༢༠༡༡ ཟླ་ ༩ ཚེས་ ༡༩ རེས་གཟའ་ཟླ་བ།
༄། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཞིག་པར་བརྟེན། ལྷོ་ཨ་ཕི་རི་ཁའི་སྲིད་འཛིན་ཟུར་པ་ཌེ་ཀཱ་ལ་མཆོག་གིས་སྤྱི་ཚོགས་དང་ཁྲིམས་ལུགས་ཀྱི་གནད་དོན་གང་ཅིའི་ཐོག་ནས་ཀྱང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་ལྷོ་ཨ་ཕི་རི་ཁའི་གཞུང་ཕྱོགས་ནས་མཐོང་མཆན་འབུལ་ལམ་ཞུ་མི་ཆོག་པ་མེད་ཅེས་གསུངས་ཡོད།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལ་གཞིགས་ན། ལྷོ་ཨ་ཕི་རི་ཁའི་སྲིད་འཛིན་ཟུར་པ་ཌེ་ཀཱ་ལ་མཆོག་གིས་གསུང་གསལ། ལྷོ་ཨ་ཕི་རི་ཁའི་གཞུང་ཕྱོགས་ནས་གནད་དོན་གཉིས་ཀྱི་ཐོག་ཐག་གཅོད་གནང་དགོས་ཀྱི་རེད། རྒྱལ་ཁབ་དེ་ཉིད་ཀྱི་སྤྱི་ཚོགས་དེ་བཞིན་ཕྱི་གསལ་ནང་གསལ་ཡིན་མིན་ཙམ་མ་ཟད། རྒྱལ་སྤྱིའི་ནང་སྙན་གྲགས་ཆེ་བའི་ཆོས་དཔོན་རྣམས་ལ་གུས་བཀུར་དངོས་གནས་ཞུ་གི་ཡོད་མེད་ཐད་ཐག་གཅོད་གནང་དགོས་ཀྱི་རེད། གལ་ཏེ་ལྷོ་ཨ་ཕི་རི་ཁའི་རྒྱལ་ཁབ་ནས་དེ་གའི་སྤྱི་ཚོགས་དེ་བཞིན་ཕྱི་གསལ་ནང་གསལ་ཞིག་ཡིན་པ་ངོས་འཛིན་བྱེད་ཀྱི་ཡོད་ན། ལྷོ་ཨ་ཕི་རི་ཁའི་གཞུང་ཕྱོགས་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆན་འབུལ་ལམ་ཞུ་དགོས་ཀྱི་རེད། ཅེས་གསུངས་འདུག
དེ་བཞིན་ལྷོ་ཨ་ཕི་རི་ཁའི་ཆོས་དཔོན་ཌེ་སི་མོན་ཊུ་ཊུ་མཆོག་གིས་གལ་ཏེ་ལྷོ་ཨ་ཕི་རི་ཁའི་གཞུང་ཕྱོགས་ནས་ད་ལན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆན་འབུལ་ལམ་མ་ཞུས་པ་ཡིན་ན། དེ་ནི་སོ་སོའི་རྐང་པར་སོ་སོས་མེ་མདའ་བརྒྱབ་པ་དང་གཅིག་མཚུངས་རེད་ཅེས་ཀྱང་གསུངས་འདུག་པ་བཅས། །
༸གོང་ས་༸སྐྱབས་མགོན་ཆེན་པོ་མཆོག་ལ་ལྷོ་ཨ་ཕི་རི་ཁའི་གཞུང་ཕྱོགས་ནས་མཐོང་མཆན་འབུལ་ལམ་ཞུ་མི་ཆོག་པ་མེད་གསུངས་པ།
གསར་གནས།
འབྲེལ་གནས།
