༢༠༡༡ ཟླ་ ༩ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༢༥ ཉིན་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་གཉིས་ཀྱིས་རྒྱ་ནག་གཞུང་གིས་སྲིད་བྱུས་ལ་ངོ་རྒོལ་ཆེད་རང་ལུས་ཞུགས་འབུལ་གནང་རྗེས་དགེ་འདུན་པ་གཅིག་འདས་གྲོངས་སུ་གྱུར་བ་དང་གཞན་དེར་རྨས་སྐྱོན་ཚབས་ཆེ་ཕོག་པའི་གནས་ཚུལ་ཐོན་འཕྲལ་བཀའ་ཤག་གིས་གསར་འགོད་གསལ་བསྒྲགས་ཤིག་སྤེལ་བའི་ནང་འཁོད་དོན།
དེ་རིང་སྔ་དྲོ་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་གཉིས་ཀྱིས་རང་ལུས་མེར་སྲེག་བཏང་བའི་གནས་ཚུལ་ཐོན་པར་དབུས་བོད་མིའི་སྒྲིག་འཛུགས་བཀའ་ཤག་ལ་ཧ་ཅང་བློ་ཕམ་བྱུང། བཀའ་ཤག་གིས་དགེ་འདུན་པ་གཉིས་པོའི་ནང་མི་སྤུ༜ན་མཆེད་ཚོར་སེམས་གསོ་དང་སྨོན་ལམ་ཞུ་རྒྱུ་ཡིན།   རང་ལུས་མེར་སྲེག་གཏོང་མཁན་དགེ་འདུན་པ་གཉིས་པོ་ནི་རང་ལོ་ ༡༨ ལ་སོན་པའི་དགེ་འདུན་པ་བློ་བཟང་སྐལ་བཟང་ལགས་དང་རང་ལོ་ ༡༨ སོན་པའི་དགེ་འདུན་པ་བློ་བཟང་དཀོན་མཆོག་ཞུ་བ་གཉིས་ཡིན་འདུག  སྐབས་དེར་མིག་མཐོང་ལག་ཟིན་བྱུང་བ་ཚོས་བརྗོད་པར་གཞིགས་ན་དོན་རྐྱེན་བྱུང་མ་ཐག་དགེ་འདུན་པ་གཉིས་ཀ་རྒྱ་མིའི་དྲག་ཆས་ཉེན་རྟོག་དམག་མིས་འཁྱེར་ཡོད་པ་དང། རང་ལུས་མེར་སྲེག་འོག་ཁོང་གཉིས་ཀྱི་གནས་སྟངས་ཇི་འདྲ་ཡིན་ད་ལྟའི་ཆར་ངེས་གཏན་གྱི་གནས་ཚུལ་ཤེས་པར་དཀའ། ཁོང་གཉིས་ནས་དགེ་འདུན་བློ་བཟང་སྐལ་བཟང་ལགས་ནི་འདི་ལོ་ཕྱི་ཟླ་ ༣ ནང་རང་ལུས་མེར་སྲེག་གཏོང་མཁན་དགེ་འདུན་པ་ཕུན་ཚོགས་ལགས་ཀྱི་ཚ་བོ་ཡིན་པ་དང་། ད་ལྟའི་ཆར་ཀིརྟི་དགོན་པར་རྒྱ་མིའི་དྲག་ཆས་ཉེན་རྟོག་མི་སྣས་སླར་ཡང་དམ་བསྒྲགས་ཤུགས་ཆེ་རུ་གཏོང་བཞིན་ཡོད་འདུག
ཉེ་ལམ་བོད་ནང་འུ་ཐུག་ཐབས་ཟད་ཀྱི་བྱ་སྤྱོད་དེ་ལྟར་སྤེལ་བཞིན་པ་དེས་བོད་མི་ཚོ་དཀའ་ངལ་གྱི་གནས་སྟངས་ཇི་འདྲ་ཞིག་གི་འོག་ནས་ཡོད་པ་ར་སྤྲོད་གསལ་པོ་བྱེད་ཐུབ། དབུས་བོད་མིའི་སྒྲིག་འཛུགས་ཀྱིས་རྒྱ་ནག་གཞུང་ལ་བོད་མི་ཚོའི་དཀའ་ངལ་འཕྲལ་དུ་ཞི་བའི་ཐོག་ནས་སེལ་དགོས་པའི་རེ་འདུན་ཞུ་བཞིན་ཡོད།  ཅེས་སོགས་འཁོད་ཡོད། གསལ་བསྒྲགས་ངོ་མ་དབྱིན་ཡིག་ཐོག་ཡོད་པ་ནས་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་དབྱིན་ཡིག་ལ་རྩ་འཛིན་ཡོང་བ་ཞུ།