༄༅། །ཕྱི་ལོ་ ༢༠༡༡ ཟླ་ ༩ ཚེས་ ༡༤ རེས་གཟའ་ལྷག་པའི་སྔ་དྲོ་༸གོང་ས་མཆོག་གིས་ཨར་ཇེན་ཊི་ནའི་རྒྱལ་ཡོངས་སུ་སྙན་གྲགས་ཆེ་ཤོས་ཡིན་པའི་བརྙན་འཕྲིན་གྱི་ལས་རིམ་གཙོ་སྐྱོང་བ་ལྕམ་སྐུ་སུ་ས་ན་གི་མ་ནེ་ཛི་(Ms Susana Gimenez)ཡིས་ཆེད་དོན་དྲི་བར་བཀའ་ལན་སྩལ། སྐབས་དེར་མགོན་པོ་གང་ཉིད་མཆོག་གིས་བཟང་སྤྱོད་དང་ལྐོག་ཟ་རུལ་སྲུངས་ཀྱིས་གཙོས་སྤྱི་ཚོགས་ནང་གི་དཀའ་ངལ་དང། དཀའ་ངལ་དེ་དག་སེལ་ཆེད་གསར་འགོད་པ་ཚོར་འགན་ཇི་ཡོད། དེ་བཞིན་མགོན་པོ་གང་ཉིད་མཆོག་གིས་ཆབ་སྲིད་འགན་དབང་ནས་དགོང་ཞུ་ཆ་ཚང་ཞུས་གྲུབ་སྐོར་ཞེས་པའི་གནད་དོན་ཐོག་བཀའ་ལན་སྩལ།
སུ་ས་ན་གི་མ་ནེ་ཛི་དང་ལྷན།
དེ་རྗེས་༸གོང་ས་མཆོག་གིས་ལུ་ན་རྩེད་ཐང་ཆེན་མོར་མང་ཚོགས་ ༦༥༠༠ བརྒལ་བར་དཀའ་ངལ་གྱི་དུས་སྐབས་སུ་བདེ་སྐྱིད་འཚོལ་ཐབས། ཞེས་པའི་བརྗོད་གཞིའི་ཐོག་བཀའ་སློབ་སྩལ། དེ་ཡང་མགོན་པོ་གང་ཉིད་མཆོག་རྩེད་ཐང་ཆེན་མོ་དེའི་ནང་ཆིབས་སྒྱུར་སྐྱོང་སྐབས། མང་ཚོགས་རྣམས་ཀྱིས་ཡར་ལངས་ཏེ་དགའ་དད་སྤྲོ་གསུམ་ཐོག་ལག་པ་བརྡབས་ཏེ་ཕེབས་བསུ་གཟབ་རྒྱས་ཞུས་ཡོད། དེ་རྗེས་༸གོང་ས་མཆོག་སྡིངས་ཆའི་སྟེང་༸ཞབས་སོར་འཁོད་བསྟུན་ཨར་ཇེན་ཊི་ནར་རྟེན་གཞི་བྱས་པ་ཐེངས་འདིའི་གདན་ཞུ་གོ་སྒྲིག་གནང་མཁན་བཀའ་བརྒྱུད་ཐེག་ཆེན་ཆོས་གླིང་དང་དོན་བརྒྱུད་གླིང་འབྲུག་པ་བཀའ་བརྒྱུད་ཆོས་ཚོགས་གཉིས་ཀྱི་ཚབ་ཞུས་ཏེ་བླ་མ་སངས་རྒྱས་རྡོ་རྗེས་མགོན་པོ་གང་ཉིད་མཆོག་ལ་ཕེབས་བསུ་ཞུས་པ་དང་སྦྲགས་མང་ཚོགས་ལ་ངོ་སྤྲོད་ཀྱི་གསུང་བཤད་གནང།
