༢༠༡༡ ཟླ་ ༩ ཚེས་ ༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༤ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་རྒྱ་གར་རྒྱལ་ས་ལྡི་ལིར་ཨིན་དྷི་ར་གྷན་དྷི་རྒྱལ་ཡོངས་གཙུག་ལག་སློབ་ཁང་ནས་གདན་ཞུ་ལྟར་ཆིབས་སྒྱུར་གྱིས་(Indira Gandhi National Open University)གཙུག་ལག་སློབ་ཁང་དེའི་ནང་བོད་ཀྱི་རིག་གནས་ཚན་པ་ཟུར་འཛུགས་གནང་བ་དེ་དབུ་འབྱེད་དང་མཁས་དབང་གི་ཕྱག་འཁྱེར་འབུལ་བཞེས། དེ་བཞིན་ཁེ་ཎ་ཌའི་ནང་ཆོས་འབྲེལ་ཆེད་ཆིབས་སྒྱུར་སྐྱོང་སྐབས་དད་ལྡན་སེར་སྐྱ་མང་ཚོགས་ཀྱིས་ལག་ཏུ་དཀར་གཙང་མཇལ་དར་དང་དྲི་བཟང་སྤོས་སྣེ་ཐོགས་ཏེ་ཕེབས་སྐྱེལ་ཞུས་ཡོད།
དེ་ཡང་ཨིན་དྷི་ར་གྷན་དྷི་རྒྱལ་ཡོངས་གཙུག་ལག་སློབ་ཁང་གིས་གཙུག་ལག་སློབ་ཁང་དེའི་ནང་བོད་ཀྱི་རིག་གནས་ཚན་པ་ཟུར་འཛུགས་གནང་བ་དེ་ཕྱིེ་ཚེས་ ༥ ཉིན་༸གོང་ས་མཆོག་གིས་དབུ་འབྱེད་བསྐྱངས་རྗེས་གཙུག་ལག་སློབ་ཁང་དེའི་བསླབ་པ་ཐར་སོན་པའི་དགའ་སྟོན་ཐེངས་ ༢༤ པ་དང་སྟབས་བསྟུན་གཙུག་ལག་སློབ་ཁང་དེའི་མཁས་དབང་གི་ཕྱག་འཁྱེར་(Honoris Causa) ཞེས་པ་མགོན་པོ་གང་ཉིད་མཆོག་ལ་འབུལ་ལམ་ཞུ་རྒྱུ་ཡིན་འདུག
དེ་བཞིན་མགོན་པོ་གང་ཉིད་མཆོག་གིས་ཕྱི་ཟླ་ ༩ ཚེས་ ༧ ཉིན་ཁེ་ཎ་ཌའི་གྲོང་ཁྱེར་མོན་ཊ་རེ་ཡལ་ (Montreal) དུ་ཨ་རིའི་དགུ་པའི་བཅུ་གཅིག་གི་དོན་རྐྱེན་རྗེས་འཛམ་གླིང་ཆོས་ལུགས་ཁག་ལྷན་འཛོམས་ཀྱི་བགྲོ་གླེང་ཚོགས་འདུ་གཉིས་པའི་ཚོགས་མགོན་དུ་ཆིབས་སྒྱུར་བསྐྱང་སྟེ་བཀའ་སློབ་གཙོ་བོ་སྩལ་རྒྱུ་ཡིན་འདུག
ལྷན་ཚོགས་དེ་བཞིན་ཁེ་ཎ་ཌར་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཚོགས་པ་ཁག་གཅིག་དང་། ཁེ་ཎ་ཌར་ཡོད་པའི་ཏཱ་ལའི་བླ་མའི་ཞི་བདེའི་བསྟི་གནས་ཁང་བཅས་ནས་གོ་སྒྲིག་ཞུས་པ་ཞིག་ཡིན་འདུག ལྷན་ཚོགས་ནང་མཉམ་ཞུགས་གནང་མཁན་ཁོངས་སུ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཁག་གཅིག་དང་། རྒྱ་གར་གྱི་ཆོས་ཕྱོགས་ཀྱི་མཁས་དབང༌། རྩོམ་པ་པོ་སོགས་གནད་ཡོད་མི་སྣ་འགའ་ཤས་ཀྱང་མཉམ་ཞུགས་གནང་རྒྱུ་ཡིན་འདུག ཕྱོགས་མཚུངས་ཉིན་དེའི་ཉིན་རྒྱབ་ཁེ་ཎ་ཌ་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་ཐོག་མགོན་པོ་གང་ཉིད་མཆོག་གིས་མང་ཚོགས་ལ་འཛམ་གླིང་ཀུན་ཁྱབ་ཀྱི་འགན་འཁུར་གང་ཟག་རེ་རེའི་ཐོག་ནས་འཁྱེར་ཕྱོགས་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག་པ་བཅས། །