༢༠༡༡ ཟླ་ ༡༠ ཚེས་ ༤ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྒྲུབ་ཞག་སྔོན་དུ་གཏོང་གནང་མཛད་དེ་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་དད་ལྡན་ཆོས་ཞུ་བ་རྣམ་པས་གཙོས་རང་རིགས་བཅས་ཁྱོན་མི་གྲངས་ ༦༠༠༠ བརྒལ་བར་༸གོང་ས་ལྔ་པ་ཆེན་པོ་མཆོག་གིས་མཛད་པའི་དག་སྣང་གསང་བ་རྒྱ་ཅན་ལས་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་བཀའ་དབང་ཟབ་མོ་དང་དགེ་བསྙེན་གྱི་སྡོམ་པ་འབོགས་ཆོག་སྩལ་ཡོད། དེ་རྗེས་མགོན་པོ་གང་ཉིད་མཆོག་གིས་བཀའ་སློབ་ཕེབས་དོན། དེ་རིང་འདིར་བོད་རིགས་ཟེར་ནའང་མི་འདུག གང་ལྟར་ཆོས་ཞུ་བ་ཁྱོན་ཆེན་པོ་ཞིག་ཕེབས་ཡོད་འདུག ཐུགས་རྗེ་ཆེན་པོ་འཇིག་རྟེན་དབང་ཕྱུག་༸གོང་ས་ལྔ་པ་ཆེན་པོ་ནས་བཟུང་༸རྒྱལ་དབང་གི་ཕ་ཆོས་ལྟར་རེད། ༸གོང་ས་སྐུ་གོང་མའི་སྐབས་ནས་བཟུང་སྟེ་ཡར་ངོ་མར་ངོའི་ཚེས་བཅུ་འཆར་ཅན་ལ་ཐུགས་རྗེ་ཆེན་པོ་འཇིག་རྟེན་དབང་ཕྱུག་ཐོག་ནས་སྐུ་གོང་མ་ཚོས་གནང་གི་ཡོད། ངོས་རང་སྔོན་མ་རྒྱ་གར་དུ་སླེབས་མ་ཐག་ལ་དཔེ་ཆ་མེད། དེ་རྗེས་བལ་ཡུལ་ས་མཚམས་ཞིག་ནས་ངོས་ལ་དཔེ་ཆ་ཞིག་རག་བྱུང་། དཔེ་ཆ་རག་སྟངས་དེ་ཡང་གློ་དམག་སྒར་དུ་ཡོད་པའི་ཁམས་པ་ཞིག་གིས་ཆོས་མཇལ་དུ་ཕྱིན་ཏེ་དཔེ་ཆ་ཞིག་འཁྱེར་ཡོང་བ་རེད་ཅེས་བརྗོད་ཀྱི་འདུག རྗེས་སུ་འདིར་སླེབས་དུས་དཔེ་ཆ་དེ་གསང་བ་རྒྱ་ཅན་གྱི་དཔེ་ཆ་རེད། དེ་ཡང་ཐོག་མར་མི་དེས་ཁྲི་བྱང་རིན་པོ་ཆེར་ཕུལ་འདུག ཁྲི་བྱང་རིན་པོ་ཆེས་དཔེ་ཆ་དེ་ཐུན་མོང་མ་ཡིན་པའི་ཕྱག་དཔེ་དཀོན་པོ་ཞིག་ཆགས་ཡོད་པས་སྐུ་མདུན་ལ་ཕུལ་ཞེས་བཀའ་གནང་འདུག དཔེ་ཆ་དེ་མ་འབྱོར་བའི་དགོང་མོར་ངོས་ལ་རྨི་ལམ་ཞིག་བཏང་བྱུང། དེ་འདྲའི་ཐོག་ནས་བསྐྱར་དུ་གསང་བ་རྒྱ་ཅན་གྱི་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་ཚེས་བཅུ་འདོན་རྒྱུ་འགོ་ཚུགས་པ་རེད། ཉེར་ལྔ་དེ་རྟ་མགྲིན་ཁམས་གསུམ་ཟིལ་གནོན་ཐོག་ནས་བཟུང་རྒྱུ་འཆར་ཅན་རེད། ངོས་ཀྱིས་དེ་འདོན་གྱི་ཡོད། དེ་བཞིན་དུས་དུས་སུ་སྤྱན་རས་གཟིགས་འཇིག་རྟེན་དབང་ཕྱུག་གི་བསྙེན་པ་བསྐྱལ། དེའི་སྔགས་གཙོ་བོ་ཡིག་དྲུག་བསགས་ཏེ་སྟབས་བདེ་པོ་ཧ་ཅང་ཡག་པོ་འདུག དེ་རིང་བོད་འབངས་ཆ་ནས་བཤད་ནའང་བོད་སྤྱིའི་བསྟན་སྲིད་དང་འབྲེལ་བ་ཡོད་པ་ཞིག་ཆགས་ཡོད། དེ་རིང་འདིར་འཇིག་རྟེན་དབང་ཕྱུག་གི་རྒྱུན་ཁྱེར་མདོར་བསྡུས་འཇམ་དབྱངས་མཁྱེན་བརྩེ་དབང་པོས་མཛད་པའི་གཏེར་མཛོད་ནང་ཡོད་པ་དེ་དཔར་བརྒྱབ་སྟེ་བཀྲམ་རྒྱུ་དེ་རེད། ཁྱེད་རང་ཚོས་དེ་རིང་ནས་བཟུང་སྟེ་གཙོ་བོ་སྔགས་བྱང་སེམས་ཀྱི་སྡོམ་པ་བླངས་ཡོད་པར་བརྟེན། རྩ་ལྟུང་སྲུང་རྒྱུ་དེ་དག་དང་སྔགས་སྡོམ་ནང་གི་རིགས་ལྔ་སོ་སོའི་དམ་ཚིག་ནང་ལ་ཉིན་རེ་བཞིན་མཆོད་པ་འབུལ་རྒྱུ་ལ་སོགས་པ་དེ་འདྲ་མང་པོ་ཞིག་ཡོད་སྟབས། ནམ་རྒྱུན་བླ་མ་གོང་མ་ཚོའི་ཕྱག་བཞེས་ལ་ཐུན་དྲུག་བླ་མའི་རྣལ་འབྱོར་མཛད་དེ་ཉིན་ལན་གསུམ་མཚན་ལན་གསུམ་ངོ་བགྲངས་དང་དྲན་གསོ་བྱེད་རྒྱུ་དེ་ཡིན་པས་ཐུན་དྲུག་འདོན་དགོས། དེའི་ཐོག་སྤྱན་རས་གཟིགས་ཀྱི་བདག་བསྐྱེད་མདོར་བསྡུས་བཏོན་པའི་ཐོག་མ་ཎི་གསག་སྟེ་གོང་དུ་དབང་ཐོབ་པའི་རྗེས་འབྲེལ་རྒྱུན་དུ་ཕྲན་བུ་ཉམས་ལེན་བྱེད་རྒྱུ་བྱུང་བ་ཡིན་ན་ཡག་པོ་ཡོང་གི་རེད། གཞན་དབང་ཐོབ་ཙམ་བྱས་ཏེ་བསྟན་རྒྱུ་གང་ཡང་མེད་པར་བསྡད་ན་དགོས་པ་མེད། དེ་བློ་ལ་ངེས་པ་བྱེད་དགོས་ཐུགས་རྗེ་ཆེ། ཞེས་བཀའ་སློབ་སྩལ་ཏེ་ཉིན་བཞི་པའི་བཀའ་ཆོས་མཇུག་སྒྲིལ་མཛད་ཡོད་པ་བཅས། །