༢༠༡༡ ཟླ་ ༩ ཚེས་ ༢ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༢ བོད་མིའི་མང་གཙོའི་དུས་དྲན་དབུ་བརྙེས་ཏེ་ལོ་ངོ་ཧྲིལ་པོ་ ༥༡ འཁོར་བའི་དུས་དྲན་གྱི་མཛད་སྒོའི་ཐོག་བཀའ་ཁྲི་བློ་བཟང་སེང་གེ་མཆོག་གིས་དབུས་བོད་མིའི་སྒྲིག་འཛུགས་ཀྱི་ཕྱི་འབྲེལ་ཁོར་ཡུག་ཚན་པའི་བོད་ཀྱི་གནམ་གཤིས་འགྱུར་དང་འབྲེལ་བའི་དཔེ་དེབ་ཁག་གཅིག་དབུ་འབྱེད་གནང་ཡོད།
༼བོད་མཐོ་སྒང་ཐོག་གི་གནམ་གཤིས་འགྱུར་ལྡོག་གི་ཤུགས་རྐྱེན༽ ཞེས་པའི་སྙན་ཐོ་འདི་ནི་བོད་རིགས་དང་རྒྱ་རིགས། རྒྱལ་སྤྱིའི་ཚན་རིག་པ་རྣམས་ཀྱིས་ཉམས་ཞིབ་མཐར་ཕྱིན་བྱས་ཏེ་ཚན་རིག་གི་དུས་དེབ་ཁག་ཏུ་པར་སྐྲུན་བྱས་པའི་ཉེ་དུས་ཀྱི་དཔྱད་ཞིབ་སྙན་ཐོ་ཁག་མི་འདྲ་བ་གྲངས ༡༥༠ ལྷག་ཕྱོགས་བསྡོམས་བྱས་ནས་ Copenhagenདུ་རྒྱལ་སྤྱིའི་གནམ་གཤིས་འགྱུར་ལྡོག་ཚོགས་འདུ་ཐེངས ༡༥ པའི་སྐབས་སུ་འགྲེམས་སྤེལ་བྱས་པ་ཞིག་ཡིན། བོད་ཀྱི་གནམ་གཤིས་འགྱུར་ལྡོག་གི་ཤུགས་རྐྱེན་དང་རྗེས་འབྲས་ཇི་བྱུང་གི་གནད་དོན་ཐད་རྒྱ་ཆེའི་བོད་མི་རྣམས་ནས་ཤེས་རྟོགས་དང་། དོ་སྣང་། གྲོས་བསྡུར། སྲུང་སྐྱོབ་ཡོང་སླད་སྙན་ཐོ་འདི་བཞིན་བོད་བསྒྱུར་ཞུས་ཐུབ་པ་བྱུང་།
སྙན་ཐོ་འདིའི་དོན་སྙིང་གཙོ་བོ་ཁག་གཤམ་གསལ།
༡༽ བོད་མཐོ་སྒང་གི་གལ་གནད་རང་བཞིན།
བོད་མཐོ་སྒང་ནི་གོ་ལའི་སྣེ་མོ་གསུམ་པ་དང་ཨེ་ཤི་ཡའི་ཆུ་མཛོད། དེ་བཞིན་རྩ་ཆེའི་རྩི་ཤིང་དང་སྲོག་ཆགས་གྲངས་ལས་འདས་པའི་འཚོ་གནས་བྱེད་ཡུལ་གྱི་ཤིན་ཏུ་གཞི་རྒྱ་ཆེ་བའི་སྤང་ལྗོངས་དང་འཁྱགས་རོམ་གྱིས་རྒྱན་པའི་མཐོ་སྒང་ཆེ་ཤོས་ཤིག་ཆགས་ཡོད། འོན་ཀྱང་བོད་མཐོ་སྒང་གི་གཏན་འཇགས་འཁྱགས་རོམ་འདི་དག་ཉམས་རྒུད་དུ་སོང་ན་ཀར་བོན (Carbon)ཧ་ཅང་ཕོན་ཆེན་མཁའ་དབྱིངས་སུ་ཤོར་ནས་གོ་ལའི་ཚ་དྲོད་རྒྱས་ཤུགས་ཆེ་རུ་འགྲོ་བཞིན་པ་དེས་ཨེེ་ཤི་ཡའི་ཆར་དུས་ཀྱི་ནམ་ཟླར་ཤུགས་རྐྱེན་ཐེབས་ཀྱི་ཡོད་པ་ཙམ་མ་ཟད། ཡངས་ཞིང་མཛེས་པའི་མཐོ་སྒང་གི་རྩྭ་ཐང་ཡང་རིམ་པས་བྱེ་ཐང་དུ་འགྱུར་རྒྱུ་ལས་མ་འདས་སོ།
༢༽ བོད་མཐོ་སྒང་དུ་བྱུང་བའི་རྗེས་འབྲས།
བོད་མཐོ་སྒང་གི་ཚ་དྲོད་ནི་གོ་ལའི་ཚ་དྲོད་འཕར་ཚད་སྤྱི་སྙོམས་ལས་ལྡབ་གཉིས་མང་བའི་དབང་གིས་མཐོ་སྒང་གི་གཏན་འཇགས་འཁྱགས་རོམ་ཉམས་ཆག་འགྲོ་ཤུགས་ཆེ་ལ་གནམ་གཤིས་འགྱུར་ལྡོག་ཀྱང་ཤིན་ཏུ་མངོན་གསལ་དོད་པོ་ཆགས་ཡོད། གཏན་འཇགས་འཁྱགས་རོམ་ཉམས་ཆག་འགྲོ་བཞིན་པ་འདིས་སྐབས་འཕྲལ་ཆུའི་གཏེར་ཁ་སྐམ་པ་དང་རྩྭ་ཐང་སྟོང་པ་ཙམ་མིན་པ། ཚ་བསྲེག་ཐེབས་པའི་ས་ངོས་སོབ་སོབ་ལྷགས་པས་དེད་ནས་ཤུལ་དུ་བྲག་རྡོ་ལས་ལུས་ཀྱི་མེད་སྟབས་རྩྭ་ཐང་སླར་བསྐྱར་གསོ་ཧ་ལམ་མི་ཐུབ་པའི་བྱེ་ཐང་དུ་འགྱུར་བཞིན་ཡོད། འདི་ལྟ་བུའི་རྩྭ་ཐང་བྱེ་སར་འགྱུར་བཞིན་པ་འདིས་རྒྱུ་རྐྱེན་རྒྱ་གཞུང་གིས་འབྲོག་པ་ཚོས་ཚད་བརྒལ་ནག་ལུག་འཚོ་སྐྱོང་ལ་ཉེས་མིང་བཙུགས་ནས་རྩྭ་ཐང་རྭ་བས་བསྐོར་བའི་སྲིད་ཇུས་ངན་པ་ཞིག་གཏན་འབེབས་བྱས་ཏེ་འབྲོག་པའི་སྲོལ་རྒྱུན་ལམ་ལུགས་ལ་དོ་ཕོག་ཆེན་པོ་ཐེབས་བཞིན་ཡོད།
༣༽ མིའི་བྱ་སྤྱོད་རྐྱེན་པས་གནམ་གཤིས་འགྱུར་ལྡོག་དང་ཁོར་ཡུག་ཉམས་ཆག