དེ་ནས་༸གོང་ས་མཆོག་གིས་ཆུ་ཚོད་གཅིག་དང་ཕྱེད་ཀ་ལྷག་ཙམ་རིང་མི་མང་ལ་གོང་གསལ་བརྗོད་གཞིའི་སྐོར་གྱི་བཀའ་སློབ་སྩལ་གྲུབ་བསྟུན་མང་ཚོགས་ཀྱི་དྲི་བར་བཀའ་ལན་ཡང་མཛད། སྐབས་དེར་ཨར་ཇེན་ཊི་ན་ཙམ་མ་ཟད་ཁྱིམ་མཚེས་རྒྱལ་ཁབ་ཡུ་རུ་གོ་བ་དང་ཆི་ལི་སོགས་ནས་ཀྱང་དོན་གཉེར་བ་མང་དག་ཅིག་བཅར་ཡོད། གཞན་ཡང་ལྷན་ཚོགས་དེའི་སྐབས་དབང་པོ་སྐྱོན་ཅན་གང་ཙམ་བསླེབས་ཡོད་པར་བརྟེན་གོ་སྒྲིག་ཚོགས་ཆུང་གིས་ཁོང་ཚོར་ཆེད་མངགས་དམིགས་ཏེ་ལག་བརྡའི་ཐོག་ནས་གསལ་བཤད་བྱེད་མཁན་ཆེད་ལས་པ་བཀོད་མངགས་བྱས་ཏེ་༸གོང་ས་མཆོག་གི་བཀའ་སློབ་རྣམས་འགྲེལ་བརྗོད་ཞུས་ཡོད།
ཉིན་རྒྱབ་༸གོང་ས་མཆོག་སླར་ཡང་རྩེད་ཐང་དེར་ཆིབས་སྒྱུར་བསྐྱངས་ཏེ་མི་གྲངས་ ༦༥༠༠ བརྒལ་བ་ཙམ་ལ་དགེ་བཤེས་འཆད་ཀ་བས་མཛད་པའི་བློ་སྦྱོང་དོན་བདུན་མའི་ཆོས་འབྲེལ་སྩལ་བ་མ་ཟད། མང་ཚོགས་ཁག་གཅིག་ལ་དྲི་བ་ཞུ་རྒྱུའི་གོ་སྐབས་ཀྱང་སྩལ་ཏེ་དེ་དག་ལ་བཀའ་ལན་མཛད། བཀའ་ཆོས་གྲུབ་བསྟུན་གདན་ཞུ་གོ་སྒྲིག་ཚོགས་ཆུང་གི་ཚབ་ཞུས་ཏེ་བླ་མ་རིན་ཆེན་ལགས་ཀྱིས་༸གོང་ས་མཆོག་ལ་ཐུགས་རྗེ་བཀྲིན་བླ་མེད་དུ་ཆེ་ཞུས་པ་དང་སྦྲགས། མགོན་པོ་གང་ཉིད་མཆོག་གིས་ཁུལ་དེར་མཛད་འཕྲིན་སྐྱོང་སྐབས་མ་དངུལ་གང་བྱུང་བ་རྣམས་ཨར་ཇེན་ཊི་ནའི་ནང་རྟེན་གཞི་བྱས་པའི་སྤྱི་ཚོགས་བདེ་རྩ་ཚོགས་པ་གསུམ་དང་ཨ་རིའི་གྲོང་ཁྱེར་ནིའུ་ཡོཀ་ཏུ་རྟེན་གཞི་བྱས་པའི་ཏཱ་ལའི་བླ་མའི་ཐེབས་རྩ་བཅས་ལ་བགོ་འགྲེམས་བྱ་རྒྱུ་ཡིན་སྐོར་སྙན་སེང་ཞུས།
ཕྱི་ཚེས་ ༡༥ ཉིན་༸གོང་ས་མཆོག་བྷར་སིལ་(Brasil)རྒྱལ་ས་སོ་པོ་ལོར་(Sao Polo) ཆིབས་ཞལ་བསྒྱུར་ཏེ་བྷར་སིལ་ཡུལ་གྱི་ཚོང་པ་དང་བཟོ་གྲྭ་ཆེ་ཁག་གི་འཛིན་སྐྱོང་དབུ་ཁྲིད་རྣམས་ལ་མཇལ་ཁ་དང་ལམ་སྟོན་བཀའ་སློབ་སྩལ་རྒྱུ་ཡིན་པ་བཅས།།
