༢༠༡༡ ཟླ་ ༩ ཚེས་ ༢༣ རེས་གཟའ་པ་སངས།
༄༅། །བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་བཅས་པའི་དབུ་ཁྲིད་བླ་ཆེན་རྣམ་པས་དབུས་བླ་སྤྲུལ་མཁན་པོ་དང་སྐུ་ཚབ་འདུས་པའི་ཆོས་ཚོགས་ཐེངས་ ༡༡ པ་འཚོགས་བཞིན་པ་དང་སྟབས་བསྟུན། བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གོ་སྒྲིག་འོག་ཕྱི་ལོ་ ༢༠༡༡ ཟླ་ ༩ ཚེས་ ༢༣ ཉིན་གྱི་སྔ་དྲོ་ཆུ་ཚོད་ ༨།༣༠ ནས་ ༩།༡༠ ཐོག་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔའི་དྲུང་དུ་མཆོད་སྤྲིན་བརྒྱ་ཚར་འབུལ་ཤོམ་དང་འབྲེལ། མཆོད་འབུལ་སྨོན་ལམ་གྱི་ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཞེ་ཆེན་རབ་འབྱམས་རིན་པོ་ཆེ་མཆོག་དང་།  རྒྱལ་བ་ཀརྨ་པ་རིན་པོ་ཆེ་མཆོག  ས་སྐྱ་བདག་ཁྲི་རིན་པོ་ཆེ་མཆོག དགའ་ལྡན་ཁྲི་པ་རི་རྫོང་རིན་པོ་ཆེ་མཆོག་གིས་དབུས་ཤར་བྱང་ཆོས་རྗེ་རྣམ་གཉིས་མཆོག སྨན་རི་ཁྲི་འཛིན་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག མཚོ་སྣ་རིན་པོ་ཆེ་མཆོག བླ་སྤྲུལ་མཁན་པོ་དང་སྐུ་ཚབ་རྣམ་པ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། བོད་མི་མང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་དང་སྲི་ཞུའི་ལས་བྱེད་རྣམ་པ། བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ་དང་གློ་བུར་ལྷགས་པའི་དགེ་བཙུན་སྔགས་གསུམ། དེ་བཞིན་མི་མང་དང་ཕྱི་རྒྱལ་བ་བཅས་ཁྱོན་མི་གྲངས་ ༢༠༠༠ བརྒལ་བ་འདུ་འཛོམས་ཐོག་སྤྱིར་བོད་བསྟན་སྲིད་རང་དབང་གི་དོན་དུ་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བ་དང་རྒྱ་ནག་གཞུང་ལ་ཞི་རྒོལ་བྱེད་སྐབས་དམག་མིས་ཉེས་རྡུང་བཏང་སྟེ་འདས་གྲོངས་སུ་གྱུར་བ་རྣམས་དང་། ཡང་སྒོས་ཉེ་ཆར་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་སྔ་འགྱུར་རྙིང་མའི་དབུ་ཁྲིད་སྐྱབས་རྗེ་འཁྲུལ་ཞིག་རིན་པོ་ཆེ་མཆོག་དང་བཀའ་ཟུར་འཇུ་ཆེན་ཐུབ་བསྟན་རྣམ་རྒྱལ་མཆོག དེ་བཞིན་བོད་ཁ་བ་གངས་ཅན་ལྗོངས་ཀྱི་བསྟན་པ་ཆབ་སྲིད་ཆེད་རང་སྲོག་བློས་གཏོང་གིས་འཐབ་རྩོད་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མ་ལུས་བྱང་ཞིང་དག་ནས་དལ་རྟེན་རིམ་བརྒྱུད་བླ་མེད་རྫོགས་བྱང་གི་གོ་འཕང་མྱུར་དུ་ཐོབ་པ་དང། ལྟོས་བཅས་ཚེ་དང་ལྡན་པ་བོད་ཆོལ་ཁ་གསུམ་གྱི་བོད་མི་རྣམས་རྒྱ་ནག་དམར་པོའི་ཁྲིམས་འོག་ནས་རང་དབང་བྲལ་ཏེ་དཀའ་སྡུག་ཚད་མེད་མྱོང་བཞིན་པ་སྤྱི་དང་། ལྷག་པར་ཉེས་མིང་སྣ་ཚོགས་ཀྱི་བཙོན་དུ་མི་སྤྱོད་ལས་འདས་པའི་མནར་གཅོད་མྱོང་བཞིན་པ། ཁྲིམས་གཅོད་གཅར་རྡུང་དྲག་པོས་ནད་གཅོང་དང་དབང་པོ་སྐྱོན་ཅན་ཆགས་པ།  གོ་མཚོན་ཐོགས་པའི་དྲག་པོའི་དམག་དཔུང་དང་སྐོར་སྲུང་བས་དམ་བསྒྲགས་འོག་ཉིན་མཚན་འཁྱོལ་དཀའ་བའི་འཇིགས་སྐྲག་ངང་གནས་བཞིན་པའི་ཆོལ་གསུམ་བོད་མི་སེར་སྐྱ་རྒན་གཞོན་ཡོངས་ཀྱི་བགེགས་བར་ཆད་དང་དཀའ་སྡུག་གི་འཇིགས་སྐྲག་ཐམས་ཅད་ལྷག་མེད་མྱུར་དུ་ཞི་ནས་བདེ་ལྡན་རིང་པོར་འཚོ་བ་དང་། ཆོས་སྲིད་རང་དབང་བདེ་སྐྱིད་དཔལ་ལ་སྤྱོད་པ་བཅས་ཀྱི་ཆེད་དུ་དམིགས་ནས་མཆོད་འབུལ་སྨོན་ལམ་ཚོགས་ཏེ་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང་། བཞེས་བག  དགེ་བཙུན་སྔགས་གསུམ་ལ་སྐུ་འགྱེད་ཕུལ་ཡོད། དེ་མཚུངས་ཐེངས་འདིའི་མཆོད་འབུལ་སྨོན་ལམ་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ཟླ་ ༩ ཚེས་ ༡༥ ཉིན་ཨར་ཇེན་ཌི་ནའི་ནམ་ཐང་དུ་ཤར་མར་ལྗགས་རྩོམ་མཛད་པའི་སྐྱབས་རྗེ་འཁྲུལ་ཞིག་རིན་པོ་ཆེའི་ཡང་སྲིད་མྱུར་བྱོན་གསོལ་འདེབས། ༼བགྲང་ཡས་བསྐལ་པར་ཐུགས་བསྐྱེད་དམ་བཅའི་མཐུས། །དུས་འདིར་ཡོངས་རྫོགས་༸རྒྱལ་བསྟན་གསལ་མཛད་པའི། །གསུམ་ལྡན་འདུལ་འཛིན་དམ་པར་གསོལ་འདེབས་ན། །ཡང་སྤྲུལ་གཞོན་ནུའི་གཟུགས་སྐུ་མྱུར་འཆར་གསོལ།༽ཞེས་པ་ཡང་འུར་འདོན་གནང་ཡོད་པ་བཅས། །