༢༠༡༡ ཟླ་ ༩ ཚེས་ ༡༥ རེས་གཟའ་ཕུར་བུ།
༄༅།  །འདི་གར་ཕྱི་ལོ་ ༢༠༡༡ ཟླ་ ༩ ཚེས་ ༡༥ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༠༠ ལོར་སོག་རྫོང་ཁོངས་སུ་བོད་རང་བཙན་གྱི་སྦྱར་ཡིག་ཁྱོན་ཆེ་འགྲེམས་བཀྲམ་བྱས་པའི་གནས་ཚུལ་ཐོན་རྗེས་སོག་ཙན་དན་དགོན་གྱི་དགེ་འདུན་ཆོས་དབྱིངས་མཁས་གྲུབ་ལགས་དང་ངག་དབང་འགྱུར་མེད་ལགས།  བསྟན་འཛིན་ཆོས་དབང་ལགས། ཡེ་ཤེས་བསྟན་འཛིན་ལགས།  མི་སྐྱ་ཚེ་རིང་ལྷ་མགོན་ལགས། ཁྲ་རུ་ཡེ་ཤེས་ལགས་སོགས་མི་སྣ་ཁག་གཅིག་གློ་བུར་དུ་འབྲེལ་ཡོད་སྤྱི་བདེ་ཚན་པས་འཛིན་བཟུང་བྱས་པ་མ་ཟད།  འཛིན་བཟུང་བྱས་རྗེས་གྲྭ་ཤག་དང་སྡོད་གནས་སོགས་སུ་སྔོག་བཤེར་བྱེད་སྐབས་བོད་རང་བཙན་སྐོར་གྱི་སྦྱར་ཡིག་དང་། སྦྱར་ཡིག་དཔར་འགྲེམས་བྱ་རྒྱུའི་ཤིང་དཔར།  ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་འཁོར་ཐག་སོགས་ཐོན་པར་བརྟེན། མཐར་ནག་ཆུ་ས་ཁུལ་འབྲིང་རིམ་མི་དམངས་ཁྲིམས་ཁང་ཟེེར་བ་ནས་དགེ་འདུན་ཆོས་དབྱིངས་མཁས་གྲུབ་ལགས་ཚེ་བཙོན་དང་།  བསྟན་འཛིན་ཆོས་དབང་ལགས་སུ་དུས་བཀག་བཙོན་འཇུག་ལོ་ ༣  ངག་དབང་འགྱུར་མེད་ལགས་སུ་དུས་བཀག་བཙོན་འཇུག་ལོ་ ༡༥  ཡེ་ཤེས་བསྟན་འཛིན་ལགས་སུ་དུས་བཀག་བཙོན་འཇུག་ལོ་ ༡༠ ཚེ་རིང་ལྷ་མགོན་ལགས་སུ་བཀག་བཙོན་འཇུག་ལོ་ ༡༥  ཁྲ་རུ་ཡེ་ཤེས་ལགས་སུ་དུས་བཀག་བཙོན་འཇུག་ལོ་ ༥ བཅས་ཀྱི་ཁྲིམས་ཐག་བཅད་དེ་བོད་རང་སྐྱོང་ལྗོངས་བཙོན་ཁང་ཨང་དང་པོའམ་གྲྭ་བཞི་བཙོན་ཁང་དུ་ངལ་རྩོལ་སྒྱུར་བཀོད་བྱེད་པར་བཏང་ཡོད།  རྗེས་སུ་གྲྭ་བཞི་བཙོན་ཁང་དུ་ཡོད་པའི་ཆབ་སྲིད་བཙོན་པ་རྣམས་ཆུ་ཤུལ་བཙོན་ཁང་དུ་སྤོས་རྗེས་གོང་གསལ་བཙོན་པ་རྣམས་ཀྱང་ཆུ་ཤུལ་བཙོན་ཁང་དུ་སྤོས་ཡོད། ཁོང་རྣམས་བཙོན་ཁང་དུ་སྡོད་རིང་ཚད་ལས་འདས་པའི་ཉེས་རྡུང་ཕོག་པ་དང་།  ཟས་བཅུད་མི་འདེང་བ།  ནད་མནར་བྱུང་ཡང་སྨན་བཅོས་ཚུལ་བཞིན་བྱེད་ཀྱི་མེད་པ་སོགས་ལས་ཆབ་སྲིད་བཙོན་པ་རྣམས་བཙོན་ནས་གློད་བཀྲོལ་ཐོབ་རྗེས་ཀྱང་། ལུས་པོ་རྦད་དེ་ནད་གཅོང་དུ་གྱུར་བ་མ་ཟད། ལུས་པོ་ནད་གཅོང་དུ་གྱུར་ཟིན་སྟབས་ནད་གཞི་ངོས་མ་འཕྲོད་པར་བརྟེན། ལུས་གཅོང་འོག་འདས་གྲོངས་སུ་གྱུར་དང་འགྱུར་མུས་ལྟར།  གོང་གསལ་ཆབ་སྲིད་བཙོན་པ་དེ་དག་ཁོངས་ནས ༢༠༡༠ ཟླ་ ༡༢ པའི་ནས་དུས་བཀག་གཙང་སྟེ་གློད་བཀྲོལ་ཐོབ་པའི་ཆབ་སྲིད་བཙོན་ཟུར་དགེ་འདུན་ཡེ་ཤེས་བསྟན་འཛིན་ནམ་དབང་གྲུབ་ལགས་ཕྱི་ཟླ་ ༩ ཚེས་ ༧ ཉིན་རང་ཁྱིམ་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག་པ་བཅས། །