རྒྱ་ནག་གཞུང་གི་ཚན་རིག་དང་ཁོར་ཡུག་གིས་འགྲོས་དང་མ་མཐུན་པའི་གཞུང་ལམ་དང་ལྕགས་ལམ་འཛུགས་སྐྲུན་བྱས་པ་དང་། དེ་བཞིན ༡༩༦༠ རེ་གྲངས་ལོའི་ནང་རྩྭ་ཐང་དང་ཤིང་ནགས་རྒྱ་ཆེ་གཏོར་བཤིག་བཏང་ནས་ཞིང་སར་བསྒྱུར་ཏེ་རྫས་ལུད་ཤུགས་ཆེན་བེད་སྤྱོད་བྱས་པ། ཉེ་ཆར་བོད་དུ་གཏེར་ཁ་སྔོག་འདོན་ཕོན་ཆེན་བྱས་པ་སོགས་ཀྱིས་བོད་མཐོ་སྒང་གི་ཁོར་ཡུག་ལ་ཤིན་ཏུ་ཛ་དྲག་པའི་ཉམས་ཆག་འགྲོ་བཞིན་ཡོད།
༤༽ རྒྱབ་གཉེར་ལམ་སྟོན།
བོད་ཀྱི་ཆུ་བོ་ཆེན་པོའི་རྒྱུགས་ཡུལ་རྒྱལ་ཁབ་དབར་གཙང་ཆུའི་གནད་དོན་ཐོག་ཕན་ཚུན་ཆིངས་ཡིག་འཇོག་དགོས།
བོད་ཡུལ་ཙམ་མ་ཟད་གོ་ལ་ཧྲིལ་བོར་ཁེ་ཕན་ལྡན་པའི་མཐོ་སྒང་གི་ཁོར་ཡུག་རྒྱལ་སྤྱིའི་ལྟ་སྲུང་བྱ་ཡུལ་གྱི་བསྟི་གནས་ཤིག་ཏུ་བསྒྱུར་ནས་སྲུང་སྐྱོབ་བྱ་དགོས།
མཐོ་སྒང་གི་འབྲོག་པ་རྣམས་དོན་དངོས་ཐོག་བོད་ཀྱི་རྩྭ་ཐང་ལོ་ངོ་སྟོང་ཕྲག་རིང་སྲུང་སྐྱོབ་བྱེད་པོ་དེ་ཡིན་པ་ཤེས་ནས་རྒྱ་གཞུང་གི་ནོར་འཁྲུལ་ཅན་གྱི་སྲིད་ཇུས་རིགས་ཕྱིར་འཐེན་བྱ་དགོས།
ས་གནས་ས་ཐོག་གི་ཡུལ་མི་ཚོར་ཁོར་ཡུལ་དང་ཁོར་ཡུག་སྲུང་སྐྱོབ་སྐོར་གྱི་ཤེས་ཡོན་དང་སྦྱོང་བརྡར་སྤྲོད་དགོས།
གནམ་གཤིས་འགྱུར་ལྡོག་དབང་གིས་འབྱུང་བའི་གནོད་པ་ངེས་མེད་ཡིན་པས་གོད་ཆག་ཉེན་སྐྱོབ་ཀྱི་ལས་དོན་ཁང་རེ་ཉེན་ཚབས་ཆེ་བའི་ས་ཁུལ་དང་ཐག་ཉེར་བཀོད་སྒྲིག་བྱ་དགོས།
ད་ལྟའི་དཔལ་འབྱོར་གྱི་ལམ་སྲོལ་ཁྲོད་དྲོད་ཁང་རླངས་རྫས་ཉུང་དུ་གཏོང་ཐབས་ཀྱིས་ཁོར་ཡུག་སྲིད་བྱུས་ཤིག་ལག་བསྟར་བྱ་དགོས།
སྙན་ཐོའི་སྐོར་གཤམ་གྱི་ཁ་བྱང་ཐོག་འབྲེལ་བ་གནང་རོགས།
ཕྱི་དྲིལ་ཁོར་ཡུག་སྡེ་ཚན།
བསྟན་འཛིན་ནོར་བུ། ༠༩༤༡༨༥༧༧༥༠༩
དྲ་བྱང་། [email protected], [email protected]
