༢༠༡༡ ཟླ་ ༩ ཚེས་ ༡༥ རེས་གཟའ་ཕུར་བུ།
༄༅། །བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དྲུང་ནས་གསལ་བསྒྲགས་ཤིག་སྤེལ་བའི་ནང་འཁོད་དོན། སྐབས་ ༡༥ པའི་སྤྱི་འཐུས་གྲོས་ཚོགས་ཀྱི་ཚོགས་དུས་གཉིས་པ་དེ་བཞིན་ཕྱི་ལོ་ ༢༠༡༡ ཟླ་༩ ཚེས་ ༡༦ རེས་གཟའ་པ་སངས་ནས་ཕྱི་ཟླ་ ༡༠ ཚེས་ ༡ བར་ཚོགས་གཏན་འཁེལ་ཡོད། ཐེངས་འདིའི་གྲོས་ཚོགས་སྐབས་གནད་དོན་གཙོ་བོ་ནི་བཀའ་བློན་ཁྲི་པ་མཆོག་གིས་ཕྱག་རོགས་བཀའ་བློན་གཞན་རྣམས་ཀྱི་མཚན་གཞུང་གྲོས་ཚོགས་སུ་གསལ་བསྒྲགས་གནང་རྒྱུ་དང། བཀའ་ཤག་གི་གསལ་བཤད་དང་ཐུགས་སྣང་གཞན་བསྐུལ་གྱི་གྲོས་འཆར།  ཁྲིམས་བཟོའི་ལས་དོན་ཁག་གཅིག དེ་བཞིན་ཕྱི་ལོ་ ༢༠༡༠ དང་ ༢༠༡༡ ལོའི་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་འཁོར་ལས་བསྡོམས་སྙིང་བསྡུས་ལས་ཁུངས་གོ་རིམ་བཞིན་སྒྲོག་སྦྱང་ཞུ་རྒྱུ་ཡིན་འདུག
དེ་ཡང་བཙན་བྱོལ་བོད་མིའི་བཅའ་ཁྲིམས་ཀྱི་སྒྲིག་གཞི་དགོངས་དོན་ལྟར་ན་བཀའ་ཁྲི་མཆོག་གིས་བཀའ་བློན་ཕྱག་རོགས་གཞན་བདུན་གྱི་མཚན་གཞུང་གྲོས་ཚོགས་སུ་ཕུལ་ཏེ་སྤྱི་འཐུས་རྣམ་པས་འོས་བསྡུའི་ལམ་ནས་སྤྱི་མོས་དང་ཡང་ན་གསང་བའི་འོས་ཤོག་ཐོག་ནས་འདེམས་དགོས། འོས་གཞིའི་ནང་ཡོད་པའི་བཀའ་བློན་སུ་རུང་བཀའ་བློན་དུ་བསྐོ་གཞག་ཡོང་བར་གྲོས་ཚོགས་ནང་ངོ་ཡོད་སྤྱི་འཐུས་བརྒྱ་ཆ་ ༥༠ ལས་མི་ཉུང་བའི་མང་མོས་རྒྱབ་སྐྱོར་ཐོབ་དགོས། འོས་འདེམས་བྱུང་བའི་བཀའ་བློན་ཕྱག་རོགས་གཞན་བདུན་རྣམས་ཀྱིས་ཕྱི་ལོ་ ༢༠༡༡ ཟླ་ ༩ ཚེས་ ༡༦ ཉིན་རྒྱབ་ཆུ་ཚོད་ ༣།༡༥ ཐོག་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་དྲུང་དུ་བཀའ་བློན་གྱི་ལས་ཁུར་དང་གསང་རྒྱའི་དམ་འབུལ་ཞུ་དགོས་ཞེས་འཁོད་འདུག་པ་བཅས།།