༢༠༡༡ ཟླ་ ༡༠ ཚེས་ ༡༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོའི་ནོ་བེལ་ཞི་བེའི་གཟེངས་རྟགས་བཞེས་མཁན་ལྕམ་ཨེ་ལན་ཇོན་སན་མཆོག་དང་ལེ་མ་ཇི་བྷོ་བེ་མཆོག ཏ་ཝ་ཀུལ་ཀར་མན་མཆོག་བཅས་ལ་འཚམས་འདྲིའི་གསུང་འཕྲིན་སྩལ་བའི་ནང་འཁོད་དོན།
ད་ལྟའི་དུས་སྐབས་འདིར་ཤེས་ཡོན་དང་རྣམ་དཔྱོད་ཡོད་མེད་ལས་ལུས་སྟོབས་ཆེ་ཆུང་གི་ཐོག་ནས་མང་ཚོགས་ཀྱི་འགོ་ཁྲིད་འོས་མིན་ཐག་གཅོད་བྱེད་ཀྱི་མེད། དེར་བརྟེན་བུད་མེད་ཚོས་སྤྱི་ཚོགས་ཀྱི་ལས་དོན་ཚང་མའི་ནང་ཆ་ཤས་དང་འགན་ཁུར་སྔར་བས་མང་བ་དང་ཤུགས་ཆེ་རུ་གཏོང་དགོས། དེ་ལྟར་བྱུང་ཚེ་འདྲ་མཉམ་དང་བྱམས་བརྩེ་ལྡན་པའི་སྤྱི་ཚོགས་ཤིག་བསྐྲུན་རྒྱུར་ངོས་ལ་ཡིད་ཆེས་ཡོད།
དུས་རབས་ ༢༡ འདིའི་ནང་ང་ཚོར་འཆར་སྣང་གསར་པ་ཞིག་ལག་བསྟར་བྱ་རྒྱུའི་འགན་ཞིག་ཡོད་པ་དེ་ནི་རྒྱལ་ཁབ་དང་ཚོགས་པ། དེ་བཞིན་མི་སྒེར་ཕན་ཚུན་གྱི་རྩོད་རྙོག་དེ་དག་གྲོས་མོལ་གྱི་ལམ་ནས་སེལ་བ་མ་གཏོགས་དམག་འཐབ་རྩ་བ་ནས་སྤོང་རྒྱུ་དང། འགྲོ་བ་མི་རིགས་ཕན་ཚུན་ཉིན་རེའི་འཚོ་བའི་ལས་དོན་གྱི་འབྲེལ་ལམ་དེ་དག་འཚེ་མེད་ཞི་བའི་ཐབས་ལམ་གཙོ་བཟུང་ཐོག་སྤེལ་རྒྱུ་དེ་ཡིན། དེ་འདྲ་ཞིག་ཡོང་བར་བུད་མེད་ཚོའི་ལས་འགན་དེ་བཞིན་ཧ་ཅང་གལ་ཆེན་པོ་ཆགས་ཡོད།
མི་རེ་ཟུང་ཞིག་ལས་མེད་ཀྱང་ཁོང་ཚོས་ཞི་བདེ་སྐྲུན་ཐབས་སུ་འགན་ཁུར་ལྡན་པའི་ཐོག་ནས་གཞན་ལ་བྱམས་བརྩེ་བྱས་པ་ཡིན་ན། དེའི་ཚོད་ཀྱིས་རང་ཉིད་གང་དུ་གནས་སའི་ཁོར་ཡུག་དེར་ནུས་པ་ཞིག་ཏན་ཏན་ཐོན་རྒྱུ་ཡིན་པ་ངོས་ལ་ཡིད་ཆེས་ཡོད། ད་ཐེངས་ནོ་བེལ་ཞི་བདེའི་གཟེངས་རྟགས་ཐོབ་མཁན་རྣམ་པའི་བྱས་རྗེས་ལ་བརྟེན་ནས་བུད་མེད་ཚོས་གཞན་ལ་སྙིང་སྟོབས་སྤེལ་རྒྱུ་དང་འཇོན་ཐང་གང་གི་ཆ་ནས་སྐྱེས་པ་དང་འདྲ་མཉམ་ཡོད་པ་དང། སྤྱི་ཚོགས་ནང་འགོ་ཁྲིད་ཀྱི་འགན་འཁྱེར་རྒྱུ་དེ་སྐྱེས་པ་དང་གཅིག་མཚུངས་ཡོད་པ་བསྟན་ཡོད། དེར་བརྟེན་ནོ་བེལ་ཚོགས་ཆུང་གིས་བུད་མེད་ཚོས་སྤྱི་ཚོགས་ནང་འགོ་འཁྲིད་རྒྱུ་དེ་བུད་མེད་ཙམ་མ་ཟད། སྤྱི་ཚོགས་ཁྱོན་ཡོངས་ལ་ཧ་ཅང་གལ་ཆེན་པོ་ཆགས་ཡོད་པ་ངོས་འཛིན་གནང་བ་ཞིག་ཡིན་ཞེས་བཀའ་སློབ་སྩལ།
མཆན། གསུང་འཕྲིན་ངོ་མ་དབྱིན་ཡིག་ནང་ཡོད་པ་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་གཞི་རྩ་དབྱིན་ཡིག་ལ་རྩ་འཛིན་ཡོང་བ་ཞུ།།
