང་ཁྱོན་ཡོངས་ལ་ཛ་དྲག་མྱུར་སྐྱོབ་ཀྱི་སྨན་བཅོས་བྱེད་སྟངས་ཐོག་རོགས་སྐྱོར་སྤྲོད་མཁན་གྱི་ཚོགས་པ་ཆེ་ཤོས་གྲས་ཤིག་ཡིན་འདུག་པ་བཅས། །
