༢༠༡༡ ཟླ་ ༩ ཚེས་ ༢༩ རེས་གཟའ་ཕུར་བུ།

༄༅། །མེཀ་སི་ཀོའི་ལྷོ་ངོས་སུ་ཆགས་པའི་མེཀ་སི་ཀོ་རྒྱལ་ཡོངས་རང་སྐྱོང་གཙུག་ལག་སློབ་གྲྭ་ཆེན་མོའི་(National Autonomous University of Mexico)ཉེ་འགྲམ་དུ་རྟེན་གཞི་བྱས་པའི་པ་ལ་ཛ་ལོ་རེ་ཊོའི་ནང་(Plaza Loreto)ཕྱི་ལོ་ ༢༠༡༡ ཕྱི་ཟླ་ ༨ ཚེས་ ༢༠ ནས་འགོ་འཛུགས་གནང་བའི་བོད་ཀྱི་ཆོས་དང་རིག་གཞུང་ཐོག་པར་རིགས་དང་རིས་མོའི་སྒྱུ་རྩལ་གྱི་ལམ་ནས་བོད་དང་བོད་ཀྱི་ཚོན་མདངས། ཞེས་པའི་པར་རིགས་འགྲེམས་སྟོན་དེ་བཞིན་ཕྱི་ལོ་ ༢༠༡༡ ཟླ་ ༩ ཚེས་ ༢༩ ཉིན་མཇུག་སྒྲིལ་གནང་རྒྱུ་ཡིན་འདུག པར་རིགས་དང་རིས་མོའི་སྒྱུ་རྩལ་གྱི་ལམ་ནས་འགྲེམས་སྟོན་དེའི་ནང་བོད་ཀྱི་ཆོས་དང་རིག་གཞུང།

༸གོང་ས་༸སྐྱབས་མགོན་སྐུ་ཕྲེང་ ༡༤ པ་ཆེན་པོ་མཆོག་གི་མཛད་རྣམ་ངོ་སྤྲོད་སོགས་ཡོད་འདུག པར་རིགས་དང་རིས་མོའི་སྒྱུ་རྩལ་དེ་དག་མེཀ་སི་ཀོ་བོད་ཁང་དང་མེཀ་སི་ཀོའི་སྒྱུ་རྩལ་བ་ཁག་གཅིག་གིས་གོ་སྒྲིག་དང་མཐུན་འགྱུར་ཞུས་པ་ཞིག་ཡིན་འདུག སྤྱིར་འགྲེམས་སྟོན་དེ་བཞིན་མེཀ་སི་ཀོ་བོད་ཁང་གིས་གོ་སྒྲིག་ཞུས་པ་ཞིག་ཡིན་འདུག
པར་རིགས་འགྲེམས་སྟོན་གྱི་མཇུག་སྡོམ་མཛད་སྒོའི་ཉིན་ལེ་ཊིན་ཨ་མི་རི་ཀ་དང་བོད། ཅེས་པའི་དཔེ་དེབ་གཅིག་དབུ་འབྱེད་གནང་རྒྱུ་ཡིན་འདུག དཔེ་དེབ་དེ་བཞིན་ཡུ་རུ་གོ་བའི་(Uruguay)རྩོམ་པ་པོ་སྐུ་ཞབས་ཨ་ལོ་མ་སེལ་ནེ་སིས་(Aloma Selanes)ཞེས་པས་བརྩམས་པ་ཞིག་ཡིན་འདུག དཔེ་དེབ་དེའི་ནང་བོད་ཀྱི་ལོ་རྒྱུས་དང་ནང་ཆོས་ངོ་སྤྲོད། དེ་བཞིན་རྒྱལ་ཁབ་ ༡༠ ཙམ་ནས་མང་ཚོགས་གྲངས་གྲངས་ ༤༠ ཙམ་གྱི་བོད་ཐོག་མཐོང་ཚུལ་ཇི་ཡོད་སོགས་འཁོད་ཡོད། ད་ལྟའི་ཆར་དཔེ་དེབ་དེ་བཞིན་པོར་ཅུ་གི་དང་སི་པེན་(Portugese /Spanish)སྐད་ཡིག་ནང་བསྒྱུར་ཟིན་ཡོད་འདུག
ཕྱོགས་མཚུངས་མེཀ་སི་ཀོའི་སྙན་གྲགས་ཆེ་བའི་འགྲེམས་སྟོན་ཁང་རྗེས་དྲན་དང་བཟོད་བསྲན་(Museum of Memory and Tolerance)ཞེས་པ་དེའི་ནང་འབྱུང་འགྱུར་ཕྱི་ཟླ་ ༡༠ ནས་རེས་གཟའ་སྤེན་པ་ནམ་ཡིན་མང་ཚོགས་ལ་བོད་དོན་དང་འབྲེལ་བའི་དངོས་བྱུང་གློག་བརྙན་བསྟན་རྒྱུ་མ་ཟད། བོད་དོན་ཐོག་བགྲོ་གླེང་ཚོགས་འདུ་སོགས་གོ་སྒྲིག་ཞུ་འཆར་ཡོད་འདུག ལས་རིམ་དེ་དག་གོ་སྒྲིག་གནང་མཁན་མེཀ་སི་ཀོ་བོད་ཁང་ཡིན་འདུག་པ་བཅས།།