༢༠༡༡ ཟླ་ ༩ ཚེས་ ༡༦
བཀའ་བློན་བདེ་སྐྱིད་ཆོས་དབྱངས་ལགས།
༄༅། །བོད་རྒྱལ་ལོ་ ༢༡༣༨ ཟླ་ ༧ ཚེས་ ༡༩ ཕྱི་ལོ་ ༢༠༡༡ ཟླ་ ༩ ཚེས་ ༡༦ ཉིན་རྒྱབ་བཀའ་ཁྲིའི་ཕྱག་རོགས་བཀའ་བློན་རྣམས་ཀྱྱིས་གནས་གཟིགས་གྲུབ་མཚམས་ཆེས་མཐོའི་ཁྲིམས་ཞིབ་ཁང་གི་ཡང་སྟེང་ཚོགས་ཁང་དུ་བཀའ་ཤག་སྐབས་བཅུ་བཞི་པའི་བཀའ་བློན་རྣམས་ཀྱིས་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་དྲུང་དུ་ལས་ཁུར་དམ་བཅའ་དང་གསང་རྒྱའི་དམ་བཅའ་ཕུལ་ཡོད།
དེ་ཡང་ཕྱི་ཚེས་ ༡༦ ཉིན་རྒྱབ་ཆུ་ཚོད་ ༡ པོའི་ཐོག་བཀའ་ཁྲིའི་ཕྱག་རོགས་བདམས་ཐོན་བཀའ་བློན་རྣམས་ལ་བཀའ་དྲུང་ཡིག་ཚང་གི་དྲུང་འཕར་ཚེ་རིང་དབང་ཕྱུག་ལགས་ཀྱིས་སྣེ་ཤན་དང་སྦྲགས་གཙུག་ལག་ཁང་དང་། དགའ་གདོང་གྲྭ་ཚང། གནས་ཆུང་གྲྭ་ཚང་བཅས་ལ་གནས་གཟིགས་སུ་ཕེབས་རྗེས་ཕྱེད་ཡོལ་ཆུ་ཚོད་ ༣ པའི་ཐོག་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་རྣམས་པ། བོད་མི་མང་སྤྱི་འཐུས་ཚོགས་གཙོ་མཆོག བཀའ་བློན་ཁྲི་པ་མཆོག སྤྱི་འཐུས་ཚོགས་གཞོན་མཆོག དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་མཆོག རྩིས་ཞིབ་སྤྱི་ཁྱབ་འགན་འཛིན་མཆོག་བཅས་ཆེས་མཐོའི་ཁྲིམས་ཞིབ་ཁང་གི་ཡང་སྟེང་ཚོགས་ཁང་དུ་ཕེབས་སྐབས་ཁྲིམས་ཞིབ་ཁང་གི་སྡེ་འགན་འཇིགས་མེད་ཚེ་བརྟན་ལགས་ནས་སྣེ་ལེན་གྱི་ཕེབས་བསུ་ཞུས་ཡོད། དེ་རྗེས་ཆུ་ཚོད་ ༣།༡༠ ཐོག་བདམས་ཐོན་བཀའ་བློན་རྣམ་པ་སོགས་བཞུགས་གྲལ་དུ་འཁོད་མཚམས་བཀྲ་ཤིས་རྟེན་འབྲེལ་མཚོན་ཆེད་གྲོ་སོ་ཕྱེ་མར་དང་ཆང་ཕུད་ཕུལ། དེ་ནས་ཆུ་ཚོད་ ༣།༡༥ ཐོག་ཁྲིམས་ཞིབ་པ་ཆེ་བ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས། དེ་རྗེས་བདམས་ཐོན་བཀའ་བློན་རྣམ་པས་རིམ་བཞིན་སྤྱི་ནོར་༸གོང་ས་༸སྐྱབས་མཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས། དེ་རྗེས་བདམས་ཐོན་བཀའ་བློན་རྣམ་པས་རིམ་བཞིན་དཔལ་ལྡན་ཁྲིམས་ཞིབ་པ་ཆེ་བ་མཆོག་གི་དྲུང་ནས་ལས་ཁུར་དམ་བཅའ་དང་གསང་རྒྱའི་དམ་བཅའ་ཕུལ་རྗེས་རྟེན་འབྱུང་གསོལ་ཇ་དང་འབྲས་སིལ་ཕུལ་ཡོད། དེ་ནས་མཛད་གཙོ་རྣམ་པས་བདམས་ཐོན་བཀའ་བློན་རྣམ་པར་རིམ་བཞིན་རྟེན་འབྱུང་མཇལ་དར་བསྒྲོན་ཏེ་བཀའ་བློན་དམ་འབུལ་གྱི་མཛད་སྒོ་རྒྱལ་ཁའི་ངང་ནས་གྲོལ། དེ་བཞིན་གཞུང་འབྲེལ་རྟེན་འབྱུང་གི་མཛད་སྒོ་ཕྱེད་ཡོལ་ཆུ་ཚོད་ ༤ པའི་ཐོག་བཀའ་ཤག་གི་ཚོགས་ཁང་དུ་དབུས་བོད་མིའི་སྒྲིག་འཛུགས་ཀྱི་དྲུང་ཆེ་རྣམ་པས་གཙོས་རྡ་སར་ཡོད་པའི་ཡན་ལག་ཁག་གི་འགན་འཛིན་རྣམས་ཀྱིས་བདམས་ཐོན་བཀའ་བློན་རྣམ་པར་འཚམས་འདྲིའི་མཇལ་དར་སྒྲོན་འབུལ་ཞུས་ཡོད་པ་བཅས།།
